政事
立法會委員會選舉再起波瀾，教育事務委員會成第3個未能選出正副主席的委員會。會議由民主黨涂謹申主持，上次做大會主席俾人插的街工梁耀忠，提出規程問題，要問清楚主持人或主席的權力，問主持能否裁定不獲秘書長完成宣誓的游蕙禎、梁頌恆、姚松炎及被質疑的劉小麗、羅冠聰等人的參選和投票資格。
涂謹申指自己有權力作出裁決，並裁定劉小麗、羅冠聰已完成宣誓，有參選和投票權利。涂謹申又引用上屆黃毓民的案例，話游蕙禎、梁頌恆和姚松炎雖然不能投票，但若有議員提名他們出選主席，3人 仍可享有參選主席的權力。
鄭松泰、劉小麗、羅冠聰等人馬上食完上，提名梁頌恆、姚松炎及游蕙禎參選教育委員會主席。長毛梁國雄亦加入戰團，提名公民黨毛孟靜做主席，而建制派則提名的民建聯蔣麗芸做主席，泛民提名的教育界葉建源做主席，全部獲涂謹申接納為候選人。最終因為拗得太耐教育事務委員會未能選出正副主席就要散會。
政壇八卦友話，本土派提名梁頌恆、姚松炎及游蕙禎做教育委員會主席，呢啲人唔係講粗口就係辱華，若果做到主席，你話會教出怎樣的下一代？
Ariel
** 博客文章文責自負,不代表本公司立場 **
有「中國梅鐸」之稱的黎瑞剛入股TVB 後，還做副主席，難免令有政治傾向人士，猜疑係咪有要染紅無記。
黎瑞剛聯同TVB主席陳國強、行政總裁李寶安與傳媒茶聚，劈頭第一句就話，唔會參與TVB日常營運，亦唔會介入編輯方針、業務等，佢話TVB現有專業團隊，做得好好，佢會多諗如何拓展未來路向。
佢多次盛讚TVB專業管理團隊，話而家政治環境複雜，經濟亦唔係咁好景，TVB已做得好好，但亦承認挑戰都唔少。
雖然剛做副主席，之前都好留意TVB，好似網上有人彈TVB，或者攞TVB開玩笑，佢都知道好多，都幾接地氣。
佢又舉例話自己內地公司拍的劇集「瑯琊榜」，在內地非常收得，但在香港TVB播就唔係好得，佢都有思考點解會咁，亦問咗唔少朋友，朋友話「瑯玡榜」無香港演員，所以香港觀眾睇落無親切感，黎瑞剛話受到啓示，將開拍的「瑯琊榜2」，係咪可以考慮加入TVB的演員呢。
唔講唔知，已有一家內地網上平台，以800萬人民幣一集買入「瑯琊榜2」版權，拍40集就袋數以億元。所以，黎瑞剛覺得網上平台發展空間大，TVB向內地發展，亦應循此方向。
講到市場環境，佢忍唔住「小抦」港府，話全世界對電視節目植入式廣告都好寬鬆，但港府就管得甚緊，希望政開放思想，「讓媒體鬆鬆綁。」
整個茶聚，黎瑞剛講好多對TVB發展方向的睇法，俾人感覺係想搞好呢盤生意，唔係有乜嘢政治任務。
