前學民思潮召集人黃之鋒準備組黨，今日公開質疑， 話為正在籌組的政黨申請公司註冊， 但到滙豐銀行申辦戶口作收取捐款用途時，遭到拒絕，滙豐經理話因行政理由和商業安排而唔接受佢地開戶， 黃之鋒直指銀行因政治敏感而阻礙他們。滙豐強調不會因為政治立場而拒絕顧客的開戶申請。
政壇高人話，黃之鋒少做生意，唔知商業運作，見滙豐唔俾佢開戶，就以為政府發咗功。其實而家環球大銀行對客戶開戶口十分之嚴格，拒絕開戶閒過立秋。世界各地金融監管機構規管愈見嚴格， 要求銀行「認識你的客戶」（Know Your Client，簡稱KYC），否則出事後銀行要負責，最常見的問題是戶口被利用作洗黑錢、特別是恐怖組織相關的洗錢安排。另外銀行戶口被用作逃稅避稅，亦要大力打擊。所以大銀行專門成立「Know Your Client」部門，審查所有開戶申請，唔認識一概拒絕。海外公司開戶一律say no，新公司亦要查家宅咁，要細查所有資金來源。
高人話，本地一間傳媒，本來一直係滙控屬下銀行的客仔，但後來因為母公司的問題(懷疑是經營不環保行業生意)， 竟然被滙豐要求停止商業往來，連佢哋係傳媒都無面俾，你話滙豐嚴得幾交關。好似黃之鋒呢類聯名戶口，由於接受捐款，部份資金來路不明，大銀行拒絕開戶，唔想因為小生意，惹來大麻煩，萬一部份資金被美國查出有問題，滙豐就一身蟻。
睇睇滙豐母公司滙控過幾年因為各種理由，俾以美國為首的國家罰過幾多錢就知。滙控於2013年被美國監管機構罰款148億港元。2014年11月滙控因涉嫌操控外滙案件與美國、英國及瑞士監管機構和解，滙控被罰48.2億港元。2015年6月，滙豐瑞士私銀助客逃稅案 滙控與日內瓦檢控部門達成和解協議，付出3.3億港元了結事件。 2015年10月，滙豐融資就前管理層向投資者作出誤導及虛假陳述，被美國聯邦法院裁定，滙控需作出破紀錄的賠償額，高達192億港 元。到今年2月，滙控旗下北美滙豐，與美國司法部達成和解協議， 就金融風暴期間強制收樓問題作出賠償，和解支出36.7億港元。 呢啲和解官司好似仲未完晒。
高人慨嘆，黃之鋒未做過生意，唔知大銀行做生意有幾難。
Ariel
** 博客文章文責自負,不代表本公司立場 **
