呢排開人大政協兩會，港區的尊貴代表都感受氣氛有變，好多以前阿爺講過話要執正嚟做的事，突然好認真落實，唔再好似以往咁得個講字。
睇吓點打油老虎(周永康)就知，北大人依家好多嘢唔係講笑，隨著案情陸續曝光，佢成個家族已經起晒底，睇怕兩會一開完就嚟料喇。油老虎係前年從政治局常委退落嚟，呢一次打老虎，令所謂「刑不上常委」的神話破滅，京城傳來可能有更多大案，仲講到有四大案分別涉及四個前政治局常委，正在搞緊。
但呢幾個名太震憾，都係唔講好過講啦，總之四個前常委都係有頭有面那一種，唔係講咗你都記唔得那一隻。其中一個仲同香港富豪圈好有聯系，若然同佢家人夾份做緊生意，都要部署吓退路啦。
講真，呢次如果真係打破「刑不上常委」的慣例，殺完周永康後再對其他前常委開刀，對京城政壇的震撼力就好大。
中共十八大後，搞咗一系列學習，本來唔少黨員幹部開始都以為走過場，學習呢家嘢，在內地官場三、五年就搞一搞，之後日子照樣過，油水繼續抽。但有官員就透露，睇咗幾篇習大大的內部講話，好似俾人用針刺落個心咁，點都震一震。聞說，講話中冇咩八股之外，對官場之間各種各類的欺上暪下方式，全部數晒出來，睇嚟習大大對由基層到地方實在好了解。
聞說多番學習大大吹的節約風後，各大部委，開會的形式都轉晒，可以電話會議就電話會議解決，要碰面開會，地點都先揀在部門內部，真係地方唔夠大，要訂外邊酒店時，講明咩佈置都唔要，聞說有啲部委直頭連茶水都自備，齋訂個場就算。啲酒店會所就慘情囉，以前訂個場收你少少錢，就係鮮花佈置、食物餐飲就狂搵一筆，依家租得個吉房，你話食到幾多呀。
所以話，只要喺京城走一走，你就覺，四大案有冇都好，敲山震虎，呢招都唔係得個講字架。
Ariel
** 博客文章文責自負,不代表本公司立場 **
呢一期好多富豪出來發話，但睇真啲大有雞同鴨講之感，最大分野就係長實李超人和新世界純官，兩者差距何至十萬八千里。
李超人接受內地「財新網」的訪問時提到，香港近來民粹主義升騰，形容香港是被寵壞了的孩子，認為這樣下去，不用五、六年，香港就會面目全非。「香港如果真的走上民粹主義之路，就會像野馬易放難收。」佢認為貧富差距擴大是全球的問題，政府切忌「情緒政策化」，不能只從扶貧的思維出發，這樣不能真正解決社會基層日益複雜的問題。必須靠教育改革，實現社會向上流、解決跨代貧窮問題。
睇嚟李超人唔係幾認同政府加派福利的政策。由於財新網訪問了李超人幾次，最近一次在特首CY公布施政報告之後，令人懷疑李超人是知道特首在施政報告大推低收入津貼之後，才講出「政府不能只從扶貧出發」的評語。
反觀新世界純官，卻似乎好like 特首CY的扶貧政策，反而唔妥財爺鬍鬚曾的收水行為，純官昨日在北京直言財爺是「杞人憂天」，更指他的理財之道非市民之福，又認為特首和財爺的理財理念確有分歧。
純官的矛頭瞄準鬍鬚曾，他指特區政府要秉持量入為出，但不代表儲備不能動用，「你現在有七千幾億的儲備，你譬如拿三千億出來，分五年使，訂立五年計畫，每年使六百億，在各方面怎樣可補經濟不足的地方」。純官雖然不是叫政府派晒三千億，而是用三千億發展經濟，但態度極進取，和財爺的審情思維剛好相反。
先不論誰對誰錯，但李超人和純官這樣一個反對政府政策情緒化，一個反對政府太杞人憂天，這種大孖沙態度南轅北轍的現象，的確前所未見。巨龍戲水，左右互博，你都咪話香港政治無暗湧呀。
