史詩級山火，揭屎詩級救援鬧劇

一月頭開始，新聞紙成日講加州發生歷史以來最嚴重嘅山火，嗰場火由1月7日開始，好似燒到而家都未完全救熄。洛杉磯多個地區有火頭，據聞有多過25人死亡，數十萬人被逼疏散，多過1萬座建築物被焚毀，初部估計超過1500億美元損失，聽落都好恐佈。我零零發睇咗好多報道，發現呢次山火有好多不為人知嘅事，估唔到美國堂堂一個科技同經濟大國，會攪成咁樣，睇落都幾可悲同可笑架！

冇水救火

山火先係南加州海岸附近嘅豪宅區爆發，以平均每分鐘摧毀3個標準足球場既速度蔓延，但消防人員到現場時，所有消防栓係冇水，唔係冇幾分鐘，係足足冇水幾個鐘啊！ 風乘火勢，有咩辦法唔燒到渣都冇剩吖！事後揭發原來最大同主要供水嘅水庫，當時因為定期維修抽到乾曬塘，一滴水都冇，所以冇水泵去3個大型水箱同各地的消防栓，更可笑係洛杉磯水電局話當地嘅供水系統，就算正常運作，都只能應付一、兩楝房屋嘅火災，遇上稍微大一啲嘅山火，供水系統就會崩潰；而佢哋亦從來冇為大型山火更新市政供水系統。唔係掛！加州山火基本上年年都發生，點解會係風高物燥嘅季節攪維修，有冇腦㗎？咁樣做嘢都得，簡直就妄顧居民嘅安危，真係荒謬到極點！

冇人冇物資救火

供水系統求求其都未算呀，舊年洛杉磯市長更加削減消防部門開支超過1750萬美元，大大削弱咗人手同培訓，消防局局長更坦言從來都冇為大規模災難做過準備。吓，咁都講得出！ 更有甚者，有報道話洛杉磯消防局將大量裝備，好似水管、噴咀、頭盔同個人防護裝備，由國民警衛軍運送咗去援助烏克蘭。唉！真係自己都未顧得掂，就走去扮大佬送禮，真荒謬！而其他州份嘅支援又嘆慢板，政府唯有喺加州懲教所派出近1000個囚犯去救火，佢哋重有補水津貼㖭！我零零發睇到想唔O嘴都唔得！！！

資訊混亂，逃亡塞車

喺山火發生頭幾日，資訊非常混亂，洛杉磯全市近1000萬居民嘅手機連續兩日都收到緊急信息，叫所有民眾準備疏散，引起全民恐慌，事後証實係警報系統出錯。不過受火災影響嘅居民，就算想開車走都有困難㗎，因為到處屋多路窄，周圍塞車，逼住棄車徒步走，所以畫面睇到好多泊係路邊嘅名貴汽車被燒到通頂。政府廢啫，洛杉磯嘅居民都唔係傻架，佢哋早喺10年前，已經同市議會傾可能發生山火出現嘅堵塞情況，但得到嘅回應係: 冇必要制定詳細應對計劃，具體疏散路線只有係火災發生時才能決定咁話！呢招冇Plan B嘅太極拳，真係發揮得淋漓盡致！

有錢就水源充足

沒有最荒謬，只有更荒謬！聽聞加州有個民主黨背景富豪家族，擁有加州13萬英畝土地嘅農場，通過政治捐款同游說，佢一家就壟斷咗洛杉磯總供水量既92%，每年將1630億加侖既水儲存係地下，咁就唔怕乾旱天氣，確保佢的農場同佢屋企日日都水源充足，但難為有啲社區有時幾乎冇公共供水，要靠運水車接濟。有高人話，加州本身就係民主黨票倉，而州長本身又係黨友，亦曾接受過呢個家族捐獻，咁你話有冇關係呢？呢啲係咪就係佢哋所講嘅「民主社會」呢？

買唔到保險

年年山火，加上個政府咁啡啡流，所以啲保險公司就梗係稔縮數啦，原來係2023年開始，加州12間保險公司之中，有7間已經退場唔開新保單，攪到好多居民間屋一係冇保險，一係就被逼買州政府好貴、同保障好少嘅保險計劃。雖然話今次幾大災區，主要都係有錢人或明星居住，但係睇見自己家園燒成咁，又未必有保險賠，同埋有咩首尾跟都未知，所以隨時都會破產，都咪話唔淒涼呀！

