新一年睇到單新聞，話提出司法覆核、要求推翻環保署批准新田／落馬洲發展環評報告嘅轉世「司法覆核抽水王」，「守護大嶼聯盟」召集人「謝曬杰」，被揭發過去呃緊政府嘅津貼，大家覺得係咪有啲似曾相識嘅感覺呢？
冇錯，我零零發即刻諗起長週覆核王「葛卓堅」，佢由一個長洲嘅阿伯，被反對派政黨捧紅，突然成為爭取種種無厘頭社會公義嘅代表，佢（或者佢背後嘅政黨）事無大小，只要係同政府有關嘅施政項目，就會求其搵一個所謂公眾利益嘅藉口，去法庭申請司法覆核，當中包括反對政府「即到即殺」感染非洲豬瘟豬隻嘅措施、覆核特首有否違反就職誓言等等。佢過去10幾年提出咗成90次司法覆核！
如果係有意義嘅司法覆核，我零零發唔會咁大反應，但係10幾年有90次嘅司法覆核，有冇濫用呢? 翻查啲新聞紙，「阿葛」咁多次嘅司法覆核，只有3次被判得直或部份得直，可想而知佢提出嘅理據有幾薄弱！ 就好似最近終審法院前法官烈顯倫寫嘅一篇文章，話喺2014年，「阿葛」要求頒令「撤銷」特首向北京提交嘅「2017年行政長官及2016年立法會產生辦法」同埋「關於修改行政長官和立法會產生辦法」嘅報告。不過係「阿葛」申請前一個月，特首就已經交咗報告俾自己老闆，法官點樣「撤銷」啲報告呢？成件事根本超出法庭嘅管轄範圍!更離譜係，單司法覆核都未批，佢就已經由資深大律師「白頭李」加另一名大律師代表，先打一場官司，講應唔應該批准佢個申請?!而特首就由一個資深大律師同兩名大律師代表；加埋法官、法庭工作人員，咁多人開庭要用幾多錢？真係未見官就先打80，最後，法官咪又係唔批佢個司法覆核申請!
講番佢哋嘅司法挑戰，原來一毫子都冇比過，佢哋每次都用年紀大、收入少（自稱）為理由，去申請法律援助。喺香港法庭審理一單司法覆核案件要使幾多錢？大狀老友話，一邊的資深大狀打一日官司律師費都收30萬，成單官司過百萬閒閒地，拖得長嘅可以幾百萬！過去10幾年，「阿葛」一共拎咗幾多錢法援我check唔到，我淨係知道全部都係你同我去找數嘅！我零零發覺得都係時候同佢哋計吓數喇！
網上流傳的圖片。
高人話我知，原來申請法律援助打刑事案，申請人唔可以揀自己律師，但係啲民事案(包括司法覆核)，係可以搵自己個啲律師friend去打，呢啲係咩嘢世界呀?！上庭嘅最低消費套餐，就係雙方各有一個律師，加埋法官（好似頭先嘅例子，就動用咗5個大律師/律師），咁你話過去咁多年，「阿葛」個啲無厘頭官司，用咗我哋納稅人幾多錢？益咗佢啲friend幾多生意？高人仲話，佢每次申請法援，好多都係俾咗同一間律師事務所處理，就係當年喺立法會開會期間，睇AV嗰個「AV仁」有份嗰間。反政府，仲可以喺政府度攞返高昂律師費出糧，係咪好筍呢？唔怪之得「阿葛」密密做司法覆核代言人啦，原來個關係咁微妙嘅！
「阿葛」司法覆核嘅案件絕大部分都被法庭評為毫無理據。所以法律援助署喺2017年9月，就禁止咗佢3年唔可以申請法援去提出司法覆核。雖然係咁，到 2020年為止，「阿葛」已經因為4宗案件敗訴，起碼拖欠政府逾156萬元訟費，但佢又詐傻扮懵話冇錢俾，咁高院唯有頒令佢破產，咁即係又唔使找數，搵我哋納稅人笨囉！
