政事
廉署高層地震，新任署任執行處首長的丘樹春， 一早就是廉署明日之星。
曾任廉署調查主任的民主黨總幹事林卓廷今早在電台雖然鋤廉署換人 無透明度，但講到丘樹春，仍然贊佢有料到。
原來林卓廷在廉署做靚的時候，丘樹春就係其上司。 丘樹春港大畢業後先入政府做EO(行政主任)，但1994年加入廉署做調查主任，入職不久升高級調查主任，被視為明日之星， 廉署內部更改他花名為「AD丘」，話他會做AD(助理處長)甚至更高級職位。他調查經驗豐富，為人好醒目。 他主要負責調查私營機構貪污，曾偵破公屋短樁案、陳裘大案、 廣興國際控股造市案等。
知情人士話，丘樹春現年51歲，和53歲的李寶蘭其實年齡接近，只是他稍遲加入廉署，所以李寶蘭經驗多少少而矣。丘樹春2014 年起出任執行處處長，論資歷升任署任執行處首長，亦無乜嘢可以非議。現時廉署仲查緊部份政黨相關案件，而那些政黨又來質疑廉署的人事變動，叫廉署去立法會交待， 咁搞就有少少利益衝突，兼且將廉署政治化啦。
Ariel
** 博客文章文責自負,不代表本公司立場 **
廉政公署昨晚7時許發新聞稿宣佈，現任署理執行處首長李寶蘭將於本月18日開始離職前休假， 由現任執行處處長（私營機構）丘樹春同日起署任執行處首長。一直盛傳人稱Madam的女神探李寶蘭坐唔正做執行處首長，但估唔到佢最後劈炮唔撈，咁快離職。
現年53歲的李寶蘭在去年7月17日接替退休的黃世照，署理執行處首長一職，只是行政上署任該職，並未升正。 消息人士指，過去呢啲署任安排做半年就坐正，但廉署只是每3個月幫李寶蘭續一次署任，無宣佈坐正，早就反映佢坐唔穩個位。
據說係呢個星期一廉署高層向李寶蘭宣布，不再由她署任執行處首長一職，意味著她會跌番落去做執行處處長，改由丘樹春升上去做署任執行處首長。聞說星期二Madam返工時 ，有人見到佢眼紅紅。結果佢頂唔順做番執行處處長，就自己劈炮唔撈。若然佢唔走，仍然可以做執行處處長，起碼做多7 年至退休。
消息話，上一波人事變動，當時黃世照仍然做執行處首長時，廉署高層曾問過Madam，有冇興趣調過去做防貪處處長，查慣案的李寶蘭無興趣調職。後來黃世照退休，李寶蘭署任執行處首長，署理呢個實際上係副廉政專員的位置，估唔到最後佢都係坐唔穩做位，堪稱世事如棋了。
