文︰勾玄
官殺作怪
成日聽到有關家暴問題，例如老婆比老公打咁，究竟係佢地有眼無珠定係命中註定呢，響子平八字學上，係可以咁解既。
官殺，八字學上既十神入面既其中兩位大將軍之一，官即正官，殺即七殺 (又有人叫佢做偏官)，十神固然係有十位大將軍啦，通常以兩個為一組，即以行孖咇既形式去劃分既。又既然行得孖咇，性情當然相近啦，咁就官殺黎講，正官係 比教正氣，行事以正規為主，唔鍾意走精面，行捷徑既。相反，七殺就目標為本，亦正亦邪。
好啦，講左咁耐，究竟呢兩位將軍同打老婆有咩關係呢？原來，八字學上，官殺代表女人既老公架喎，咁你又會話，車，又如何。
是咁的，官殺雖然代表老公，但佢同時係剋身既代表，因為自身十神既代表，正正就係比刧，官殺剋比劫，如果咁岩女士們又係官殺為忌，你要小心啦。
佢好顧家，但又打老婆
Sorry，呢樣野係冇抵觸既，我就見過一個女性朋友既八字，自坐官殺，且為忌，就係呢一款啦。佢夫星坐夫位，表示佢老公係個剋盡己任既老公，但係打唔打老婆，係另一事，所以唔好再響呢個問題上糾纏。
我得正官，冇七殺
咁好 D ，正官剋身既問題比起七殺輕微，最多只係老公約束得比較緊，間唔時鬧下你，未至於打既。之但係你又唔好開心得太早，八字學上有所謂︰官多則變殺，意思係，當你既八字格局，連大運流年合計，有三個或以上既正官時，就以七殺既特徵去計算架啦。
嘩，聽到呢度，係未嚇到個心都離一離呢，唔怪得隔離屋阿丘生平時成個好好先生咁，點解早排聽人講佢打老婆既呢 ﹖嗱，十居不離九就係呢類情況啦。
化解之法
其實唔駛太驚既，以上情況係有，但要有特定條件先可以成立既，第一︰官殺坐夫妻官，第二︰八字冇主護日元 (即正偏印，例如，屬土既人，火就係佢既正偏印)，第三︰官殺要貼身剋，否則，離日主太遠，唔夠力，即係冇用。
女士，如果咁岩你集齊以上既缺點，唔駛慌，不妨考慮一下，年齡比自己大一截既男性，異國戀，或者尋找一些失婚人士對象，都係可以既。
再唔係，學定門功夫傍身，打交既野冇話老公打老婆贏硬既道理架，自身有準備，打過先知既。
#Facebook專頁 #香港兔蘆術數學會 #Yahoo #Elle Blog #痞客邦
#微博客 #巴士的報
學會網站：https://www.facebook.com/numerology.rabbit/
香港兔蘆術數學會
** 博客文章文責自負,不代表本公司立場 **
