要「和解」都要有仇怨，咁而家同邊個結怨、同邊個和解呀？呢啲人漂白黑暴，想逼政府放生「生果佬」?

近排有人係到講所謂「大和解」，建議政府放生嗰啲因為2019黑暴拉咗而未被起訴嘅年輕人，為成件事劃上一個句號喎，目的係要話比全世界知，香港已經全面復常，係一個包容同多元化嘅社會，好適合營商同投資環境咁話！

呢啲人無厘頭地將刑事案件同經濟發展綑綁埋一齊， 乜放咗做錯事嘅人原來係可以令經濟好，我零零發都係第一次聽，唔通真係「換個角度，總有出路」？

仲有，要「和解」都要有仇有怨，咁而家邊個同邊個「結怨」呀？邊個同邊個「和解」呀？而家好似搞到政府同警察同班罪犯「結怨」，講到政府有責任去「和解」咁喎。喂喂喂，唔好係度輕描淡寫咁講呢啲係「怨」呀！而家係講緊有人犯罪、犯法，係要用司法程序去處理㗎 !我覺得所謂「大和解」，係喺度混淆視聽，係一個偷換概念嘅偽命題！

咁如果要「和解」，都要睇吓呢啲「和解」對象做咗咩事先得㗎，偷粒糖同偷嚿金都有分別喇！根據監警會嘅獨立調查報告，2019年中至2020年頭，香港大大話話有超個300次遊行示威，嗰段期間犯法行為簡直「包羅萬有、無法無天」，包括堵塞道路、掟汽油彈，週街放火，破壞銀行、商店同港鐵站，圍毆唔同政見嘅人，闖入大學實驗室偷危險品、化學品，偷車，試圖搶警槍，包圍警察總部、法院、立法會大樓同機場等等；係香港自1967年以來，最大規模嘅違法同暴力事件！報告又話粗略估計，有超過30間中資銀行、與內地相關或者係支持政府嘅店舖被多次破壞，超過60處政府、警署、警察宿舍同大學受到不同程度嘅損壞，有740組交通燈被打爛，55公里鐵欄被拆走（差唔多係由金鐘政府總部去屯門來回咁長）， 22000平方米 ( 成3個標準足球場咁大）嘅行人路地磚被掘起，破壞咗147個港鐵/輕鐵站，超過1000班航機被取消……仲有接近2000名警員及家屬被網上起底，有警員被咬斷手指、中箭、被淋腐蝕性液體以致全身被燒傷等等。係2019年11月，警方係「你大」搜到3989枚汽油彈（一個人每10秒掟一個汽油彈，都要差唔多掟足11個鐘先可以掟曬），1339件爆炸品、601樽腐蝕性液體同埋573件武器，包括弓箭同氣槍。而係「步大」就搜到8000多枚汽油彈……不過呢啲都只係冰山一角咋！

2019 年11 月新界東交通大癱瘓咗差唔多成個星期，「步大」內地生要警察護送去馬料水碼頭坐水警輪離開，「你大」游泳池用嚟練習掟汽油彈嘅情景仲瀝瀝在目！唔單止咁，暴徒又講好多大話去煽動群眾，一時就話警察係地鐵站內打死6個示威者 (8-31太子站殺人事件，作嘢叻到作埋具體數字)，又話警察對被扣留係新屋嶺嘅女示威者性侵 (吳傲雪事件)，又話警察用布袋彈打盲手無寸鐵示威者隻眼 (爆眼女事件) 等等……通通事後都被証實係大話連篇，目的只係想去分化社會，挑撥暴徒情緒，保持暴亂嘅勢頭！

當時嘅香港，真係好似戰場咁，不但有無辜嘅市民被人用磚掟死、被火嚴重燒傷，而且到處都被破壞。大家係媒體都睇到，暴徒好大部份都係年輕人。如果大家有留意最近宣判嘅所謂「屠龍案」，個班被告人都係廿歲出頭，有一個犯案時都只係得18 歲，佢哋計劃用炸彈「無差別」咁襲擊警察同遊行嘅市民，好彩警察及時拉曬所有人，阻止咗呢件暴力血腥事件，如果唔係，就……一鑊熟！究竟個社會有咩對佢哋唔住，點解對啲平常百姓咁深仇大恨，失去理智咁去做一啲咁殘忍嘅事，去滿足呢啲人的政治訴求呢？

