政治偽人圈小花： 週末庭子

今次想講吓喺政治藝訓班出身嘅一朵小花，「週末庭子」。大家唔好以為佢係日本人，佢係徹頭徹尾，香港出世嘅中國人，只不過佢都幾崇日，所以咪有個日本嘅藝名囉。

週末庭子1996年係香港出生，細細個已經擁有英藉，小康之家住係新界獨立屋，一路都係喺九龍塘一間女校接受中小學教育。佢本來係一個衣食無憂嘅青春少女，但自從係2011年，加入「黃痴瘋」嘅港獨組織「學民思潮」之後，佢嘅人生就發生咗極大變化；第2年佢仲參加埋「反國教」運動，一個當時只得15歲嘅中學生，從此就踏入政治藝訓班的第一步，學做「政治小花」。

「小花」初出茅廬就梗係做配角啦，傍住「黃痴瘋」，係啲集會做下司儀，由於樣貌都幾討好，好快就成為學生偶像，搞到佢有啲 high high哋，好似著咗魔咁，全程投入藝訓班嘅課程。兩年後「佔中」爆發，佢終於有機會做女一，擔正做「學民思潮」發言人。於是休學做全職政治偽人，成日出鏡，發動學生罷課，煽動民眾長期霸佔街道，一時風頭無兩。後來成件事失控，小花始終仲後生，練歷唔夠，一時受唔到壓力，跟住就放棄唔做發言人。沉寂咗一陣之後，由於佢日文講得兩嘴，係日本網民界有啲知名度，所以虛榮感又拉番佢入去政治偽人圈。

「黃痴瘋」同「衣冠聰」眼見「小花」都有啲觀眾緣，所以係2016年搵佢做咗「香港眾志」副秘書長，再次做到女一。「小花」盡地一鋪提出「港獨自決」，全情投入活動宣傳、演講同寫文唱衰中國同特區政府。喺2017年，「小花」更加同「黃痴瘋」、「衣冠聰」和其他「香港眾志」成員，兩度霸佔金紫荊廣場，用黑布包住紫荊花雕塑，同埋用鐵鏈將自己同雕塑鎖埋一齊，高調反政府，吸睛搶fo，諗住年尾拎個「飛躍進步政治小花大獎」。佢亦因此聲名大燥，從此成為「香港眾志」嘅吉祥物。

其後係2018年，因為「黃痴瘋」同「衣冠聰」，喺霸佔金紫荊廣場行動中被判監，所以「犯民」就推呢個「小花」去參加立法會香港島選區補選。仲同佢洗底以年輕女教師形象示人，連「犯民」元老，「白頭李」、「袋巾梁」、「羊鱷Q」同「許痴瘋」等等都幫佢站台。「小花」為咗參選，又高調放棄英籍，氣勢如虹。而「香港眾志」為咗鋪路比「小花」，更加喺網頁，抽起咗「民主自決」同「港獨」等字眼，希望佢可以入到圍參選。但係「小花」有咁嘅前科，最後都係被DQ，冇得入權力中心啦！

喺2019年黑暴初期，「香港眾志」不斷企係最前線，帶頭煽動衝擊警察總部同特區政府大樓，又舉行「全港三罷」集會，「小花」更加飛去日本，接受電視訪問，嗲班日本話事人幫幫手，佢嘅演技直衝「金像獎」最佳女主角！但「小花」係2019年8月30日，俾警察拉咗，告「煽惑、組織及參與非法集結罪」，到2020年尾被判監10個月！

其實喺呢單案審緊期間，「小花」又再被警方拉咗「國安法」嘅「勾結外國勢力危害國家安全罪」。「小花」知道自己將會暫別政治偽能界，所以佢係嗰次施展渾身解數，去演繹被捕嘅場景。當時「小花」將自己雙手擺咗喺身後邊，用衫遮住手腕，七情上面，好似俾人鎖上手銬好無辜咁，即時搏到唔少網民嘅同情，成為熱搜! 但「小花」始終都係唔夠經驗，一上警車，以為冇cam對住，就即刻搔首弄姿，點知被人拍到! 呢條片一出之後，佢又即刻失晒分！

