黃媒換咗個身份，繼續佢哋嘅「孽」績

最近睇衙門消息，發現原來生果報同當年黑暴、47個顛人案有密切嘅關係。 咁諗住呢張生果報摺埋咗，大家可以有啲安樂日子過，但我零零發最近發現呢班生果報嘅人，已經喺唔同嘅媒體繼續佢哋嘅「孽」績。所以大家尤其係有仔有女嘅老友，千祈唔好掉以輕心，否則，就會好似當年咁，中咗生果毒2.0。

以下係我零零發對呢啲「新」媒體嘅「明星班底」，以及報導手法嘅資料搜集同觀察，不喜勿插，同埋唔好自己對號入座呀！

「法庭路」

「法庭路」嘅創辦人陳X婷同陳信X兩個都係前「臘腸新聞」記者，當年生果報摺埋個陣，「臘腸新聞」就接收咗佢好多員工，所以嚟嚟去去都係同一班人！

我零零發發現「法庭路」成日都有生果佬單案嘅獨家料，首先喺2023年年頭，生果佬嘅本地律師團隊發聲明澄清，話而家成日喺外國嗶哩巴啦嘅所謂黎智英國際律師團隊，唔係代表生果佬。當時全香港嘅傳媒都攞唔到呢個資料，只得「法庭路」有！另外，嗰個外國假律師團隊又周圍講懲教署拒絕生果佬領聖體，話佢有糖尿病又冇適切嘅治療，又冇得曬太陽，影響佢身體健康……咁啱得咁蹺，生果佬嘅本地律師團隊喺9月27號又出咗個聲明，話無咁嘅事。嗰日「法庭路」喺其他傳媒都冇呢個資料嘅時候，就搶先出咗呢單料！

點解好似所有第一手資料都係喺呢個「法庭路」出現？似乎只有「法庭路」有渠道可以直接攞到生果佬嘅獨家消息，究竟係佢哋叻叻豬，抑或有其他原因？

雖然呢個「法庭路」係主打報道法庭消息，好似好中立，但佢報導嘅手法其實㗳落有味，好似最近單「屠龍案」，14個被告有7個認罪，1個被告審訊之後被定罪。呢班罪犯係犯咗一啲好嚴重嘅暴力行為，罪有應得！但係「法庭路」竟然用「無人經審訊定罪」嚟形容呢7個認罪嘅被告。我零零發喺度同大家分享一下法庭知識，其實當一個罪犯被告上法庭開始，佢已經係進入咗司法程序，每次上庭都有法官同控辯雙方律師，評估案情同埋證據去保障佢，所以唔係你話認罪，就俾你認罪咁兒戲㗎！好明顯「法庭路」係蓄意咁樣寫個標題去斷章取義，混淆視聽！另外佢寫「冇人受審後以反恐條例定罪」，我唔可以話佢錯，因為審訊之後定罪嗰個被告，係以「刑事罪行條例」被定罪嘅。大家點睇佢報道新聞嘅手法同角度? 係咪別有用心去誤導一般嘅讀者？

「閘智社」

另一個都非常關注生果佬嘅黃媒就係「閘智社」。佢哋兩個創辦人，分別係做過生果報同「臘腸新聞」嘅採訪主任雷X樂；另一個就係前港台編導蔡X玲，佢2022年免費去美角「哈罰」進修遊埠之後，無幾耐就搞咗「閘智社」，唔知呢間嘢有乜人支持呢？

2023年10月，「閘智社」係 「7.21」暴動案審訊前，就發佈咗涉嫌同審訊有關嘅閉路電視片段，法官都好關注會唔會影響案件嘅審訊，叫咗警方睇下有冇人違法！

而佢哋係今年6月又訪問咗朱X明，呢個人除咗當年搞非法佔中之外，又聽聞曾經幫啲暴徒逃離香港，佢係2020年就走咗佬，而家喺外地風流快活，但佢就叫啲香港年青人「唔好放棄」，呢啲咪完全係「叫人衝，自己鬆」嘅作風囉！

