最近教宗方濟各離世，無論係唔係信眾都致以深切悼念。但估唔到有班人又好似執到寶咁，借教宗死訊做騷。教宗仁愛濟世，連身後事都畀人消費，可恥！
話說教宗一離世，就有個自稱天主教學者嘅「喬治」係宗教雜誌大做文章，指「生果佬」走的「苦路」變得更「陡峭」，並批評梵蒂岡至今未有就「生果佬」的「政治審判」發出抗議，亦未有對其家人表示支持；又話教宗方濟各在生嘅時候，梵蒂岡無出過聲撐「生果佬」，咁依家係時候跟進喎！查實，梵蒂岡多年嚟都講到明要「政教分離」；教宗生前亦多次強調，宗教唔係政治工具，唔應該將政治帶入教會圈子。
「生果佬」係天主教徒，但佢冇因為天主教嘅信仰，或者係天主教信徒嘅身份而受到逼害。唔同嘅教會、信徒，可以幫佢祈禱，但唔可以罔顧事實，用教會嘅名義，神職人員嘅身份，要求釋放一個罪犯，以宗教名義干擾香港司法程序。如果咁做，就完全係濫用宗教光環。
好似着咗草嘅「生果佬」親生仔「純恩」、早排自稱代表「生果佬」嘅「假外國律師團隊」、加埋「美角之音」、「HK監察」，成日喺度造謠，話「生果佬」响鐵窗入面冇得領「聖餐」，又話佢喺獄中有病無得醫，蓄意將佢天主教信徒嘅身份，同聲稱受到「逼害」硬扯上關係，混淆視聽，誤導大家！
假消息出咗無幾耐，懲教署同「生果佬」係香港嘅「正牌律師團隊」即時澄清，講到明「生果佬」喺鐵窗入面冇受到唔恰當對待，糖尿病有得醫、有得曬太陽、有得做運動、畫耶穌像，又可以讀聖經、祈禱，而且亦可以安排神父入去監獄幫「生果佬」領「聖餐」，不過只係佢自己唔想搞咋！
至於話「生果佬」身體越嚟越差？早輪睇過佢係法庭自辯時嘅雄辯滔滔、聲如洪鐘，佢隨時精神過我同你！似乎「親生仔」唔單止冇探過老竇，我諗佢連屋企阿媽阿妹都冇聯絡過，唔知老竇嘅情況！ 「親生仔」咁肉緊，但又離岸、離地去救父，究竟佢有冇其他目的？咁就得佢兩父子先知喇，大家又不妨擔定凳仔，剝吓花生！
而「甘X望」、「馮智X」等所謂宗教代表，就經常搞埋啲小動作，專登搵埋外國宗教人士、NGO、反華政客一齊聯署，搞埋啲咩「全球祈禱日」、聲援「生果佬」嘅活動，話要向香港政府「施壓」，要求撤銷檢控「生果佬」，釋放呢個「弟兄」喎。「生果佬」接受緊嘅刑事審訊，全程透明公開，罪証亦越揭越多，睇唔到同佢嘅宗教信仰、教徒身份有關係喎？！ 有媒體就嗰兩位所謂本地神職人員嘅行動，向天主教香港教區及香港聖公會作出查詢，得到回覆係: 「有關行動不代表教會的立場」。換言之，所謂「宗教代表」，只係喺度「扮代表」，借宗教之名影響輿論。
《基本法》有保障宗教自由嘅條文，正常嘅宗教活動係受到法律嘅保障；但呢的保障卻成為了一些宗教團體，支持及參與違法行動嘅「保護傘」，而家等我零零發數幾個你哋知啦！
好似2014年「佔中」同2019年黑暴，將香港搞到天翻地覆，當中有唔少幕後黑手，就係蒙騙教會、教徒去參與㗎！，好似「佔中三丑」，朱牧師就搞到浸X會九龍佑X堂成為黑暴「大本營」，「三丑」又喺度搞祈禱會、發「佔中」信念書，仲拉埋啲信眾落場，將神聖嘅宗教場所淪為「反動訓練班」。
而「好鄰居教會」，創辦人「陳X興」，黑暴期間以宗教名義發起眾籌，話要幫啲「抗爭者」，最後畀人踢爆隱瞞1,800萬港元捐款，資金流向不明。2020年全家移英後，喺英角繼續開「英倫好鄰舍教會」，同多個反華組織搞聯盟，繼續抹黑特區政府，吸金自肥。