雖然「小花」坐完監出嚟，但佢嗰單國安法案件仲係擔保緊，唔可以離境，於是佢係2023年，就學其他黃友咁，話要去楓葉閣讀書。雖然成日話「信黃友一成，雙目會失明」；但係只要相信有一成機會俾佢改過自新，大家都會俾機會。所以警察當時俾小花短暫去楓葉閣，但講明要喺指定時間回港報到。大家冇估錯，「小花」一離開香港，就逃之夭夭！

「小花」安全抵達楓葉閣，就即刻同全世界講：我唔會再返香港！所以佢加入逃犯通緝名冊嘅申請，就即時批咗! 「小花」係楓葉閣人生路不熟，又寂寞難耐，於是最近喺社交媒體話自己抑鬱、有自殺傾向。無他嘅，又係扮可憐搏同情，希望啲粉絲再follow返佢。今年3月佢又開番社交平台「面書」嘅專頁，講到經營網上頻道係佢而家嘅人生目標，又話知道好多人想了解佢嘅近況，無時無刻都唸下條片拍咩喎! 真係患咗政治「妄想症」，大刷存在感。講到尾，條狐狸尾巴咪又走番出嚟，係貼文叫大家多多捐錢同訂閱頻道啦！不愧係政治藝訓班出身嘅偽人，戲軌完全一樣⋯⋯

週末庭子呢啲咁嘅政治小花，佢唔係第一個，亦都唔會係最後一個。當年台灣省就出咗一個「太陽花運動女神」劉喬安。當年佢喺現場為示威者打氣，正所謂18無醜婦，佢當年咁後生，個樣又唔差得去邊，加上又着得少少性感，俾人拍咗幾張大特寫登咗上報紙之後，被捧為「太陽花女神」。成名之後，就被傳媒踢爆佢好多荒唐淫亂嘅事，除咗被揭發參與賣淫活動之外，最近媒體報導佢幾年前去咗美角，搵唔到食又逾期居留，係夜總會做小姐，同埋染上毒癮，最近又聽聞因為藏毒被警察拉咗，將會被遣返台灣省！今次真係「醜」出國際！

週末庭子將來嘅發展冇人估到，不過「out of sight， out of mind」 呢個定律，係恆久不變嘅，好自為之啦！

鍾情局．零零發

鍾情局

** 博客文章文責自負,不代表本公司立場 **

大埔宏福苑發生五級大火，導致超過150人不幸離世，當中包括一名英勇殉職嘅消防英雄。零零發同全港市民一樣，感到無比心痛同悲哀，願逝者安息，生者如斯。

大火發生之後，成個政府總動員，消防人員不眠不休，無畏無懼面對火場幾百度高溫全力撲救，希望救出更多生還者，救護及警方就全力配合，盡量減低傷亡。一救熄火之後，警方災難遇害者辯認組 DVIU就即刻爭分奪秒，進入仍然有危險嘅災場去搜索遺體殘骸，DVIU隊員不但面對惡劣嘅情況，亦要強忍悲痛和淚水，目的只係希望可以儘快確認死者身份，等家人可以同佢哋正式道別。至於其他政府部門，就將支援災民嘅配套及物資，迅速安排到位，而全港各界及市民不但捐贈善款，亦作出各方面嘅配合，體現了官、商、民同心協力，解決災民燃眉之急。

特區政府除咗全力救災同支援災民即時所需之外，喺事件發生唔夠24小時，就宣佈已經籌組成立3個工作組，包括「調查及規管工作組」、「緊急支援及募捐工作組」及「應急住宿安排工作組」，全方位協調安頓災民嘅需要。警方及廉署亦即時展開相關刑事調查，將懷疑涉事嘅工程承辦商人員拘捕，全速努力查找事故原因，希望還死傷者及家屬一個真相。而為咗確保全港其他棚架及建築物料嘅安全，相關部門亦立刻巡查全港所有正在進行大型維修嘅屋苑。

正當社會萬眾一心集中賑災善後嘅時候，零零發就留意到有一小撮別有用心嘅人喺呢個時候，借頭借路挑起事端，真係令人好氣忿!咁呢班無恥之徒究竟做咗啲咩呢?

