陳慧嫻第五場演唱會選唱《去吧》送龍迎蛇 收爐三日初二再啟市

初二再見～

陳慧嫻40週年演唱會《The Fabulous 40 Priscilla live in Hong Kong》，昨晚（1月26日）完成第五場，應節收爐三日，初二（1月30日）再啟市。昨晚慧嫻請來ERROR任嘉賓，舞台上搞笑謂剩係想同肥仔講嘢，因為肥仔同佢差唔多高，終於可以用水平線對望，其他個三個就由得佢，免自己不停向上望得多會頸痛。

陳慧嫻40週年演唱會來到第五場。

慧嫻應節收爐三日，初二（1月30日）再啟市。

第五場請來ERROR任嘉賓。

講笑過後，慧嫻先是多謝ERROR ，邀請她加入年青人隊伍，「可能有好多人唔知我同ERROR係乜嘢關係呢？ ERROR佢哋最近有一隻新歌，有一日唔知點解邀請我去做佢哋呢個MV入面客串嘅一個角色。」ERROR肥仔話，「其實我哋個個都一識你㗎…同埋我哋ERROR呢 有個古怪嘅心願 ，我哋專搵啲靚姐姐合作，你唔係客串咁簡單呀，你係女主角呀。」

慧嫻多謝ERROR 邀請她加入年青人隊伍。

ERROR又謂，慧嫻的跳舞街是經典，本來他們的新歌是希望可以向《跳舞街》致敬，mix埋跳舞街音樂落去，但係最後因為版權問題實現唔到，所以點都要搵慧嫻拍MV crossover 他們的《野舞士》。

ERROR曾邀請慧嫻拍他們《野舞士》的MV。

完成第五場之後，慧嫻就可以收爐三日，年初二再啟市，昨晚她騷後接受傳媒訪問，「今晚係龍年最後一場，我揀唱《去吧》都係因為咁，龍年去吧，有咩開心唔開心都要放下，一齊開開心心迎接新一年！」

慧嫻昨晚還特別選唱《去吧》送走龍年，迎來蛇年。

收爐三日，慧嫻表示主要是休息訓覺，另外會用六位數字去封利是，準備初二尾場派比所有台前葛後工作人員。另外因為頭場華麗跌親，其實膝頭哥係有瘀晒，幸好不是大礙，亦襯這三天休息可以好好散瘀。初二真正完成尾場後，她才會真正跟家人聚會拜年及慶祝新年。新一年會唔會想搵個男朋友，慧嫻謂，「我都咁大年紀啦。唔會再強求了。我好幸福，身邊有好多好朋友，屋企人陪伴嘛。咁其實我又唔會話抗距嘅，如果生命真的緣份上有安排，先去諗去接受囉。」

慧嫻指收爐三日主要是休息訓覺。

並透露會用六位數字去封利是。

組合ERROR成員肥仔（梁業）推出全新個人單曲《錯》，一改以往風格，首度挑戰搖滾Band Sound 曲風。今次肥仔全面參與曲、詞創作環節，期望大眾除了注意其舞蹈實力外，亦能看到他在音樂創作上的用心與突破。肥仔更透露 2026下半年將繼續專注音樂發展，除計劃再推出另一首 Solo 歌曲外，亦已籌備開設個人 Channel 進行 Live 演唱，與歌迷有更多交流。

RROR成員肥仔（梁業）推出全新個人單曲《錯》，首度挑戰搖滾Band Sound曲風，更參與曲、詞創作。

《錯》由肥仔與Will、Jamie共同作曲，T-Rexx與肥仔聯手填詞，並由肥仔及Will共同擔綱監製。肥仔笑言平日大家較集中看他跳舞，所以今次下足功夫參與創作，希望呈現一個全新的音樂形象。為配合歌曲主題，肥仔特意在曲風中間加入一段沉靜的Bridge位，希望聽眾聽歌時能沉澱情緒，進入自己的意識海去思考何謂「錯」，以及如何拿捏與身邊人的關係。

歌曲靈感源自ERROR一段低迷時期，他坦言自己性格固執，多得隊友阿Dee（何啟華）親自點醒，才意識到問題所在。

談及新歌《錯》的創作概念，肥仔表示靈感源自ERROR曾經歷的一段低迷時期。當時團隊面對不少挑戰與失誤，啟發他思考「人如何面對錯誤」。肥仔坦言自己性格固執，最初未必意識到問題所在，多得隊友阿 Dee（何啟華）親自點醒，說：「我今次首歌歌名叫做《錯》，人成日都會犯錯，但往往俾人鬧嘅時候大家都會垂頭喪氣。我覺得人應該勇於承認錯誤，今次我用咆哮式嘅方式認錯，想用一個豪爽嘅態度去面對。因為我哋 ERROR 其實都係『錯』嘅一種，歌詞入面『錯就是我、錯我亦犯過、錯就在我、我就是錯』，呢四句係我自己諗出嚟，好代表到我。」

歌詞中「錯就是我、錯我亦犯過」四句，正是他咆哮式認錯的態度，希望用豪爽方式面對錯誤。

肥仔分享道，人往往最難承認錯誤，但只要願意放低姿態，聽取身邊人的意見，才能有所進步：「按星座講我算係死牛一邊頸，好固執，最初自己犯錯係唔會覺嘅。後尾係阿Dee親口同我分析，我先意識到自己真係有錯、有做得唔啱嘅位置。」肥仔人要進步，就要勇於接受自己的不完美。願意放低姿態同人相處，其實好多事情都會順暢好多。

MV拍攝獲談善言、楊天宇等好友撐場，場面熱鬧。

拍攝 MV 當日，肥仔找來一班好友幫手。故事講述肥仔在台上演出時，整個過程不停出現意外與犯錯，令不少觀眾不滿離開，但一班忠實歌迷極力挽留，最終肥仔憑著堅持做出精彩演出。

拍攝現場更出現不少驚喜。肥仔本來只私下邀請了兩三位好友，沒想到導演暗中召集了他整班打 Pickleball 的好朋友前來情義相撐，當中包括：談善言、楊天宇（Angus）、黃浚銘（波仔）、黃溢濠、葛綽瑤（Yoyo）、周芷慧（阿提）及李煥林等。肥仔感嘆道：「今日最驚喜係 Angus，佢喺角色上面發揮得淋漓盡致，演技簡直大爆發！波仔個角色亦好適合佢，拍嘅時候我笑到飆眼水。大家咁力撐，我真係無以回報，基本上請食飯係基本啦，我帶佢哋去食嘅一定唔會差！」

肥仔與談善言合照。

對於未來的發展，肥仔透露 2026 年下半年將會把重心全面放在音樂事業上。除了正在籌備的下一首個人單曲外，他亦開始經營個人 Channel，說：「我今年嘅Plan仲會有一首Solo歌。另外呢排自己開始搞緊一個 Channel，主要想唱下 Live 同大家傾下偈。自己唱 Live 嘅機會未必真係咁多，所以想自己衍生一個平台出嚟，多做音樂相關嘅嘗試。只要有人鍾意聽，過嚟傾下水玩下我都好開心。」

肥仔透露下半年將專注音樂發展，計劃再推Solo歌及開設個人Channel與歌迷交流。