霸戲哥之日常#085 │ 西門町

豬視妹一直話要睇《月老》，可惜霸戲哥舊年聖誕忙到七彩，到過完年戲院又話要關門，搞到豬視妹好唔高興。女人最鍾意睇埋晒呢類婆媽戲。

估唔到機會又返番嚟，《月老》啱啱喺Disney+上架，呢日姑且陪豬視妹坐咗陣，一路寫稿一路睇。套戲故事簡單講，就係柯震東意外畀雷劈死，要投胎轉世就要做月老積陰德，於是同王淨part住做賺karma，結果喺凡間遇到佢隻狗狗同愛人宋芸樺，前世記憶返晒嚟。好典型嘅九把刀式愛情故事。

九把刀有樣好獨特，就係處理任何愛情故仔，都可以好中二病。男主角永遠都係咁天真單純，為愛人一往情深，唔搵柯震東做真係冇人適合。成套戲我只係戥王淨唔抵，默默為愛人付出又不求回報，此女只應天上有。當然隻小狗為套戲加唔少份數，睇完我都忍唔住錫咗啖我家衰狗大爺雞。

比起《那些年，我們一起追的女孩》，《月老》故事性比較弱，或者九把刀太貪心想將好多元素硬塞入去，結果進退失據。不過電腦特技真係唔錯，同埋王淨係靚嘅，如果佢同宋芸樺角色互換，我估我會投入好多。

睇完套戲，好想念西門町呀，幾時可以去？

霸戲哥

** 博客文章文責自負,不代表本公司立場 **

以搞「全球百大型男美女」選舉聞名嘅TC Candler，近日又公佈新一輪入圍名單，TVB兩位當紅靚女入圍，分別係@aliaime Ali李佳芯，同國民初戀@chantelyiu Chantel姚焯菲。亦即繼MIRROR、ERROR同Wyman後，又有港星入圍（笑）。

講起呢啲乜乜百大俊男美女選舉，其實一直都有，不過霸戲哥讀書年代，總覺得公信力高好多，譬如史上最靚金庸影視角色，翁美玲嘅黃蓉同陳玉蓮嘅小龍女永遠都係Top 10。起碼唔會好似依家咁花多眼亂，入圍門檻又咁低。

Ali同Chantel梗係稱得上靚女啦，唔知After Class其他幾位成員炎明炎明熹、詹天文同鍾柔美又幾時上榜呢？COLLAR仲有8位成員添，TC Candler今次真係肥仔啦。

扯遠少少，大家仲記唔記得2017年港姐冠軍雷莊兜？已經返咗加拿大生活嘅佢，最近又參加咗「Miss Face of Humanity 2022」選美比賽，仲係代表香港出戰架，佢將會同另外27位來自世界各地嘅佳麗對戰，聽日香港時間朝早7點半就有結果。

嗯，呢個選舉似乎公信力高啲。