提出「大和解」嘅人，當然就會話啲年輕人當時都係因為社會大環境同朋輩嘅影響，先至會做出咁暴力嘅行為啦，應該比次機會佢哋咁話。 喂， 一個人無論幾大年紀，都要為自己所做嘅事，負上唔同程度嘅責任，冇可能一句「大和解」，就當冇事發生過! 咁樣做，只會俾一個好錯誤嘅信息嗰啲正常嘅年輕人，做錯事將來又會「大和解」可以洗底架啦。對暴徒嚟講，就只係會種大咗佢哋個膽，推佢哋去死！ 

當時係社會有影響力嘅人、媒體、老師、社工，你哋有提醒過班年輕人唔好去犯法嗎？有啲教育、社福界嘅人仲帶班同學仔一齊去掟汽油彈⋯⋯個個著住件背心就話係記者、係急救員，刻意阻住警方行動。有啲人更加英雄化咗佢哋嘅暴行，令佢地更加亢奮同失去理智！難聽啲講，班後生仔嘅失常行為，雖然係俾「犯民」嘅所謂「違法達義」歪理害死，但係「犯民」成年人又唔say no，你哋好大責任呀！終於害到一個又一個大好青年去犯法，去放火、去掟汽油彈、去打人，但係你有冇見過呢班「犯民」嘅仔女有份出嚟搞事？人哋嘅仔女就係草，自己嗰啲就如珠如寶！

再者，法律面前人人平等㗎嘛！夠証據，律政署就會起訴被捕嘅人，不過當時黑暴立立亂，而案件又多，搜証又需時，有啲證人又著草走咗路，所以有人就早啲被告上法庭，有人就會繼續擔保住先囉！所謂「大和解」，咪即係放生啲違法暴徒? 咁咪對啲已經認咗罪，或者係已經被判刑嘅「手足」好唔公平? 而且咁樣做，亦都損害咗香港法治嘅獨立性同公平性！仲有，唔該諗嘢唔好淨係諗一邊，提出同讚成呢個「大和解」嘅人，有冇考慮過受害者同家屬? 所謂「大和解」係咪對佢哋好唔公平、對佢哋係咪二次傷害?！

我零零發覺得提出「一刀切大和解」嘅人，當日直接間接支持黑暴，如今其實係華麗轉身想去漂白黑暴，鋪定路去配合美西方話要寬大處理「生果佬」單案囉！

鍾情局．零零發

鍾情局

** 博客文章文責自負,不代表本公司立場 **

三色台最近慶祝58歲生日，另一邊廂，有一個叫「MK 鳩嗚團」(「鳩嗚團」) 又走出嚟話要慶祝成立4000 日喎。三色台差唔多係陪住香港人長大嘅，咁慶祝年度盛事都好正常吖，但呢個「鳩嗚團」搞到香港污煙瘴氣，又「慶祝」啲咩呢？

要講「鳩嗚團」，就要追溯返去2014年非法「佔中」。當年示威者唔單止佔領中環，仲蔓延到去旺角同銅鑼灣，而有一班激進分子，就以旺角作據點，話要「響應」當時特首鼓勵港人消費嘅呼籲，實質就係借「購物」為名，不分晝夜喺旺角鬧市遊弋，霸街、擺站、搞遊行、嗌口號。「MK鳩嗚團」就此誕生。

