「許至瘋」講大話已成為強逼症 展開小學雞流亡之旅

我零零發喺2024 年收到嘅最後一份大禮，莫過於上星期保安局再通緝6名國安逃犯，同埋將之前通緝緊嘅7個逃犯列為「指明潛逃者」，被實施4項措施，包括「撤銷特區護照」、「禁止提供資金等或處理資金等」、「禁止與不動產相關的某些活動」、「與涉及有關潛逃者的合資企業或合夥相關的禁止」。

呢班潛逃者其中一個就係「許至瘋」，我零零發想趁呢個機會講吓呢隻小學雞嘅事件簿，同埋究竟呢4項措施係乜東東、關大家咩事?

「許至瘋」喺「乘大」畢業之後， 1999年就加入咗「白鴿黨」。喺2011年，佢當選為中西區區議員；2016年就以中西區區議員嘅身分，比「白鴿黨」保送佢入咗立法會，開始佢靠呃、靠搶嘅「顛瘋」事業。

小學雞事件簿

講真，作為區議員，我零零發唔覺佢有咩功績，或者為市民大眾成功爭取過啲咩，佢只係喺政壇呃飯食，以瘋癲激進、嘩衆取寵嘅方式吸睛、吸選票，終極目的係去吸真銀!

首先，「許至瘋」經常喺區議會碌地吵鬧，搏記者幫佢宣傳。喺2014年3月中西區區議會公民教工作小組會議，「許至瘋」因為不滿主席唔準記者列席採訪，就喺度吵吵鬧鬧，之後又踢傷兩名保安。「許至瘋」最後被控兩項普通襲擊罪，不過呢單case俾佢打甩咗。自此，佢更加肆無忌憚，變本加厲！

2018年4月，立法會審議緊《高鐵一地兩檢條例草案》，「許至瘋」當時強搶保安局一名女行政主任手上嘅文件同埋手機，仲衝入男洗手間內17分鐘，偷睇曬部電話嘅內容先至出嚟，嚇到個女仔喊曬! 警察之後告佢「普通襲擊」、「有犯罪或不誠實意圖取用電腦」以及「阻礙公職人員執行公務」，全部罪名成立。

同年5月28日，立法會進行《國歌條例草案》二讀嘅時侯，「許至瘋」走到會議廳台前放下腐爛盆栽，6月4日續會時，又同另外兩個嘍囉投擲有濃烈臭味嘅嘢，導致會議暫停。警察以涉嫌違反《立法會（權力及特權）條例》嘅「藐視罪」，以及《侵害人身罪條例》嘅「意圖使他人受損害、精神受創或惱怒而施用或企圖施用有害物品」罪拉咗佢、告咗，不過件案未審佢就著咗草……

當年立法會規則管束寬鬆，所以先至縱容到「許至瘋」嘅失心瘋行為。大家如果有留意最近澳洲有個女議員索普（Lidia Thorpe），喺參議院大叫幾句，已經俾人暫停職務，但比起「許至瘋」嘅惡行，簡直喺小巫見大巫。如果「許至瘋」啲衰嘢喺澳洲參議院發生，相信佢已經無得撈喇!

係2019年法律年度開啟典禮，「許至瘋」又公然係嚴肅、莊重嘅典禮上舉牌示威，破壞秩序；唔單只咁，佢仲係社交媒體聲稱:「於莊嚴的典禮上揭穿荒誕」。不少網民就直言，說到荒誕，應該沒有人荒誕得過衝擊議會、搶人手機、經常失控的「他」了。

讀法律出身嘅「許至瘋」，喺2021年立會選舉嘅時候，又公然煽動選民違法投白票，關照多個轉發佢帖文嘅手足干犯刑法，加入「人生更精彩」行列，而佢就被廉政公署通緝緊！

大話精

到咗黑暴期間，「許至瘋」又四圍撩事鬥非，煽風點火，強項喺叫人衝，自己鬆，唔少年輕手足比佢點，身陷囹圄。雖然佢都比警察告咗上法庭，但大大聲聲話無畏無懼嘅佢，竟然夾埋兩個丹麥國會議員做假，訛稱出國開「氣候會議」，呃法官俾佢保釋，輾轉同家人會合，潛逃澳洲。期間仲同嗰兩個丹麥國會議員嬉皮笑臉，將合照放上社交媒體，慶祝騙局成功。佢擺到明視法律如無物喇！

經歷「許至瘋全家大暴走」一事，大家應該更理解攬炒派點解咁賣力反對《逃犯條例》了，原來除咗政治炒作、利用無知支持者外，也的的確確關乎自己切身利益，因為佢哋知道自己成日做犯法嘅嘢，自己都要為做逃犯做好準備！

