博客文章
0年代著名動作演員黃哈，昨晚11時於瑪嘉烈醫院離世，享年76歲。其生前好友、著名文化人彭志銘證實死訊。
年輕一輩未必聽過黃哈，但一定認得佢主演過嘅電影。其中最為人熟識必定係《殭屍先生》，扮演李賽鳳個爸爸任老爺，委託茅山師傅九叔（林正英）處理祖墳，點知中途發生事故，最後連自己都變埋殭屍。
黃哈，原名黃景洋，人稱蝦哥，係劉家良父親劉湛嘅徒弟，60年代做龍虎武師，亦係劉家班嘅主要成員，之後做武術指導。邵氏年代拍過好多齣電影，亦做過導演，78年徐少強同黃錦燊主演嘅《佛山贊先生》就係佢執導嘅。
話說霸戲哥早幾日先同豬視妹一齊睇《殭屍先生》，可惜幾位前輩已經先後離去，只能喺戲入面追憶。
霸戲哥
** 博客文章文責自負,不代表本公司立場 **
有日豬視妹失驚無神同我講，話MIRROR某位成員入圍全球百大型男，我當堂嚇有跳，然後得啖笑。型？邊鬼度型呀？
名我唔會開架啦，無謂引發世界大戰，只係覺得個選舉係咪咁流呀。跟住轉個頭，成隊MIRROR同ERROR都入圍。而最近入圍嗰個，係黃偉文。
呢個「全球百大型男2022」選舉，根據TC Candler公佈嘅「遊戲」規則，主要有兩個方法提名，一就係喺YouTube或IG提名，但唔寫包單入圍。二就係課金，只要每月科水，就保證成功提名，連續科夠半年，仲可以有提票權添。終於真相大白。
至於被提名嘅Ｗyman，唔夠一日就自行宣佈退選，其實真係型喎。呢件事令霸戲哥諗起《初戀無限TOUCH》，係Ｗyman極罕有感情戲份嘅戲。戲入面Ｗyman不知幾有男子氣概，仲奪得陳彥行芳心添。你喇沙？我喇沙。
Ｗyman入圍全球百大型男，至少我服喎。