一個長州阿伯、一個大嶼山阿叔點解咁熱心司法覆核? 線人話「葛卓堅」背後係白鴿黨同工民黨，而「謝曬杰」背後係香港所謂嘅本地環保組織。呢兩個派別有個共通點，就係不斷以一啲所謂普世價值，例如：民主自由、保育意識去「迷惑」公眾，將啲法例、政策妖魔化，藉此發酵議題，去分化市民同政府，製造社會矛盾，跟著建議一啲全世界都做唔到嘅國際標準去「規範」政府，更利用司法制度去窒礙社會發展。不過平息2019大亂之後，工民黨退場，加上「阿葛」誠信破產，所以反對派要嗱嗱臨洗底換代言人，由所謂本地嘅環保組織接棒，由長洲阿伯變成大嶼山阿叔，由「阿葛」轉世「謝曬」。換咗人，但係橋段都係一樣！
佢哋滿口仁義道德，口口聲聲要代表香港人爭取公義，但其實睇番佢哋自己嘅行為，又真係貪心嘅真小人。兩個都話自己冇乜收入，一方面申請法律援助去濫用司法程序搞搞震；另一方面就涉嫌隱瞞個人入息及資產，去呃哩呃路。「阿葛」早年已經因為詐騙罪坐過幾年監，之後又因妨礙公職人員執行職務入罪，而家仲有單呃公屋、呃綜援嘅case在身。而「謝曬」係一個基督徒同社工，但社工嘅嘢就唔多做，專搞社運響朵，喺2014年非法佔中同2019年黑暴期間，佢有份鼓動教徒同青少年走上街頭，唔知身受其害嘅家長知唔知呢？佢而家仲係啲大學度撈緊嘢，月入過萬(啲大學係咪要檢討吓請人嘅標準呢？)。一個咁資歷深厚、經驗豐富嘅所謂「社會工作者」，應該好清楚申請政府福利嘅門檻、應該好清楚知道自己每個月嘅收入，已經超出申請限額，咁都夠膽死去申請輪候公屋津貼、長者生活津貼……我零零發計返條數，過去咁多年，香港嘅納稅人都補貼咗佢哋唔少血汗錢！
「阿葛」同埋「謝曬」挑機嘅手法都熟口熟面，明眼人都應該睇得出背後一定有一啲不可告人嘅勢力，操控緊佢哋同成件事。我零零發希望聰明嘅香港人，唔好再俾呢班扯線公仔愚弄，拖慢我哋香港嘅發展，仲要嘥晒我哋嘅錢！
你哋呃完一次又一次，真係當我哋傻㗎？！
後記: 我零零發最近聽聞有個羈留緊嘅大狀，成日都去申請法律援助打官司，但最吊詭係，佢所有刑事案就自己親自上馬，有晒功架；但係啲民事案可以申請法援，佢就申請法援，搵其他律師幫佢上庭？我唔明，大家明唔明呀？
鍾情局．零零發
鍾情局
** 博客文章文責自負,不代表本公司立場 **
最近俾「生果佬」單案提醒咗我零零發，「民主阿婆陳四萬」，已經冇公開露面好耐，唔知佢最近點呢？ 既然生果佬咁回味同「阿婆」喺黑暴時候並肩作戰嘅日子，咁我一於用零零發視角，去翻吓「阿婆」嘅舊賬啦！
「阿婆」已經80幾歲，佢係內地出生，8歲跟家人定居香港，由細到大都係西方文化嘅氛圍下長大、接受英式教育，喺大學主修英文同英國文學。大學畢業後，就加入政府做政務主任，公職生涯做過好多部門，包括社會福利署、經濟司、布政司，退休前官拜特區政府政務司司長。「阿婆」嘅仕途都算順風順水，加上有些少家底，咁當年一般人就以為佢好勁。
