資質平庸心頭高，不安於本份，成日以為自己好叻但懷才不遇，所以為咗上位，行事不擇手段，或者甘願被人利用，走上妖途，當中的表表者，非戴妖莫屬。
戴妖係一個普普通通嘅法律系學生，無咩嘢叻，所以俾老犯民法律界大佬睇中收咗佢做阿四，學埋曬啲背信棄義嘅教條，之後就去「講大」法律系典嚟典去，就咁過咗大半世。
佢啲大學同學仔粒粒皆星, 好似前律政司袁國強、傳媒大佬劉進圖……等等。佢有個同學同零零發講，「我哋班同學，最叻嗰批自然去咗做大狀，之後就成為資深大狀，一帆風順。嗰位老兄畢業後要返大學教書，做來做去又做唔到正教授，你話佢有幾叻呢？」
佢充滿Loser 的特質，自然有啲自卑，但又唔夠料唔夠膽出去搏，仕途又沉下沉下，人到中年，無面無底，於是咪成日諗住點樣可以出名威吓囉! 有一日佢發咗個春秋大夢，度咗條「非法佔中」橋，扮曬主角，抄外國激進理論，講什麼「違法達義」嘅歪理，講咩「讓愛與和平佔領中環」 (其實係「用仇和恨破壞香港」先啱)，就咁喺班「犯民」中彈起咗；其實無他，只要你夠激，就好易出位，呢種叫現象叫做「劣幣驅逐良幣」。
戴妖搞呢單嘢嘅時候，不但收咗啲來歷不明嘅捐款，而且借「講大」嘅名去收政治捐款，佔用「講大」做埋「非法佔中」秘書處，公器私用，終於俾「講大」查之餘，仲害到佢老頂陳X X升唔到職。單「非法佔中」講到咁巴閉，最後咪俾班牛奶仔騎刧咗！戴妖最後唯有承認情況失控，仲為咗咁要坐監同埋俾「講大」趕走咗。
戴妖為咗保持自己法律之神(查實係發顛之神) 嘅至尊地位，佢無死到心，2017 又搞咗個「風雲計劃」，2019黑暴運動失敗後，又想盡妖法去推冧政府，整完嗰「雷動計劃」又嚟多個「35+顛覆」大計，無非都係想操控議會，推翻政府搞亂香港。想用法律學者嘅光環去搶分，想做紅花會總舵主統領天下！到而家竟然夠膽講當時深信「初選」冇犯法，無用暴力、只係用憲法權力咁話！通通都係擘大眼講大話，妖言惑眾。戴妖呀戴妖，「初選」 擺明係犯法啦！唔該睇睇《選舉(舞弊及非法行為)條例》第8條，人哋唔同意你所謂無差別否決預算案就夾到人無得選，仲唔係犯法?唔識法律，好心就唔好做法律系所謂副教授啦。
戴妖出嘅屎橋次次都係衰收尾，次次都呃人話無犯法，叫班細路仔出嚟衝，但次次最後都係又拉又坐監。有次佢仲夠膽講「無諗過判刑咁重！」。吓，而家先講，究竟係真痴定假傻呀？！話雖如此，佢就收埋自己啲仔女，費事佢哋衰咗有案底無前途喎。
最近單「35 +顛覆案」係大法院求情，睇到大家眼凸凸標冷汗，咩人嚟㗎？為求減刑，作為整場運動嘅大腦，戴妖竟然將自己嘅身份變成食物鏈嘅最低層-「其他參與者」，最好只係判2年。連法官都忍唔住問，如果戴妖只係「其他參與者」，咁邊個先至係「首要分子」？
呢名曾經嘅「大佬」，而家就爭住做「契弟」，拚命搣甩「首要分子」個銜頭，一啲「大佬」本色都無，你死你事，背信棄義，毫不猶豫，連社團古惑仔都不如，完全係窩囊廢透頂嘅完美演繹！
你可以話「人不為己、天誅地滅」，當然做賴皮王，好過帶光環落去見閻羅王！不過你咁樣無底線嘅求情，「犯民」都唔撐你啦！唉， 都係一貫黃人嘅手法，冇事就大大聲，有事就扮唔friend。 當日信誓旦旦咁話兄弟爬山齊上齊落，口口聲聲話共同奮鬥到底，一齊為「攬炒」目標而戰。但而家可以話割蓆割到底，縮過縮骨遮。相信黃友們百般滋味在心頭，午夜夢迥，都知道俾人搵咗笨。黃友呀黃友呀，唔好諗住抗爭真係圍爐吹吓下水咁簡單囉，有威就佢哋威，有鑊就你哋孭，諗清楚啲喇！