「鳩嗚」原本取普通話「購物」嘅諧音，廣東話就係「亂叫」嘅意思。「鳩嗚團」就借呢個諧音，用嚟歧視嚟香港消費嘅內地旅客。當年，「鳩嗚團」唔止封路堵車，仲會喺商舖門口起哄，圍住唔俾市民同遊客入去買嘢。有啲仲離譜，衝入舖頭摷亂啲貨、嚇走顧客，搞到生意癱瘓。啲商戶見到佢哋出現，即刻落閘避禍，點知佢哋又用人肉頂閘，硬係唔俾收舖。老闆唔敢報警，驚被針對，最後唯有啞忍。旺角幾條街就咁俾佢哋攪到亂晒，舖頭無晒生意，員工日日提心吊膽，驚受傷又驚失業，市民行過都要兜路走，成個旺角變咗戰場。當年有間小巴公司因為睇唔過眼，向法院申請禁制令，結果佢哋嘅小巴站就俾「鳩嗚團」盯上，變成「重點攻擊目標」。呢班人三日兩頭走去包圍小巴站、鬧司機、阻住小巴開車，搞到啲返工、返學嘅市民搭唔到車……所以「鳩嗚團」根本就係非法「佔中」嘅延續，變成「流動佔旺」。

「鳩嗚團」唔單止令到啲街坊同商戶叫苦連天，而好多內地旅客一去到旺角，就俾「鳩嗚團」圍住挑釁責罵，有啲仲踢爛人哋嘅行李箱。佢哋刻意針對內地旅客，講白啲，真正目的就係挑撥對立、製造仇恨、撕裂社會！睇翻旅發局數據，發現2015年內地訪港旅客比2014年少咗137萬人。有旅遊公司高層話，「鳩嗚團」喺旺角鬧事，嚴重損害咗香港「好客之都」嘅形象，搞到內地個人遊、旅行團等都對香港卻步，簡直係旅遊業界嘅災難。

到咗 2017 年，沉寂咗一排嘅「鳩嗚團」又再出場。今次佢哋唔再扮「購物團」，而係直接撕下面具，高喊「港獨」口號。佢哋公然反對「一地兩檢」同《國歌法》，又喺社交平台四圍散播謠言，話「中央破壞『一國兩制』」，用假消息誤導香港市民、煽動中港矛盾。而佢哋分化嘅對象，就由一般街頭嘅市民，擴展到殺入大學校園，向學生宣揚「港獨」。

到 2019 年黑暴爆發，佢哋亦都第一時間響應號召，繼續打住「持續抗爭」旗號，喺街頭搞「游擊」示威同論壇，為黑暴造勢。而昔日非法「佔中」嘅老大，戴妖、陳 X 民、前議員「長毛」，都齊齊幫佢哋撐場。

不過，有咗《香港國安法》之後，呢班亂港分子潰不成軍。連「鳩嗚團」嘅頭目錢 寶芬都走埋佬。 不過佢著草去咗英國之後，做咗個反中亂港組織「香港議會」嘅所謂「議員」，仲被香港警方懸紅通緝。原來呢個錢寶芬係退休公務員，佢自2007 年開始，就一邊食政府長糧，一邊搞反中亂港活動，不過佢依家已經被政府凍結咗長俸，我哋唔使再浪費公帑喺呢啲逃犯身上。

「鳩嗚團」一路以嚟嘅軌跡，就好似一塊埋係地底short咗嘅磁石，每隔幾年就挖番出嚟吸啲「爛銅爛鐵」搞事。無論打住乜旗號、用乜手法，佢哋嘅核心圖謀始終如一，就係以挑起兩地對立情緒，煽動市民對特區政府同中央嘅仇恨為主軸，聚人聚戾氣，不斷合理化不當行為！雖然有人講：「今時今日佢哋仲可以搞出咩花樣？」 但零零發就唔係好認同，因為呢班人大有機會有人撐腰，

一旦社會上有咩風吹草動，就會即刻死灰復燃，伺機搞個黑暴2.0。

雖然而家大部份亂港分子都懾於《香港國安法》而潛晒水，但「鳩嗚團」點解仲夠膽走出嚟？ 究竟邊個吹雞叫呢班亂港分子出嚟去試水溫？係匿埋喺香港嗰班黃友搞局，抑或係同嗰件國安通緝犯錢寶芬有關？如果佢有份，係咪幫緊外部勢力做嘢？而搞所謂「慶祝活動」啲錢又係邊度嚟㗎？
究竟邊個，最希望香港再亂一次？

鍾情局●零零發