首先喺大火發生當日，不少媒體都有轉載甚至直播事件，當時有相信係身處宏福苑嘅居民或者佢哋嘅家人，透過直播頁面留言發放求救訊息，以及列出被困/失聯家人身處住宅單位嘅位置，希望救援單位可盡快提供協助。但就有啲無恥之徒，竟然喺留言區瘋狂洗版留言，不斷重複呼籲「立法會選舉投票」、或者強調要「支持某一建制派政黨」；呢啲留言內容同方式，好明顯有別於正常嘅選舉宣傳及拉票訊息，而數量比起火災發生前突然大幅上升幾倍有多，喺一個咁唔合理嘅時間點不斷重覆「選舉信息」，加上大部份留言都係來自匿名帳戶，呢啲手法同啲網軍打手非常相似。好明顯，呢啲留言者係故意搗亂，目的就係要令人誤信「建制派不顧災情，只顧宣傳選舉」，同埋對立會選舉產生負面印象。佢哋咁做隨時影響咗求救訊息嘅發放，令到命懸一線被困嘅居民失去被救嘅機會。

而喺事發後嘅一兩日，社署等部門、關愛隊及不同民間社福機構都疲於奔命進行首階段支援災民嘅工作。呢個時候，又有啲別有用心嘅人散佈謠言抹黑關愛隊搶物資、報警驅趕派物資嘅義工等等。民青局隨即澄清，更嚴正指出呢啲係無中生有嘅事，完全無發生過，警方亦無收過有關嘅報案。另外，網上又出現有人以匿名方式，聲稱自己係消防員，話政府無提供膳食支援俾消防，要義工送飯先有得食，仲話連基本嘅消防救火及保護裝備都唔夠，更有人散佈假消息，話警方會出動6000防暴警、配備步槍及裝甲車，鎮壓清場民間物資站等等，呢啲人企圖透過發佈不實嘅消息搞分化，令人覺得政府嘅工作唔到位，去挑動市民憎恨政府……呢啲好明顯又係黃人一貫作風。

當政府喺記者會上交代跟進檢視嘅工作，包括同業界研究，如何在合適工作環境下，推進金屬棚架取代竹棚架的可行性，以提升工程安全嘅時候，就俾人上綱上線，炒作所謂「竹棚無罪」，之後網上陸續出現與竹棚相關嘅圖片同抹黑政府嘅不實言論，企圖將批評嘅矛頭指向政府；及後係災場附近，更有戴黑口罩人士，向途人展示有關標語。另外，又有人喺網上搞聯署，提出所謂「四大訴求」，再印成傳單攞去災場附近四圍派，實行線上線下挑動市民對政府不滿，影響特區政府嘅救災工作。以上種種手法熟口熟面，都係2019年「黑暴」嘅套路，不禁令零零發懷疑搞事嘅人背後嘅動機。

除此之外，正當社會各界紛紛向災民伸出援手之際，騙徒卻利用今次大火，伺機招搖撞騙，包括假扮義工使用虛假嘅「大埔宏福苑災民登記表」混水摸魚，去騙取受影響居民銀行及信用咭號碼等個人資料；亦有市民收到假冒慈善機構籌款嘅釣魚短訊，訛稱為大埔災民醫藥費籌款，誘使點擊附帶嘅惡意連結，進入虛假籌款網站。呢啲擺明就係呃錢，趁火打劫嘅行為。

呢場火災令全港每一位市民都感到震驚同悲傷，雖然整個社會正經歷艱難時刻，但政府亦都實實在在做咗唔少救災同善後嘅工作，所以呢個時候，大家好應該團結一致，齊心協力處理災後工作。但係無論大家想表達一份心意，又或者出一分力去幫助災民，都要小心判斷資訊嘅真確性，千祈唔好信埋啲無名無姓嘅所謂訊息，就盲舂舂跟人去衝，到時幫唔到災民，仲要添煩添亂，又或者令自己誤墜法網……

所以大家去幫人嘅時候，記住長善之餘，亦都要長智！

鍾情局•零零發