廉政公署上周宣布，署理執行處首長李寶蘭本月18日起離職前休假，由執行處處長丘樹春接任，事件引起公眾關注。民主黨一直引述消息話，事件涉及政治因素，又指特首梁振英介入任命。
政府過去遇到呢啲質疑，一般側側膊就算，都係不評論，等事件慢慢過去，不過今次廉政專員白韞六就唔一樣，選擇開記者會高調回應。
白韞六話，廉署一般不會評論個人任免，但為免大家猜測，故特別就李寶蘭離職一事澄清。佢指最近就李寶蘭在近一年的署任工作表現作評估，由於李的表現、潛質和能力未達到更高職位要求，因此預備停止其任命，並安排李寶蘭回復原本的崗位，即執行處處長。但李寶蘭得悉後決定請辭，雖然白韞六著她再作考慮，但李兩日後提出於本月18日起生效的書面解約通知。
白韞六又指，在作出人事任命決定前，曾知會行政長官梁振英，但梁振英未有給予任何意見或參與有關決定。
政壇八卦友話，政府部門內有不同馬房，升一個唔升另一個，受損一系自然會有好多流言蜚語，但紀律部隊講求遵守紀律，白韞六選擇強硬澄清，就係想制止呢啲傳言。
Ariel
** 博客文章文責自負,不代表本公司立場 **
