唔講唔知，2019年黑暴之後，香港市場上有超過4300個職工會登記，係原來數量嘅5倍，大量增生的工會當然和政治搶位活動有關，雖然後來有部份失蹤咗，但係仲活躍嘅都有唔少。
其中一個好出名，成日喺媒體嗶哩吧啦嘅, 就係「香港記怯」，不過佢唔係新工會，係喺1968年成立的老工會，原來嘅宗旨係為咗提高新聞自由，改善香港記者嘅工作條件，同埋解決新聞採訪時遇到嘅障礙。當年記者人工低福利無乜，回歸前「香港記怯」都真係扮演過啲為從業員爭取權益嘅工作，高峰嘅時候有900幾個會員。
但回歸後「香港記怯」就越嚟越政治化，一啲唔太鐘意搞政治的記者就逐漸同個會疏遠。聽聞喺2023年嘅時候，會員已跌到剩返200幾，但成個業界差唔多有成萬人喎？! 政治化令整個組織變質，2019年黑暴發生事件時，「記怯」大力支持。到後來訂立《國安法》，令顛喪的政治夢醒晒，但「記怯」一如既往，自然令正常的記者敬而遠之。而家「記怯」連執委會都萎縮埋，得番8個人，有兩個係外媒嘅員工(其中一個已經被炒咗魷魚，無業)，有3個係「自由記者」，而本地新聞從業員都係得3個……都唔知呢個協會點樣代表本土新聞業界呢？
我零零發上年10月已經講過網媒「Channel Si」，係未經同意下，擅自盜用咗上載係社交平台嘅圖片，又拖欠員工超過3個月嘅糧。當時我話，「記怯」對住無論係新聞操守、營商道德都好有問題嘅「Channel Si」，一直都扮鵪鶉，唔出聲; 「Channel Si」老闆係前生果日報記者，所以「記怯」特別優待佢唔鬧佢？ 最近「Channel Si」個老闆終於出事，佢因為造假賬呃政府「百分百擔保計劃」1,200萬被捕，公司被債權人接管；數十名員工被拖欠薪金及強積金供款，而一直標榜為業界發聲嘅「記怯」，隔咗差唔多成個月，到早兩日先至出聲明話陪咗啲員工去勞工處，但一句譴責「Channel Si」及其老闆嘅說話都冇，仲認為佢哋只係財務管理不善？! 又話媒體因資金被凍結而被逼停運，顯示本地媒體營運空間繼續收窄；又話自拘捕行動後，網絡發佈多個帖文抨擊「Channel Si」，係有組織嘅網絡抹黑行動等等。
What？ 「記怯」你知唔知佢個老闆係做假脹，呃納稅人錢，係刑事案嚟㗎？點解講到佢好似好無辜咁嘅？究竟係你哋水平唔夠，唔識解讀件事，定係喺度妖言惑眾，轉移視線呢？網絡發帖評論吓又變成「有組織嘅網絡抹黑行動」，講吓都唔得，仲有無言論自由呢？呢啲唔係正正係你哋「記怯」成日話香港言論自由空間收窄囉。相信「記怯」只係支持有你講無人講嘅言論自由。
「記怯」主席「鄭X如」對「Channel Si」觸犯法律，損害大眾利益，對被欺壓、需要援助嘅記者，選擇視而不見；但對於爭取自己利益卻非常積極，鍥而不捨都要告《華X街日報》炒咗佢，點解人哋冇糧出就只係出少少力，自己被炒就出大大力去爭取呢？！
而嗰個自稱「自由記者」嘅副主席「梁X聰」，就自由到冇咗影，冇人知佢為業界做過乜，分分鐘佢嘅正職唔係記者都唔出奇！
至於「記怯」前主席「陳X昇」，平時就好巴之閉，唔知係咪因為自己係「Channel Si」高層，所以唔敢搞自己人，唔幫啲記者出聲？
咁呢個「記怯」其實過去做過乜？不如快速倒帶睇吓喇：
2019年黑暴喺香港大是大非嘅年代，8月13日《環球時報》記者付國豪喺香港機場被示威者綁住手腳毆打，「記怯」有遣責過暴徒嗎？8月31號謠傳太子地鐵站死咗好多人，咁大件事，「記怯」有做「領頭羊」嘅角色，去調查真相嗎？ 事後證實「太子站打死人」只是謠言，「記怯」有譴責過半句造假的人嗎？ 當時有個良心電視台出去採訪，就會俾暴徒圍住，甚至被破壞攝錄器材，「記怯」有為被恐嚇的記者出過聲嗎？ 個陣時有好多暴徒，會用幾十蚊去買個「記者證」，一遇到警察，就用嚟做護身符，自稱係「自由記者」，阻撓警方執法，而「記怯」就會即時彈出嚟，誣蔑警方打壓新聞自由！「記怯」當時咁大聲，同而家「Channel Si」高層騙案成個月先出嚟，細細聲嗡兩句，簡直有天淵之別！