痴呆呆走埋一枱

最近，澳洲律師公會更同「許至瘋」一齊扮痴扮傻，發牌俾呢個案底纍纍嘅通緝犯，成為當地執業律師。偽民主國家嘅虛偽荒謬，可以用「厚顏無恥」去形容。當然俾個牌你就要做嘢，「許至瘋」最近出席一個「澳洲戰略政策研究所」討論會，大力抹黑香港司法。另外，佢仲夠膽死讚澳洲港人組織，成功追擊在香港做緊終審法院非常任法官的澳洲法官祈顯義!  話晒都係人哋地頭，你哋班香港黃人大晒呀？你哋知唔知道已經得罪緊啲澳洲人，同埋澳洲嘅司法界呢？睇下你哋幾時要找數喇!

最近「許至瘋」又懶叻咁話加入咗「澳洲自由黨」，唔好以為加入咗啲政黨，就好似當年喺金鐘立法會咁有「金鐘罩」護身先得㗎，當你冇利用價值嘅時候，都係同condom冇分別，用完即棄!

不離不棄呃likes呃錢

畏罪潛逃去澳洲之後，「許至瘋」仍然成日喺社交媒體發噏瘋，唔係話俾人潑水挑釁，就對香港嘅事指指點點，由2023年香港嘅暴雨，到戰友林卓廷721案、47人顛覆案、屠龍小隊案嘅判刑，又要求制裁香港法官、檢控官等等。你咁關心香港就返嚟啦，唔好成日喺出邊噏三噏四。咁其實佢點解咁關心香港？無他嘅，佢要保持自己嘅熱度，呃like呃錢，同埋等啲紅鬚綠眼以為佢喺香港仲有影響力、有支持者，咁佢咪繼續可以有存在嘅價值囉！

小心，唔好誤墮法網呀

頭先講到7個「潛逃者」被實施4項措施，咁究竟又係咩嚟嘅呢？除咗第一項「撤銷(潛逃者)特區護照」之外，另外嗰3樣同大家都好有關係。簡單嚟講，如果你同呢班「潛逃者」有任何嘅資金往來，例如: 捐錢去佢哋個眾籌、同佢哋有業務往來、租售樓宇、或者聯絡、幫佢哋處理任何事情，甚至乎對佢哋喺社交平台嘅言論，留言支持或轉發佢哋訊息，都有可能觸犯《國安法》或《維安條例》當中嘅煽動罪。所以大家要小心、小心、再小心，千祈唔好再信佢哋亂噏，誤墮法網呀！！

講返呢隻小學雞，佢話特區護照被取消係「意料中事」，仲批評特區政府做法「愚蠢」，話咁樣會令到啲民主國家，會更有理據俾政治庇護或難民身份佢喎；又話特區政府嘅行動，唔會影響佢澳洲律師資格，同埋佢嘅資金亦不會被切斷咁話⋯⋯咁大家又放長雙眼，睇吓究竟邊個先係「愚蠢」，你只係寄人籬下，冇話事權㗎! 而家好似樣樣都冇乜問題，但係你睇唔睇到，中、澳之間嘅關係已經喺度微妙轉變緊？！「中澳龍蝦貿易」上個月都重啟咗啦，話唔定你可能好似澳洲龍蝦一樣，係可以用嚟trade 㗎！可能到時你嘅下場，亦都係我哋嘅「意料中事」!

「許至瘋」而家拎住著草嗰陣呃返嚟嘅眾籌，喺外國搵埋啲逃犯老友歎世界，吹噓自己打國際線嘅功勞，以前就叫兄弟努力爬山山頂見，難為啲兄弟真係聽佢噏，最後只是(監)倉底見。佢而家就話自己會為踎監嘅戰友祈禱，幾荒謬！

網傳某君的外母。

網傳某君的外母。

另外，線人話俾零零發知，「許至瘋」一家喺澳洲身光頸靚，去到邊都有達官貴人招待，但外母就獨留在港，要靠執垃圾為生呢！ 一個連對自己外母都可以咁無情嘅人，竟然喺澳洲嘆住紅酒，話要為香港人爭取理想？！一個咁粗鄙、無恥嘅偽君子、孭住10幾單case嘅逃犯大話精，大家仲信佢？！ 

鍾情局．零零發

鍾情局

** 博客文章文責自負,不代表本公司立場 **

12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。

我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。

「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。

「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！

其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。

「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。

其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。

翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。

「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！

我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！

所以大家與其擔心條紅線係邊，不如小心唔好踩到條黃線仲緊要喇！

鍾情局•零零發