戴妖迷戀權力和地位就注定有如此下場！佢一路咁顛喪，除咗俾老犯民洗腦，拎咗「生果金」之外，其實佢仲攞咗美角嗰個「角祭民主硏究院(NDI) 」 唔少着數，而呢間嘢都泵咗好多錢嚟香港去支助啲所謂「學生運動」。如果話戴妖有民主光環，不如話佢戴住美式民主金剛箍仲貼切。所以佢保送阿女去美角，都唔知真係去讀書，抑或係做「人質」喎！唉， 低智到咁，我都同情佢架，比啲黃人同金主捧到咁高，但一個一個又逃之夭夭，越洋一路歎世界時仲一路話支持你、支持你，都幾傷心架！
大小姐、保總、三隆太、Man 姐……知道我開筆寫隻千年老妖，就即刻打爆我手機，要我問隻妖怪: 「戴妖，你係『講大』鼓吹『違法達義』咁耐，你呃咗幾多天真嘅法律學生？害左幾多代年青人去犯法、去坐監？戴妖你呀，坐一世監都賠唔起、還唔清 xyz@*#......！」
各位黃友，你哋都要醒啦，唔好人哋講、你就衝！認清楚人同鬼、認清楚法律同公義呀！諸位法律人，你哋究竟諗住繼續抽水、伺機再起，還是持守法治，撥亂反正呢？
鍾情局．零零發
鍾情局
** 博客文章文責自負,不代表本公司立場 **
最近日本啲熊周圍出沒咬人，2025年就起碼有14人死，過百人傷。聽聞香港呢個石屎森林，呢排都出現咗隻熊「J-son The Pooh」，喺度不斷搗亂吼叫，蠱惑人心！
究竟「呢隻熊」係邊度走出嚟㗎？
「呢隻熊」50幾歲，好似有工程同法律學位，以前係「XX興業」工程公司老闆，而家就成日以政治人物、 時事評論員自居。 點解轉咗跑道嘅？
「沙中線短鋼筋事件」
咁就要從「沙中線短鋼筋事件」講起，當時「XX興業」係沙中線其中一個工程二判商，「呢隻熊」當年被指係呢單嘢嘅吹哨人。不過睇返政府嘅調查報告，發現其實佢喺2015年7月，已經發現啲鋼筋有問題，但一路唔出聲，繼續收錢做佢嘅工程。 到2017年1月，佢就忽然電郵俾總承建商，指出鋼筋有問題。喺9月，「呢隻熊」就再發投訴電郵俾總承建商同埋政府，不過過咗幾日又通知政府，話自己已經同總承建商到現場視察同埋開咗會，解決咗件事。但係總承建商唔承認有咁嘅安排，仲指出「呢隻熊」聲稱一齊喺現場堪察同開會嘅總承建商職員，當時根本唔喺香港！
當發現有危險嘅情況，一般人都會盡快報告，以防事態加劇。點解事發隔咗兩年後先講？如果真係為公眾利益著想，唔係應該即刻講嘅咩？ 江湖傳聞話鋼筋醜聞有可能係「呢隻熊」同總承建商金錢糾紛嘅籌碼。「
XX興業」變「XX監察」？
2019年9月，「XX興業」被債權人入稟清盤。同年11月，「XX興業」成立咗一個叫做「XX監察」嘅民間組織。係2020年9月，高院就頒令清盤，「XX興業」結束營業。
「XX監察」聲稱係一個由工程界人士主導，去監察工程質量同關注公共利益嘅組織。不過我零零發上網搵咗好耐，成個「XX監察」，除咗話「呢隻熊」係主席之外，其實乜嘢資料都冇，有咩專業人士喺度亦都冇。
而唔知係咩原因，「呢隻熊」分別喺2011年參選區議會選舉，2021年參加「選舉委員會天主教香港教區代表」同埋立法會選舉，好似好有「戰績」咁，不過其實次次都選唔到！ 可能冇辦法入到政圈，所以唯有係民間突圍，係2022年開始，「呢隻熊」以「XX監察」主席身份，開始喺社交媒體，對好多大型工程發表所謂「專業評論」。
「東涌100區」
2022年，「XX監察」聲稱正向「東涌100區」工程進行調查監察，希望有關工程人員提供相關資料……有部份負責工程嘅公司指「呢隻熊」嘅貼文有誹謗之嫌，於是入稟高等法院，要求禁制佢言論，並要求賠償。
香港大學西高山校園
2023年6月，「XX監察」又聲稱香港大學西高山校園重建計劃出現石屎結構、鋼筋外露等問題。但其實校方喺4月已經發現有問題，並且同承建商作出修正。於是，「呢隻熊」又俾承建商入稟高等法院，告佢誹謗!