再數嗰個「HK基督徒學會」，過去不斷發表煽動文章，內容全部都係攻擊中央、特區政府，煽動仇警、杯葛選舉，甚至教人「公民抗命」。
高人話，呢啲宗教組織背後，都同美角政府嘅白手套，好似「NED」、「NDI」，以及好多海外反華組織有聯繫，並且接受金錢資助。咁，收得人錢，你估會點呢？
由2014年發生嘅「非法佔中」，以至2019年嘅黑暴，呢啲宗教團體都超越咗宗教嘅角色，以「宗教自由」作為幌子，干預政治，明目張膽地對暴力示威者給予精神和物質上嘅支援。不過，我零零發相信絕大部分嘅宗教團體都係理性、珍惜和平與自由嘅，只係個別激進嘅人士，以宗教騎劫政治。我零零發真係希望大家抱住對信仰嘅初心，唔好再俾人利用，將宗教界變成政治鬧劇舞台！
鍾情局．零零發
鍾情局
** 博客文章文責自負,不代表本公司立場 **
12月2日，保安局局長根據《維護國家安全條例》將「香港議會」，同另一顛覆組織「香港民主建國聯盟」(「建國聯」) 列為「受禁組織」，禁止佢哋喺香港運作。任何人以受禁組織幹事或成員身份行事、參與組織活動或集會、煽惑他人成為組織成員、提供任何形式援助、或牟取會費或援助等，即屬犯法，最高刑罰為罰款100萬元及監禁14年。睇返資料，呢兩個海外顛覆組織19名核心成員，已被香港特區政府懸紅通緝，並刊憲列為「指明潛逃者」。
我零零發之前都有提過「香港議會」，係由國安通緝犯「袁X夷」、「何X懋」同「龔X夏」，喺2022年7月於海外成立嘅反中亂港組織。「袁X夷」喺黑暴期間，一早投靠西方國家，鋪定路吸金，據聞佢孖住美角前國務卿搞一場反中亂港講座，袋咗成100萬美金；另外又公然拍片要求「侵侵」制裁中國。2019年黑暴平息後，「袁X夷」知道已經無空間喺香港，繼續佢嘅反中亂港圖謀，所以就諗到喺海外成立所謂「香港議會」呢條「屎橋」，喺海外聚集一班黃人手足，延續抗爭情緒，繼續宣揚反中、顛覆國家政權嘅思想，企圖將反華意識形態持續倒灌返香港。
「袁X夷」成立「香港議會」之初，已經開宗明義要推動「自決」，又制定「香港憲法」同發表所謂《自由香港宣言》，揚言要「滅共」，目的好明顯係想用非法手段，去推翻國家政權同破壞國家憲法。佢亦搞咗個所謂選舉，聲稱要選啲「議員」代表香港人，但呢個選舉明顯係鬧劇一場，完全無代表性。「袁X夷」由2022年提出會搞選舉，但因無人參選及技術問題一拖再拖，到2025年5月先勉強搵到19個「候選人」去爭15個議席。後來其中5個「當選人」怕繼續參與所謂「議會」會犯法，於是急急跳船，剩返10個人宣誓就任。呢班所謂「議員」不但毫無議政經驗，而且個個都騎騎呢呢、骨格精奇，講個名、俾埋幅大頭相你睇，都唔會知道係乜水。
「香港議會」呢班國安通緝犯，除咗不斷喺網上搞直播講廢話、唱衰中國同香港特區政府之外，仲成日「鬼打鬼」。其中一個匿喺澳洲嘅當選人「黃X和」，近日拍咗幾條片，唱大檔話「香港議會」班人唔做嘢兼無能、運作不透明、搞小圈子。 「黃X和」話自己因為加入「香港議會」而被通緝感到不值，覺得被拖累。不過大家都咪咁天真信佢(哋)，好明顯成班人都只係利用所謂「香港議會」平台，拎政治名氣，呃金主泵水，氹黃人科水支持佢哋咋!！