呢間「閘智社」嘅報道手法同風格，都好值得商榷囉！

「停看」

據黑網資料，「停看」相信係由前前生果報高層和高級記者創辦，部份人曾搞「眾News」。

「停看」特登揀「眾News」停刊一周年嘅時候成立，我估計係諗住用佢哋嘅舊名氣嚟吸睛，並且以「法庭新聞」作幌子，利用黃營人士對所謂「抗爭」、「同路人」、「真相」等「不割蓆」心態，透過訂閱係黃圈繼續眾籌吸粉……

「瘋顛乾十九角度」

係網上有個「瘋顛乾十九角度」專欄寫手「瘋顛乾」，以前係生果報同「大幾元」嘅御用筆手。根據生果佬案嘅從犯證人講，「瘋顛乾」曾經提議生果佬搞生果報英文電子版，之後又喺專欄話生果報要搞八卦式公義同走國際文宣線，總之就娛樂新聞政治化、或者政治醜聞娛樂化……生果佬個人咁自大都聽佢話，可見佢哋嘅關係真係唔簡單！另外作為「大幾元」御用寫手，「瘋顛乾」係咩立場，唔使零零發講出口喇卦！

係今年2月，「瘋顛乾」就寫咗篇《在囚人士可以反對嗎？》文章，批評《維護國家安全條例》諮詢文件中，話國安犯坐監要得到懲教署署長相信，早啲放佢監唔會影響國家安全，先可以減刑，係剝削囚犯權利喎！我零零發想講，先唔好話犯咩罪坐監，提早放監本身都唔係必然㗎啦！囚犯係可以因為行為良好而減刑，但唔係老馮要減刑㗎！

最近喺9月，佢又配合美西方刊登咗一篇《共看明月應垂淚》文章，話生果佬坐監冇得領聖體、冇曬人權，又講到好似未審先判，坐咗3年9個月冤獄。喂喂喂，生果佬係犯咗詐騙罪被法庭判監5年9個月，佢仲未坐完嗰單案刑期喎！

「瘋顛乾」身為「御筆」，無理由寫文之前唔去查吓資料；佢咁都寫得出，心照不宣啦！

新聞傳媒被形容為係行政、立法、司法三權之外，社會嘅「第四權」。傳媒嘅「天職」應該係以真實、客觀、公正嘅原則報道，盡力確保報道正確無誤，但係呢啲所謂嘅「天職」近年已經被黃媒騎劫，為求達到政治目的，以惡意剪裁、顛倒黑白、無中生有、斷章取義嘅報道手法，去挑動公眾情緒，製造社會不滿和對立。雖然好多黃媒已經樹倒猢猻散而相繼停刊，但好似同生果報有直接或間接關係嘅「法庭路」、「閘智社」、「停看」同埋「瘋顛乾十九角度」等等，仍然死心不息，繼續佢哋嘅「孽」績，或者諗住用黃媒嘅身份，繼續喺黃色經濟圈搵真銀！

鍾情局．零零發

鍾情局

** 博客文章文責自負,不代表本公司立場 **

最近有老友睇完新聞紙之後問我零零發，點解香港嘅嘢會係美國立法，點解推動香港民主嘅組織會係華盛頓設總部？究竟呢啲係美國人嘅事，定係中國人、香港人嘅事呢？

老友講緊嘅3條法案係：《香港人權與民主法案》，《香港民主自治法案》同埋《香港經濟貿易辦事處認證法案》；講嘅組織就係「香港民主委員會」（HKDC）。而家等我簡單講吓啲法案先：

1. 《香港人權與民主法案》

係由美國國會及行政當局中國委員會(CECC)提出，再經美國國會通過，由美國總統簽署成為美國嘅聯邦法律。條法案嘅目的係聲稱為重新履行對香港自由民主嘅歷史承諾，同埋建立懲罰機制，針對中國同香港壓制基本自由嘅政府人員。呢條法案2014年佔中期間首次提出，但直至2019年9月先通過。（點解咁啱係2014、2019 年嘅？）

2. 《香港自治法案》

由美國參眾議院提出，經美國國會通過後，由美國總統簽署成為美國聯邦法律，條法案喺2020年7月生效，授權美國政府以金融制裁方式，懲罰實施《香港國安法》嘅中國及香港嘅政府人員、以及鎮壓「2019 年示威者」嘅香港警察同埋同佢哋有業務嘅實體（簡單嚟講，包括佢哋用緊嘅銀行），制裁手段包括凍結資產、拒絕入境美國、禁止向美國金融機構借貸、禁止銀行交易等。

