謝寧嘆與岑建勳是「父親式婚姻」 大爆主動結識現任丈夫經過

1985年香港小姐冠軍謝寧，日前到新城廣播接受李有毅（Ben）和兒子李國煒（Benson）主持的《Ben同Benson「chur」到行》錄音訪問，謝寧當年參選香港小姐，Ben亦剛加入《香港早晨》擔任主持，並訪問過對方，謝寧笑言：「都成40年前，所以超過50歲嘅朋友先認得我。」

謝寧接受新城廣播《Ben同Benson「chur」到行》錄音訪問。

謝寧參選港姐前，曾在一間音樂學校教琴，然而當時她對人生感到迷茫，於是決定參選香港小姐，最後順利奪得冠軍。Ben憶述當晚的問答環節，謝寧給出的答案令人印象深刻，Benson即場問多次當晚的問題：「謝寧小姐，依家有一個病叫做愛滋病，大家都知道係唔好嘅病，如果畀你一個機會將愛滋病改一個名，你會改咩名呢？」謝寧回答：「我會改一個恐嚇性嘅名，叫game over，即係玩完喇，你唔驚呀？」後來外界對她的回答反應熱烈，令她始料不及。

不過謝寧亦爆料，指大會事前曾給她們35條題目，然後所有女生便圍在一起想答案，她表示：「唔係我叻，只能夠講我好好運，揀咗條好有趣嘅問題，同埋好有趣嘅答案，但個答案係邊個改，我就唔知喇，因為係30幾個女仔一齊諗嘅。」

謝寧選完港姐難抵壓力致抑鬱。

最怕被當動物咁睇！

雖然謝寧當選後人氣急升，但她坦言當時心情十分低落，「我發覺我唔可以承受咁大壓力，我唔係一個幕前嘅人，身高又唔係高，啲人覺得我係香港小姐最矮一個，自己唔識得處理外間對我嘅評價，我就好封閉自己，好唔開心，然後我覺得我係有抑鬱。」謝寧續指：「我唔鍾意畀人指指點點，一夜之間每個人都識得自己，嗰種感覺好唔舒服，好似睇動物咁睇你，有啲人荒死人哋唔識你，會好享受，但我唔鍾意，我好怕人哋識得我，到依家都有呢種感覺，可能個人自信心唔夠，或者太細個，所以嗰一年我覺得好慘。」

直至踏入人生第二個階段，Ben形容當時外界得知謝寧與岑建勳拍拖都大吃一驚，謝寧笑稱：「絕對係美女與野獸！」她透露二人拍拖是跟信仰有關，因自己期望要有一位基督徒男友和丈夫，於是帶對方返教會，「點知佢真係決志，咁我咪覺得係佢喇！」然而，兩人因性格不合，於2005年結束結婚14年婚姻，「佢係一個好成熟、好老積嘅人，佢係一個大人，我係小朋友，我哋有好大段距離，我唔可以有一個父親式婚姻，好似我咩都要聽佢講，我冇自己諗法，我要生活喺佢陰影下，我冇咗自己；其實佢冇變，變嘅係我。」

謝寧大爆主動結識現任丈夫經過。

離婚後，謝寧在教會遇上現任丈夫王德偉，「當時我唔識佢，只係覺得佢好靚仔，有一次我同朋友講起呢件事，佢話同我一齊返教會，睇吓撞唔撞到呢個人，點知一泊低架車，擰轉身就見到佢，我好無恥上去同佢講『我覺得你好熟面口，我唔想排隊，可唔可以打尖呀』，佢話隨便啦，跟住一齊排隊入教會。」之後眾人互相介紹，原來男方是TVB的舊同事，更曾為謝寧拍照，謝寧表示：「然後我就諗點樣攞佢電話，咁啱就嚟中秋節，我要幫曲奇店影中秋節產品，我就搵佢做freelance，咁就交換咗電話；喺做嘢過程去了解呢個人，覺得佢好單純同溫柔，發覺佢好啱我，就開始拍拖，經歷十堂婚姻輔導就步入婚姻，好開心。」Ben看到謝寧春風滿臉的樣子即笑言：「嘩，見到你雙眼閃閃發光，好甜蜜。」

詳細節目內容，請留意7月7日，晚上11時–凌晨1時，新城知訊台《Ben同Benson『Chur』到行》，網址：https://www.metroradio.com.hk/MetroInfo/

藝人林韋辰日前到新城廣播接受李有毅（Ben）與兒子李國煒（Benson）主持的《Ben同Benson「Chur」到行》錄音訪問，大談入行多年以來的點滴；林韋辰透露，當年TVB藝員訓練班同學包括鄭伊健、歐瑞偉等，並由著名武打唐佳親授兩個月武打訓練，專門學習如何「畀人打」。

林韋辰接受新城《Ben同Benson「Chur」到行》錄音訪問。

林韋辰解釋：「拍戲要打上靶又要打下靶，打上靶要學識唔好打傷人，打下靶又要學識避，仲要拍出嚟似真嘅。」他直言電視台是人類潛能訓練所：「平均一日可能得兩三個鐘頭瞓覺，試過做完廠景收兩點，返到屋企三點半，六點通告，五點半就要起身，平均得兩個鐘頭瞓。」

林韋辰在90年代中期轉投亞視，迎來事業高峯。當年獲邀拍攝《再見艷陽天》，更憑該劇奪得視帝寶座，他謙虛表示：「大家俾面啫，完全唔關演技事，我同期有劉松仁、四哥謝賢一齊競選，可能因為角色討好，加上當年做網上評選，四哥同松哥啲fans未必識上網，我就贏咗呢半票，攞咗個視帝返嚟。真係唔係實力嘅表現，不過好感謝觀眾認同呢個角色。」

左起：李有毅、林韋辰、李國煒

他形容那段時間是事業高峯：「嗰兩年係冇休息過一日，開始多人識，喺香港市場第一次嘗到甜頭。做戲做到有人叫得出你個名，呢樣嘢真係好緊要。」除了拍劇，林韋辰亦主持《今日睇真D》，他坦言直播節目極具挑戰：「試過唔夠時間剪片，監製話你口才可以，就叫我現場VO，即係睇住片講。第一唔可以NG，第二要啱啱好夠時間，唔夠就要自己加多兩三個字，好刺激。」

談到北上發展的契機，林韋辰坦言是被迫的選擇：「亞視喺2013年開始有好大變動，監製想開戲要自己搵贊助，綜藝又話你自己搵到贊助先開。我覺得呢個台有啲困難，就開始慢慢向北面放消息。」並於2018年投身內地發展。

林韋辰憶入行辛酸。

早前林韋辰因椎間盤突出壓到坐骨神經，一度行動不便。他坦言：「我未試過一次受傷咁犀利，有半年時間喺生活上係癱瘓咗。如果冇屋企人照顧，直頭生活唔到。」他描述當時的痛苦：「企唔到、坐唔到，坐一陣就已經好痛，要即刻瞓低。每日要推住個旅行喼好似扶手咁行來行去，冇扶手就行唔到。」

他感激張耀揚的建議，最終選擇透過復位治療康復：「佢話唔好做手術，同我分享咗好多。我最終揀咗復位，後來搵到一個專門幫運動員做嘅，兩三次就好番九成。但一定要做番好多強化運動，坐姿都要留意。」

爆奪視帝內幕。

詳細節目內容，請留意3月28日，晚上11時–凌晨1時，新城知訊台《Ben同Benson「Chur」到行》，網址：https://www.metroradio.com.hk/MetroInfo/