其實，早前有位19歲女生，因為幫「香港議會」拍攝宣傳影片，煽動他人參與非法選舉而做咗炮灰被拘捕，最終判囚一年。喺求情時，佢提到跟咗前男友「香港議會」成員「林X淦」潛逃至楓葉角生活，但去到無人無物，又唔識英文，要靠向家人借錢渡日都不特止，「林X淦」更以佢名義向友人借取巨款，搞到佢負債纍纍，所以唯有返嚟香港，點知又被「林X淦」唆擺，為「香港議會」助選拍攝影片招至刑責。最慘係當佢被捕之後，一班「香港議會」骨幹成員以及「林X淦」都從未為佢發聲，好明顯，由始至終，佢哋都只係當個女生係一件「工具」。
「香港議會」害人害物嘅例子又點止咁少吖！「香港議會」另一著草骨幹，假牧師「姜X偉」，早前肆意抹黑香港立法會選舉，更喺網上煽動他人投白票或者唔投票而觸犯《選舉條例》。佢被廉政公署通緝係咎由自取，不過就「關照」咗轉載佢帖文嘅網民被人拉咗，「姜X偉」名符其實係「叫人衝、自己鬆」，真係害人不淺。
其實呢個「姜X偉」黑暴走咗去台灣之後，係2024年11月成立咗一個「港獨」組織，叫做「香港民主建國聯盟」(「建國聯」)，當中6名成員同時都係「香港議會」嘅成員，所以兩個組織嘅關係可謂千絲萬縷。
翻查資料，「建國聯」以推動「香港獨立」及「香港議會」為宗旨，聲言要制定所謂「香港憲法」、創立臨時國旗國歌、建立軍事力量，並計劃培訓海外港人「重返香港」從事顛覆活動。呢個組織喺今年年頭，更曾經喺台北舉行「快閃升黑旗」活動，期間更加踐踏國旗及區旗、升起「黑洋紫荊旗」、播放有「港獨」意味嘅歌曲，大肆宣揚反中亂港訊息。
「建國聯」自成立以來，於網上大肆鼓吹分裂國家思想，發佈「港獨」帖文向年輕人進行洗腦，煽動佢哋做出違法行為。早前就有4名呢個組織嘅在港成員，受到網上煽動帖文所影響，參與「建國聯」嘅活動，因而涉嫌違反顛覆、分裂國家罪而被捕。當中包括一名犯案時得15歲嘅學生，計下數，呢個同學仔喺2019年黑暴時只得10歲，好難想像一個本應天真瀾漫嘅小朋友，被人荼毒產生極端思想而走上歪路，佢12月15號就因為呢單《串謀分裂國家罪》判刑42個月。大家唔好諗住未夠秤(不足16歲) 犯咗國安法嘅罪行可以警司警誡 ，或者上兒童法庭受審，國安case係冇呢支歌仔唱㗎！而呢班身在境外嘅亂港分子就置身事外，隔岸觀火，不斷喺網上大放厥詞，繼續煽動本地年輕人犯法，為佢地政治圖謀付出代價。
雖然「香港議會」及「建國聯」核心成員已被公開懸紅通緝及列為「指明潛逃者」，但呢班人未有收斂，自恃喺海外就可以肆無忌憚搞亂香港。佢地持續倡議推翻國家政權，又公開呼籲國際社會制裁特區官員，近日更借立法會選舉同宏福苑大火大搞抹黑煽動，可謂無所不用其極咁去危害香港社會安定繁榮。特區政府今次將呢兩個組織列為「受禁組織」，切斷其對香港嘅影響，可謂有絕對必要！
我零零發都唔止一次提醒大家唔好信佢哋講嘅嘢，更加唔好轉載佢哋嘅文章，或者以任何方式支持、參與、資助佢哋搞嘅活動，否則，隨時會成為下一個國安罪犯！
所以大家與其擔心條紅線係邊，不如小心唔好踩到條黃線仲緊要喇！
鍾情局•零零發
