苗僑偉解釋「三哥」名字由來 坦言當年被雪轉戰電影只獲邀做配角感心淡

三哥表示：「我非常樂意人哋叫我三哥。」

苗僑偉（三哥）昨日（9月26日）到新城廣播接受譚玉瑛（阿譚）、何基佑及麥皓兒主持的《QK玉瑛室》訪問，三哥與阿譚相識於80年代，亦是訓練班同學，所以份屬好友，三哥搞笑大爆阿譚花名，「佢以前因為個樣好細個，所以有個花名叫譚十一，永遠都好似11歲，又牙尖嘴利，所以喺呢行屹垃不倒。」

苗僑偉與主持譚玉瑛、何基佑、麥皓兒合照

阿譚問苗僑偉為何會被稱作「三哥」？他稱：「有部電影個角色叫三哥，叫得我最大聲嘅係小黑柯受良，佢離遠見到我就好大聲叫三哥，自始就個個都叫我三哥，叫三哥幾好吖，又穩陣，又唔使做大哥，大哥有事就二哥頂上，三哥最安全，所以我非常樂意人哋叫我三哥。」

阿譚好奇苗僑偉為何會被稱作「三哥」？

入行超過40年的三哥，形容自己的演藝事業分了兩個階段，第一部份是訓練班後加入TVB，但因「五虎將」合約問題遭公司雪藏，「我同劉德華死都唔續約就畀人雪，之後劉德華入咗電影圈有好大成就，我都係發展電影，但就成日畀人叫去客串，當時我有做眼鏡生意，90年代初生意仲唔錯，於是把心一橫唔鬼拍戲，專心做生意，做咗14年，到04年有人買盤，我又有番啲時間，監製梁家樹咁啱搵我拍《學警雄心》，就開始咗我人生第二個世紀，04年復出都依家都二十年。」

三哥形容自己的演藝事業分了兩個階段。

三哥自爆當年復出拍《學警雄心》壓力甚大，「嗰時對住吳卓羲，又係牙尖嘴利，之後又對住黃宗澤、林峯，佢哋同我合作時只係廿幾歲，依家個個變晒中佬，當時拍《學警雄心》好大壓力，好多對白，成頁紙對白我講晒，一路訓話，個身已經濕晒，但又唔可以喺班後生面前失威，『嘩，五虎將又NG呀』。」

阿譚指苗僑偉年輕時不懂取悅女生，性格又木木獨獨，問太太戚美珍喜歡他甚麼？三哥透露跟戚美珍於82年認識，90年結婚，「當年大家都鍾意小朋友就結婚，唔知點解咁早結婚，為咗棵樹冇咗個森林，都係緣份啦！嗰時冇諗過粉絲鍾唔鍾意，我冇劉德華咁勁，佢可以保密幾十年，我保密唔到，橫掂都畀人影，不如公開。」

三哥透露跟戚美珍於82年認識，90年結婚，當年大家都鍾意小朋友就結婚。

現年66歲的三哥永不言休，直言會做到觀眾不喜歡看自己為止，「我又唔會話幾時唔做，有人搵就做，唔使去強求。呢行做咗幾十年，好講運氣、際遇，再講努力，呢行好多人都好努力，但冇運氣同機會；以前好多人埋怨7日7夜冇瞓，又要捱通宵，好多人都好想捱，我自己從來唔會埋怨，接咗工作時，當然最好有時間休息，我會交到好功課，好辛苦時都唔會埋怨，盡量去配合。」

詳細節目內容，請留意9月26日，3-4時，新城知訊台《QK玉瑛室》節目，網址：https://www.metroradio.com.hk/MetroInfo/

新城知訊台節目《放飯ICU》今集邀請到今屆名古屋亞運空手道銀牌得主、為香港摘下本屆第一面獎牌的劉慕裳（Grace），分享備戰心態、日常訓練與人生規劃。對於本届亞運，劉慕裳指很滿意自己的表現，裁判如何判決她控制不了，「我只可以控制自己嘅嘢」。

劉慕裳（Grace）接受譚玉瑛、何基佑及林柏希主持的《放飯ICU》訪問。

回顧今屆比賽，劉慕裳坦言若打不出練習的水準，即使贏了也「好似愧對咗呢塊牌」，但這次比賽就算拿不到獎牌，也沒有愧對自己的準備。她又指，習慣賽後離開，不重溫對手表現；這次決賽過後一段時間便回去準備下一個比賽，「好似返到辦公室返工咁」。她說以前一結束就埋頭苦練，沒給自己休息，腦袋一直繃緊。

她坦言對亞運表現滿意，裁判判決控制不了：「只可以控制自己嘅嘢」。

談到壓力，她直言「壓力係自己畀自己嘅」，而且很大。她並不特別留意自己拿了多少獎牌，「好多都係媒體寫畀我睇」，最希望每次都有進步；壓力太大時，人會被「很想贏」框住。被問到獎牌與表現哪一項更重要，她毫不猶豫回答表現。她亦稱不在乎世界排名，形容一系列比賽「係一個分數嘅遊戲、一個數字嘅遊戲，只要我唔打兩站，下個人可能已經上嚟取代我嘅位置」，而她在乎每場表現及最大型比賽的名次。
她指在美國的日子相當沉悶，練空手道四至五小時便休息，因為休息也是訓練的一部分。她曾壓力大到一出門就要購物，後來驚覺「買唔到嘢就唔開心」這種狀態有問題，於是學懂控制自己。而在比賽前她不會看手機，怕一個新聞報道或評論影響專注。

劉慕裳直言壓力是自己給予，曾大到一出門就要購物，後來驚覺狀態有問題學懂控制。

她指亞運住宿非僅運動員入住，房間煙味大無法更換，其後失聲疑與敏感有關。

談到人生規劃，她稱退役後最直接是教學，希望成就他人夢想。

談到今次亞運的住宿，她形容安排新穎，酒店並非只供運動員入住，出入樓層要出示選手證，連離開房間也要出示。她入住時發現房間有很大煙味，桌上放着煙灰缸，其他隊友的房間同樣無法更換；教練與領隊更被安排入住另一間酒店。她其後失聲，估計與對煙味敏感有關，幸好比賽之後才開始聲沙。她又提到比賽新例，叫喊太久、踏地有聲或呼吸聲太大都會扣分，有伊朗選手因而被取消資格。

問及對她而言最有意義的獎牌，她選世界冠軍，並指 Karate1 Premier League 比奧運更難。至於人生規劃，她說正處於需要重新計劃的階段，暫時未能給出答案；退役後最直接是教學，也希望成就其他人的夢想。她表示結婚生子也是想做的事，但因為壓力太大，日後不會強迫孩子走上空手道運動員的路。

左起：林柏希、譚玉瑛、劉慕裳、何基佑

重溫節目內容，請於10月6日上午11:00登入知訊台《放飯ICU》：https://www.metroradio.com.hk/MetroInfo/