3. 《香港經濟貿易辦事處認證法案》

香港經濟貿易辦事處其實係殖民統治年代已經存在，佢哋主要工作係增進當地具有輿論影響嘅人士(包拉工商界、政界同媒體)對香港嘅認識，以促進香港嘅經濟同貿易利益。經貿辦係可以享有外交禮遇，包括處所、來往公文和公務檔案及文件不得侵犯……美國眾議院係2024年9月通過咗呢個認證法案，而行政當局就需要檢討設於華盛頓、紐約同三藩市3個經貿辦嘅特權與豁免權，如果認為經貿辦唔應該再享有外交待遇，相關經貿辦就要喺180天內停止運作。之後暫時未見美國行政部門有何決定。

而有份大力推動呢幾項反中亂港法案嘅幕後黑手，係一個叫「香港民主委員會」（H K D C）嘅組織。呢個「香港民主委員會」喺2019年9月黑暴嘅時候，由一班係美國嘅反華同埋台獨分子喺華盛頓成立嘅，而成立嘅目的就係幫美國整條反華「國際線」。HKDC班人係打住「支持香港自治」嘅旗號去趁機搞「港獨」！當時嘅總監係朱X民，佢係邊個我就唔識，但係我知佢老豆就係「佔中三醜」嘅朱X明；而佢哋嘅成員個個有名有姓，包括佔中逃兵週圍骯、黃痴瘋、衣冠聰、歌女河粉詩、黑暴勇武派頭目張昆羊……呢班人唔係周圍去抹黑香港、推銷「港獨」，就係日以繼夜咁去游說美國國會推動亂港法案……

當時朱X民俾人踢爆咗佢俾咗美國參議員一張144個 「中國及香港制裁人員」嘅名單，於是佢被特區政府以違反《香港國安法》通緝，呢個無膽鬼二話不說就喺facebook宣布辭去HKDC總監一職，連交代一聲都冇，睇到連啲黃友都忍唔住要笑佢「畏罪散檔」。不過佢跌落地都要揦返拃沙，話自己喺美國生活咗好多年，拎埋綠卡，覺得特區政府通緝佢好荒謬喎! 我零零發其實覺得佢荒謬先真，佢既然係無「根」（係香港出世，但唔認係香港人），咁就安心做個美國人，唔好成日對香港指指點點啦！

而HKDC新任總監郭X儀，又係一個2020年著草去咗美國嘅黑暴逃兵，都係靠搞反中亂港起家，同樣係特區政府懸紅百萬嘅《香港國安法》通緝犯！ 佢曾經聯合多個反中亂港組織舉辦所謂「香港峰會」，仲要請埋美國家民主研究所（NDI）、前國務卿蓬佩奧同埋FBI出席活動，話要推廣香港民主運動，同傾下發展方向咁話喎……

睇完呢幾條法案，我都覺得好好笑，乜我哋香港係屬於美國㗎咩，點解好似係佢哋管緊香港咁嘅？咁得閒管我哋，不如去處理吓佢哋自己啲「零元購」先啦，服務吓大美國國民，起碼等啲美式大超市可以安心開番舖，唔駛日日擔心俾人入去搶嘢啦！至於嗰個聲稱要「撐香港」嘅「香港民主委員會」，我係咁噏咗幾個名出嚟，大家都知佢哋「一啲都唔簡單」，所謂民主嘅人士其實全部都係過街老鼠，佢哋改名叫「香港逃犯協會」仲貼切啦！各位老友，唔該唔好再俾呢啲個名「懶正義」嘅組織呃啦！

美國實行霸凌主義，已經將中國列為頭號敵對國家，而香港就正正係佢哋打擊祖國嘅一個好好嘅平台。我哋係香港生活得好地地，但無端端俾人搞，我諗係人都會好嬲！仲要俾一班賣國賊，去幫美西方國家去打壓我哋祖國、打壓香港，不但想搞垮我哋嘅經濟，仲成日借啲意挑撥大家情緒⋯⋯咁樣嘅民主，你要埋我嗰份喇！

點解我哋香港嘅經濟，香港嘅自由，香港嘅將來，要俾呢班都唔係喺香港生活嘅逃犯、外國政棍喺度搞搞震？！講真吖，關你哋乜事？！

鍾情局．零零發