政事
理工大學學生會昨日搞咗四個新任立法會議員出席論壇，講出位都算游蕙禎啦，佢在論壇末段主動提起「土地問題」，話「 年青人想扑嘢(做愛)都無房」。在沉悶的論壇中，都有令人醒一醒的效果。
論壇本來講起移民審批權問題，游蕙禎建議取消內地來港單程證的制度，由香港控制移民審批權。 她直指港人處於被規劃的位置，生存空間不斷被縮窄。
講講吓游蕙禎羅列年輕人面對的問題，話「 我哋負擔唔起一層樓嘅租價......就算我哋要扑嘢，我哋都搵唔到房去扑，呢個係一個好現實嘅問題架嗎，我哋面對住嘅問題。」
游蕙禎連「扑嘢」問題都公開討論，相當開放。佢建議解決方法係「 我哋一齊要去規劃」，又話自己進入議會後會盡快推動呢件事。大家都好想睇吓佢有乜創意規劃，可以令年青人更加方便。
Ariel
** 博客文章文責自負,不代表本公司立場 **
睇新聞見「梁錦松稱對曾俊華很有期望」的標題，嘩咗一聲，心諗難道松哥已完全放棄爭做特首，改行支持鬍鬚曾去選？
不過睇番內文，原來松哥和鬍鬚曾出席同一個「惜食堂」的活動， 記者問松哥是否支持財政司司長曾俊華參選特首，以及曾俊華是否能團結香港時，松哥咁答， 希望領導香港的人能有效落實一國兩制，帶領香港發展經濟、 改善民生，又引用已故新加坡前總理李光耀的說話，能「 分配財富和創造財富」。
松哥又話，政府很努力工作，但如果社會太撕裂和分化，很多事都做不了。他向站在身旁的鬍鬚曾說對他很有期望。鬍鬚曾則立即回應說，像他昨天在網誌說，香港是很有希望。
記者咁問，鬍鬚曾又在附近，松哥都好難唔話對鬍鬚曾「很有期望」 。唔知記者如今再問松哥會否選特首，佢又會點答呢？
講起鬍鬚曾，而家政界飯局一個流行話題， 就係鬍鬚曾會否辭職參選，有高人話，雖然好多人幫鬍鬚曾抬橋，但以他比較恬退的性格，若無阿爺祝福，唔似會夾硬出來選， 暫時不似會辭職。講到辭職，可能葉劉辭行會成員夾硬去馬，機會仲大啲喎。