疫情嘅時候，有個傳媒屈政府，話封區強檢時派發嘅罐頭冇罐頭刀，居民開唔到嚟食! 原來呢間媒體係專登唔影罐頭頂部嘅拉環，去砌政府生豬肉，於是引起社會各界嘅抨擊。但估唔到呢個堪稱專業嘅「記怯」，明知呢個媒體係做緊假新聞，竟然唔出嚟譴責，仲話成件事係「政治抹黑」! 有冇搞錯？我哋香港市民係純啫，但唔係傻㗎！
舊年「記怯」特登開記招，聲稱有記者同佢哋啲屋企人受到滋擾，企圖營造有傳媒被打壓嘅假象。後來話有幾個報咗案，而其中一個報案人係facebook 聲稱，自己報案之後入境，俾海關針對截查，跟住仲話俾人電話滋擾，佢係咪諗多咗呀？雖然唔知而家成件事發展成點，不過如果件事有料到，佢哋仲唔大鑼大鼓咁走出嚟亂吠咩？
近年「記怯」極度政治化，對本地真正嘅新聞自由、新聞從業員嘅保障，不聞不問；但外國一有風吹草動唱衰香港，佢哋就會即刻鋪橋搭路，齊齊助攻，好明顯係好有「國際視野」，識得「聯通世界」啦! 但係，當外國嘅新聞自由受到扞擾，佢哋又玩選擇性睇唔到。無論係2022年《半島電視台》一名記者，喺報道以色列軍隊掃蕩巴勒斯坦難民營嘅時候，喺鏡頭面前被殺，當場死亡；又或者係「侵侵」因為《美聯社》唔肯將墨西哥灣改為美國灣，一度被禁止進入白宮採訪，「記怯」都一樣係唔會出聲! 所以「記怯」個名真係好，係怯懦個「怯」；不過如果佢哋改名，叫「國際記怯」，應該更加貼切！
我零零發都唔知「記怯」呢個組織有咩存在價值，摺埋就應該係「最佳選擇」！但係佢哋死唔斷氣，嚟緊6月會選新一屆執委，唔知邊個會接呢個爛攤子做爛事呢？
鍾情局．零零發
鍾情局
** 博客文章文責自負,不代表本公司立場 **
二百幾年嚟美國一向都標榜自己係一個自由、平等嘅國家。不過自從「侵侵」再度封王之後，我零零發發現，超級大國嘅所謂普世價值，原來全部都係得個講字！
「侵侵」一登基之後，就即刻簽署第一個行政命令，去釋放千多名被司法部起訴，發動「國會山莊騷亂」嘅罪犯，包括兩個被判22年同18年監嘅「驕傲男孩」政治組織成員。「國會山莊騷亂」係因為「侵侵」2021年落敗，而發起嘅一場暴亂，令到有5個人死咗(包括1名警員) ；而「侵侵」又同成件事有關，點解可以咁兒戲，簽個名話放就放，唔使有任何司法程序嘅?！ 「侵侵」完全將美式嘅法治，異變為人治！如果喺香港，佢嘅行為，唔係衰「妨礙司法公正」，都「公職人員行為失當」啦！
另外，據媒體報導，有份參與呢單案件嘅檢控官同FBI探員，而家都被 「侵侵」追殺緊， 20多名檢控官已經被炒，至少6名FBI探員收到通知，要提早退休或自動辭職，這種討伐異己的手法在所謂民主國家真係聞所未聞。聽聞「追殺行動」陸續有來，因為「侵侵」上屆落敗後，都牽涉咗好多單官司，包括金融欺詐、逃稅、性侵女作家，推翻2020年大選結果，同不當處理政府機密文件等等。有份負責嘅檢控官同探員，派定散水餅都得啦！
而美國嘅所謂「新聞自由」，隨著「侵侵」回歸，亦難逃一劫！有消息話，數間與「侵侵」為敵嘅主流媒體，好似《紐約時報》、NBC等，已經被踢出國防部五角大樓嘅新聞採訪室，而《美聯社》由於唔肯跟隨「侵侵」將墨西哥灣改稱為美國灣，就被禁止入白宮同空軍一號做採訪！呢啲咪叫做「美式新聞自由」囉！點解香港「記怯」同黃色媒體咁靜，連作狀吠幾聲都冇嘅！