趁火打劫

唔好以為「美國優先」，啲人真係上等啲！ 原來真係有人會趁火打劫！ 一場火，搞到警察疲於奔命，社會秩序大亂，所以唔去「零元購」就笨啦！ 呢班 「零元購」團伙趁咁好機會，就梗係順應天意，周圍搶掠啦，攪到有啲城鎮要實施宵禁。我零零發真係覺得好荒謬囉！ 而家至少已經有20多人被捕，聽聞有啲疑犯，更加承認特登燒垃圾雜物，制造火場，方便搶掠咁話！不過佢哋俾人拉做咗監犯之後，轉頭又可以被徵召出嚟幫手救火賺外快，幾「趣」喎！

個孫出世喎

嗰個前美國拜總統仲攪野，唔知佢真痴定假傻，話說加州州長係火災初期，曾經打電話俾佢5次，都未能接通，之後佢1月8日係洛杉磯消防站聽完簡報後，以為會有咩救災大計出台，點知佢向記者宣布佢孫女生咗個B，自己做咗老太爺，重慌死唔夠衰，話「以後多一個原因記住今天」，之後佢太座仲將抱孫既「溫馨」圖片上載社交媒體，佢真係成功演活咗「你有你閉翳，我有我快慰」！成功吸睛，攞唔到奧斯卡提名，都上梗「笑笑小電影」或者「全美一叮(走) 」囉！

政黨互片

本來係一個咁嚴重天災嘅時候，全國應該上下一心去救援，但係呢場山火成為咗美國共和黨同民主黨「互片」嘅平台。當時共和黨候任總統「侵侵」將今次救火不濟，歸究於總統拜登，冇將聯邦資金用係救災行動咁話。而「侵侵」大仔更加係社交媒體炮轟民主黨嘅「多元、公平和包容」政策，話佢地(為咗環保)反對北水南調，以致冇水救火，又鼓吹同性戀同變性人嘅人權，將削減消防嘅千多萬美元去補貼中小企去請變性人，又用冇消防專業嘅女同性戀者做洛杉磯消防局局長等等。總之佢唔理真正假，噏得出就噏！ 而民主黨背景嘅加州州長，就批評「侵侵」將單山火同救援一事政治化！更有陰謀論話「拜登政府」特登留個爛攤子比「侵侵」㖭。我零零發覺得美國嘅政黨政治已經去到一個瘋狂地步，面對天災，仲你有你片，我有我hea，呢班人為咗自己嘅利益同選票，真係乜都做得出！

睇返啲新聞紙， 1月7號除咗加州山火，原來西藏日喀則市定日縣都發生6.8級大地震，不過當政府一收到消息，就即刻派無人機去勘察震源，西藏自治區嘅第一話事人亦都即刻去到指揮部，佢唔係喺電視機前講兩句做show就交差算了，佢係親自調動部署、監督安排。兩小時就有4500人趕赴救援，唔使6個鐘頭就恢復供電，仲喺好短時間已經準備咗成15萬箱緊急食品，同埋七萬幾件嘅禦寒物資比當地嘅嘅災民。唔夠10日已經搭建咗5000幾套板房，俾災民有安全温暖嘅臨時住所過冬。

講遠啲，重慶喺2022年亦都發生嚴重嘅山火，但政府以生命至上、保障財產安全、

善用科技去救援嘅對策，加上內地人民團結齊心，組成電單車隊去救人、運送物資糧食去災區等等，成場火 8日就救熄咗，仲喺短時間就妥善安置咗災民㖭！

我零零發覺得加州呢場山火巳經講唔清係「天災」，定係「人禍」！我唔係想落井下石，但從呢件事睇到一個所謂科技同民主大國，冇好好利用科技去救災，冇睇到國民自發幫忙，政黨只顧互相指責；實在係有幾謊誕、有幾匪夷所思呢！

我零零發知道人比人，比死人，尤其係喺呢啲天災嘅時候，更加唔應該比較，但係當你睇到兩個地方，面對災難嘅救援態度同對策，點會唔感慨呢？每次內地有天災，喺電視見到政府同民間救援隊第一時間到達災場救人，大家雖然唔係現場，但心中都多少有底，覺得災民有救！

人人應該平等，所以必須以「人民優先」為大前題。但願大家都珍惜得來不易嘅平安幸福啊！

鍾情局．零零發

鍾情局

** 博客文章文責自負,不代表本公司立場 **

12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。

我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。

「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。

「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！

其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。

「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。

其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。

翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。

「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！

我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！

所以大家與其擔心條紅線係邊，不如小心唔好踩到條黃線仲緊要喇！

鍾情局•零零發