穗禾苑大維修
2024年，佢透過 YouTube 頻道，影射穗禾苑大維修圍標，工程公司與業主立案法團黑箱操作，搞到班業主要負擔唔合理嘅維修費用，又話有議員同建築業界同流合污，詐騙業主金錢等等。所以穗禾苑業主立案法團入稟咗法院告佢誹謗，法庭再度頒令，禁止佢於任何渠道發佈誹謗性言論。
大火災
香港係一個言論自由嘅地方，大家發表意見絕對係冇問題，不過識嘢嘅老友，就睇到「呢隻熊」別有用心。好似11月尾大火災之後，佢不停喺度高調煽風點火，喺社交媒體洗版式出帖抽水，先針對救火不力，跟住就點名批判官員，以至成個政府，跟住又「燒埋」人哋業主立案法團，究竟咩居心？而佢又對外牆工程與用料規格大做文章，不過喺12月14日，佢自稱研發咗阻燃棚網，又話已經同「生意夥伴」喺內地構建供應鏈，時間真係「啱啱」好!
元朗花園水喉漏水
近日，聽聞「呢隻熊」出沒到元朗花園。事緣花園嘅水喉多年嚟出現漏水問題，管理處曾提出近億元大維修方案，但至今仍然爭拗不斷。喺呢個時候，唔係住戶、業主、區議員嘅佢，突然喺Facebook、屋苑群組狂出post，針對呢個屋苑大做文章。唔知佢會唔會又研製到一條唔會漏水嘅喉，去「幫助」花園苦主呢？
亂噏當秘笈
另外，「呢隻熊」2024年又喺社交媒體，唱佢個前助手偷玉佛及盜竊口罩。於是前助手即刻入稟控告佢誹謗，高院頒令禁止佢發表相關誹謗言論、要移除帖文及影片。但「呢隻熊」理都唔理，最後因藐視法庭而被判囚21日，雖獲准暫緩執行監禁令，但仍須支付懲罰性訟費。
財困？
「呢隻熊」除咗「誹謗」纏身之外，佢嘅財務狀況亦都好值得留意。2020年，佢創辦「XX興業」因拖欠＄400萬元被清盤。2021年，佢亦因向前助手借咗40萬無還，而被入稟法院追討。2023年先後被多家財務機構追討逾＄2,000萬元巨債。 2025年，佢又被大埔區區議員入稟申請破產。
「呢隻熊」嘅公司被清盤、債務纏身、賣車賣樓嚟填債、戶口又俾銀行懷疑洗黑錢凍結咗、更有一筆筆因為誹謗而需支付嘅律師費和賠償費……香港地咁多工程，點解佢剩係會關心「億億聲」嘅大工程? 以「工程界英雄」自居，以「監察」為名，肆意「抹黑」，究竟真正目的係乜? 一個經常因「誹謗」受法律制裁，但又無視法庭命令，加上欠債累累，「借錢唔還」嘅人，成日好似幫緊你、幫緊你，為民請命咁，但實際呢? 「呢隻熊」嘅足跡都幾吊詭、巧合喎!
大家𧫴記引「熊」入室，後患無窮，小心！
鍾情局●零零發