至於學術自由，「侵侵」就要求所有大學，開除有份參與反以色列，同埋聲援巴勒斯坦嘅校園示威學生，否則就停止聯邦對學校的撥款咁話。其中美國哥倫比亞大學一名巴勒斯坦學生，因曾參與反以色列校園示威而俾警察拉咗，仲話要逮解出境！好彩法官裁決時表示，佢嘅行為係受到美國法律保護，政府唔可以將佢驅逐出境！ 「侵侵」玩到咁癲，好多間大學已經頂唔順就範；但哈彿大學就偏偏唔聽佢支笛，仲反告政府違憲添！ 於是「侵侵」又指哈佛違反聯邦法律，凍結咗數十億元嘅資助，仲話如果哈佛繼續唔聽話，就會剝奪佢接收捐款的免稅嘅地位⋯⋯如果件事係香港發生，就「大鑊」了！唔單止咁，美國嘅科技一路都係領先全世界，但「侵侵」竟然要大幅削減科研開支，而家好多美國嘅科學家人心惶惶。無工做事少，仲隨時會屈你係間諜，咁就大件事喇，所以好多科學家都打算出走「超級大國」，向中國、歐洲、加拿大發展，可能呢啲就係「學術自由」嘅新概念，令知識流通世界囉！
另外，早排網上流傳一張「侵侵」扮教宗嘅相，本來喺網絡世界，呢啲二次創作無乜特別，但奇在呢幅相竟然post咗上去「超級大國」嘅官方帳號！而最激係「侵侵」喺記者會上嘅回應：「乜啲教徒唔喜歡咩？我太太覺得好可愛，好Nice喎！不過我真係做咗教宗，就唔可以結婚，咁就過份咗！教宗係唔鍾意結婚㗎，係咪？」我相信就算唔係天主教徒，睇到都覺得佢實在太輕佻無禮，一啲都唔尊重一個宗教，可能呢啲，就係我哋唔識嘅「宗教自由」啦！
特朗普社交平台截圖。
「侵侵」嘅另一「傑作」，就係任命玩具車老板「馬仔」，設立狗狗效率部 (DOGE) ，去整頓聯邦政府。媒體話「馬家軍」手起刀落，係冇預警之下，停止泵水俾美角國際開發署(USAid)，令到2000名員工即時被停職！ 由於「DOGE」行事都好囂張，周圍樹敵，搞到「玩具車」經銷商都到處俾示威者搗亂。「侵侵」為咗撐「馬仔」，一啲都唔避嫌，企出嚟話個啲暴力示威係恐佈主義，拉到呢班示威者，佢哋就會比死更難受咁話！ 「侵侵」仲即刻係傳媒面前買部「玩具車」表示支持，實行直播帶貨！咁都冇利益衝突？仲唔係活生生嘅官商勾結？如果係香港，佢哋隨時比老廉拉「公職人員行為失當」啦！
講番「間諜」，大家可能覺得只喺電影誇張嘅橋段，現實世界係唔存在嘅。不過最近美國「中情局」（CIA），就發佈兩個中文視頻，去招聘一啲不滿現狀嘅中國官員，向美國提供機密情報！ 講到真係同中國人好交心，幫緊你、幫緊你咁！呢個不但係佢哋一貫卑劣嘅伎倆:挑撥矛盾同仇恨；而且亦好橫蠻咁暴露咗佢哋為所欲為嘅野心！ 呢件事好清楚話俾大家聽，間諜係無處不在！今日「超級大國」可以向中國招募間諜，明天就輪到其他國家，無一倖免！
至於全球關稅戰，「侵侵」一時話加關稅，一時又話暫緩，又話同中國領導人好friend，呢樣嗰樣，但係次次問到佢係咪直接有通話，就講東講西，用語言偽術去誤導世界。其實中國商務部都講咗好多次，中國之前冇同佢溝通㗎啦⋯⋯點解佢哋咁做？高人話「侵侵」政府嘅官員、老友係公司大老闆，生意人，所以「侵侵」推出飄忽同瘋狂嘅「關稅政策」，攪到個股市短時間大升又大跌，咁係過程之中，有冇人賺大錢，就真係得佢哋先知喇！ 如果呢啲事係香港發生， 就算唔拉唔鎖，都起碼開個「特別調查委員會」啦，你話係咪?！
睇返美國歷史上受歡迎嘅總統，好似華盛頓、林肯、羅斯福、列根、奧巴馬……佢哋係個人特質方面，全部都表現出誠實、有親和力同好嘅溝通能力；政績方面，又能夠喺戰爭或經濟危機中展示決斷力；而最重要係，佢哋代表咗美國自由、平等同埋法治嘅價值觀。但睇返「侵侵」，人家受歡迎嘅嘢，佢一樣都冇！佢係上一屆政府提倡嘅「美國優先」，而家已經變成「侵侵優先」！而一向嘅美式價值觀，而家反而成為「侵侵」手起刀落嘅目標，或者係玩弄嘅對象！「侵侵大帝」將無賴、荒誕，人治、弄權同霸凌式統治，演譯得淋漓盡致！係短短一百日，就將「民主自由」無死角咁轉化為「暴政自由」。我零零發最後都係嗰句: 「我都戥佢啲國民好悲哀，竟然俾個咁嘅大帝去管治國家！ 」
鍾情局．零零發
