突發新聞往往是傳媒表現的時候，載著二百幾人的馬來西亞航空客機失去聯絡，世界各大傳媒當然一窩蜂趕去採訪，本港傳媒當然勇往直闖，但聞說有大台就有保留，左度右度，決定撳住個荷包。
本來採訪空難，畫面、soundbite一應俱全，單係影架飛機殘骸、搜救傷者、再撲去醫院採訪，畫面已經夠晒震撼，奈何今次馬航「神秘的消失」，呢啲畫面統統欠奉，記者連日來只是在酒店等、等、等。
有大台撳住荷包係咁意派好人去做，有前線記者就做到唔見左荷包！受害人是Now 新聞台助理採訪主任陳偉利。
話說喺檳城採訪的偉利，尋日下午同班行家在酒店採訪，中途要同攝影師去酒店門口拍嘢，就隨日放低咗個背囊。行家們個個低頭寫稿，就喺呢個時候，一個大大隻嘅男人行埋嚟，放低一個黑色背囊，再揹走偉利的背囊。
偉利拍完嘢返到酒店，發現唔見咗個背囊，入面有證件、現金仲有衣服，聞說仲係成副探訪用的身家都唔見曬，佢即刻通知酒店員工同報警。睇埋閉路電視，原來仲錄低晒成個犯案經過。有酒店員工話，嫌犯呢兩日經常喺酒店出沒，坐喺小食部隔壁椅子，又成日混入記者堆中添。
對偉利的遭遇，Ariel深表同情。之但係大家細細個都有聽過，銀包證件要跟身啦，尤其去到呢啲兵荒馬亂的環境，如果話俾人偷俾人搶就冇得預啫，但放喺酒店公眾地方，好易俾賊人有機可乘，下次要小心啲啦。
Ariel
** 博客文章文責自負,不代表本公司立場 **
繼免費電視牌照風波，維基再掀流動電視牌照風波，呢兩日通訊局同維基隔空展罵戰，突然之間，大家要對好多英文字母熟晒，什麼CMMB、DTMB、DVB-H….一堆英文字母聽到耳到側，明天就會再爆出個ATV添，無錯就係大埔的良心電視台，ATV。
王維基明天上午將會再踏足大埔工業村，踩入亞視。嘩！唔係流動電視觸礁，維基又再興起買亞視的念頭呀，咁….今次就當然唔係啦，佢接受《把酒當歌》節目的主持人劉瀾昌的邀請，上節目大談電視風雲。
自從2008年年底，維基喺亞記做咗十二日「短命」CEO後，維基同亞記一直上演又愛又恨的連續劇，喺免費電視發牌前，亞記大搞「維基解密」節目批評當時正在申牌的維基，搞到亞視自己被通訊局裁定違反《電視節目守則》，罰款8萬元。
維基在失落牌照後，又被本網拍到佢同亞記老闆王征密會傾賣盤。然後最近仲爆出亞記一度有意出租頻道俾維基添。
雖然最後未有一單做得成，但兩者關係錯綜複雜。不過今次雙方有緣再會，就簡單得多，亞視公關話「把酒當歌」係開放的平台，所以邀請各方人士上來，主持節目的新聞部阿頭劉瀾昌，唔知會唔會問吓維基咁多年再次踏入亞視有咩感受呢，甚至問問「王生乜嘢價你會買亞視？」
希望兩人明天攞住杯紅酒，可以擦出火花啦，可惜錄影過程暫時唔會公開，到節目出街先知有冇料爆啦。
後記：維基今早十點半(周五)去到亞視錄影，雙方公關話之前有協議唔公開時間，所以唔係太多傳媒去扑咪，據聞維基做完節目，都冇接受亞記記者採訪就離開。唔知係咪主持節目的劉瀾昌有睇Ariel個專欄，佢真係問維基會唔會買亞視，維基就繼續賣關子，既冇肯定又否定的答案。當然詳情，亞記中人亦都冇多講，據了解個節目依家趕製中，今晚十一點有得睇。(更新時間：3月14日13:00)