「阿婆」最出位嘅公職莫過於1986年嘅「郭亞女」事件，當時佢係社會福利署署長，有一個患有精神病嘅阿媽，將自己個女「郭亞女」囚禁係住所，「阿婆」決定破門入屋強行解救「郭亞女」。平心而論，呢件事嘅處理方法好壞參半，但係當時輿論一窩蜂質疑當刻破門入屋有冇必要，同埋話「阿婆」霸道、越權同侵犯私隱，指責佢只係想邀功出位！不過當年係殖民地統治，港督一句話撐佢，咁所有人就靜曬啦。 呢件事之後，「阿婆」就去咗英角國防研究院深造同改造，隨即升埋級做經濟司。佢放洋留學之後，樣樣都「英角優先」，先係1992年放棄公開招標貨櫃碼頭經營權，直接將個權交咗比英資公司；而喺回歸前，佢又配合末代港督嘅政改方案，改變當時立法局同區議會選舉制度，為亂港種下禍根。
講開又講，其實係1997年回歸前，英角的確係想捧當時巳經係第二把交椅嘅「阿婆」做第一屆特首。為咗令佢得到香港人同埋西方人接受，當時嘅外藉新聞處副處長仲做咗佢形象顧問，教佢着旗袍嚟突顯東方女性嘅特質，令到外國人更容易接受。另外就係塑造佢成為一個親民、笑容可掬嘅官員，所以要「阿婆」返屋企對住個鏡，練習「四萬式」嘅笑容！佢過去係唔識笑嘅，黑口黑面，唔信你睇返佢係「郭阿女事件」嘅新聞片，當時「殺死人」嘅樣，同後期着旗袍個四萬樣，簡直係兩個feel 啦。所以大家見到後期嘅「阿婆」，只不過係俾英角人set出嚟嘅「人設」而矣，唔係真㗎！ 不過呢個英方嘅「人設」特首候選人，最後因為末代港督單方面攪政改，激嬲咗中央政府，以致英角嘅如意算盤打唔響啫！
「阿婆」俾人捧為香港鐵娘子，令佢嘅野心更澎湃，唸住十拿九穩做硬特首，點知甩腳，佢只係做到千年老二就梗係唔開心喇，受過英角恩惠嘅佢，於是就索性擺名車馬做外力「代理人」。係回歸初期，佢對興建跨境大橋同24小時通關問題上模棱兩可，拖慢晒個發展，新機場啟用時又攪到大混亂！喺2000年，有間拍賣行打算拍賣喺圓明園被偷走嘅國寶，當時中央政府強烈反對，但「阿婆」一意孤行，話係正常商業活動，冇理由阻止咁話！
由於「阿婆」係一個權力野心非常大嘅人，令人覺得當時特區政府出現咗兩個「話事人」，影響到特首董伯伯執政。於是2000年尾佢被邀請返北京「述職」，「阿婆」以為成功謀朝篡位，點之見完港澳辦老闆之後頭耷耷、眼紅紅，冇晒Mood，仲要喺後門走，等班特登係香港飛去採訪嘅記者白等一場！ 佢返咗酒店敷咗個mask之後，到夜晚先至勉為其難、強顏歡笑同啲記者飲杯茶、食個包！
喺大約半年後，「阿婆」被逼宣佈提早退休。之後佢就利用自己係政界嘅影響力，更加肆無忌憚咁同中央對著幹。 2002至2005年期間，「阿婆」多次係外媒發表佢對香港政改同「一國兩制」嘅謬論。係2007年又經補選做咗立法會議員，係議事廳帶領班反對派就住各種民生議題阿吱阿咗，又去參加「撐普選」遊行，被外界話佢「忽然民主」！不過呢個「阿婆」係遊行途中「快閃」去咗恤髮，成為政圈一大笑話，係人都睇得出佢只係想做show，好肉酸囉！
「阿婆」做咗8個幾月立法會議員就話自己年紀大要引退，但實際係想更無拘無束，孖住「生果佬」咁去深度參與反中亂港嘅惡行！當時有網民篤爆，話「阿婆」分別係2013年6月至2014年2月，分3次收咗「生果佬」350萬去創立「香港2020」政治組織。表面上就係推動香港民主發展(落實2017年普選行政長官同埋2020年立法會普選咁話)，實際上係俾「阿婆」做經費周遊列國去唱衰香港。2014年4月，佢就高調地同「白鴿黨」元老白頭李出訪美角，得到當時副總統拜登同副國務卿伯恩斯接見， 3個月之後，又同白頭李又再去咗英角一轉，冇耐「佔中」就發生啦！
經過嗰幾年，明眼人都睇到「阿婆」嘅政治取態。咁話說2016年北面有一個領導人，釋出善意嚟香港見「阿婆」同班犯民，這邊廂班犯民友惡形惡相見領導人，最後俾領導人超時特(別)訓(話) 成粒鐘，個個面懵懵！ 但那邊廂到第二朝，「阿婆」就四萬咁口著靚靚去同領導人大合照。嘩，呢班人真係左右逢源，而「阿婆」更盡顯雙面皇本色！
到咗2019年3月，政府提出修訂《逃犯條例》，「阿婆」又急急腳咁同白頭李等人飛美角與時任副總統彭斯同民主黨領袖佩洛西高調見面。兩個月之後，「阿婆」又帶隊去德角同官員與政客見面，游說大家支持香港抗爭去爭取民主。冇幾耐，黑暴咁啱又開始啦！
黑暴嘅時候，「阿婆」又公開鼓勵公務員遊行示威，(企圖癱瘓特區政府)，又四出幫「生果佬」泵水嘅「重光團隊」成員穿針引線去見英角駐港總領事，又同白頭李頻頻去見美角駐港總領事……一個7、80歲嘅阿婆咁忙為乜呢？總之一句，咁多巧合就唔會係巧合啦！ 所以「阿婆」係「佔中」同「黑暴」嘅角色，都好值得重新評估啊！
唔好睇「阿婆」個「人設」好似係社會上嘅精英，其實佢同屋企人都有唔少醜聞。有線人報料，係1993年樓市起飛嘅時侯，時任布政司嘅阿婆，被揭發以780萬買入港島半山豪宅，低於市價二百萬之餘，又利用財技攞到十成按揭(當時500萬元以上嘅豪宅，按揭貸款係唔可以多過樓價七成)，佢又用公司名義俾少啲印花稅。雖然有高人話「阿婆」嚴格上冇違規冇呃政府錢，但老實講，佢就係用盡所有方法去「賺到盡」！ 當時好多人嘈，話要調查佢，但係件事最後唔知點解不了了之？！身為一個政府高官，乜唔係應該要比白紙更白、比清水更清咩！
至於「阿婆」嘅阿哥「方律師」，係1999年嘅時候因為租客冇交租成六年，於是搵人收番個單位而揭發咗一宗命案。江湖傳聞呢個租客其實係「方律師」包養嘅模特兒情婦，佢被發現嘅時候，剩係得返副白骨，估計死咗成四年，當時都好轟動㗎！之後嘅死因聆訊裁定死者「死於不幸或意外」，雖然件事疑點重重，但最後又係不了了之， 唔知同當時「阿婆」係政務司司長有冇關係呢？！
「阿婆」係2020年「國安法」生效之前，就拿拿臨扔低晒所有戰友跳船，退出政壇。不過作為一個「過氣」退休高官，一邊出緊政府長糧，另一邊又勾三搭四去搞亂香港，冇理由一龜縮，就可以當冇事發生過，有人建議起碼都要褫奪佢個大紫荊勳章卦！ 以為避過一劫嘅「阿婆」，而家一定有得震冇得份，因為最近佢老友「生果佬」成日喺衙門提起佢哋嘅當年情，同埋「阿婆」積極爭取「香港民主」嘅事蹟，「阿婆」有冇手尾跟，都真係要剝花生等睇戲喇！
鍾情局．零零發
