上回講到如果國安犯「飛機豪」做番機師，我零零發一定唔會搭佢個間航空公司嘅飛機。今次想講下，我哋如何面對犯國安法嘅醫生。
64歲嘅「麒麟怪醫」，出生於基層家庭，1979年考入香港大學堂醫學院，1985年畢業後開始行醫。1994-2007年係中西區區議員，2004年做埋立法會醫學界功能組別議員。佢2008年加入「工民黨」埋「犯民」堆之後，思想就開始變得激進同反政府。喺2020年，「麒麟怪醫」參與「非法初選」，於是被控告「顛覆國家政權」罪，認罪後判監4年兩個月，今年4月放咗。
「麒麟怪醫」可以係香港最高學府讀醫，本來以為佢智商同操守應該屬於天花板級數，不過睇番佢過去10幾年，無論行醫抑或係從政，佢嘅專業能力以及倫理道德都唔達標，而且係一個多說話，少做事，求求其其嘅花生友。
醫療事故
先講吓佢「大夫」嘅專業。據報導，「麒麟怪醫」喺2004及2005年分別俾3個病人告佢醫療失誤。呢幾單嘢最終都冇上法庭，相信已經透過一間叫「醫療保障協會」(協會)賠咗錢，達成不公開嘅庭外和解協議就算。而「麒麟怪醫」一直都冇道歉，而醫務委員會又無作出任何跟進！根據當年報導，有多名醫生發起聯署，譴責「麒麟怪醫」嘅執業操守，並指因為「麒麟怪醫」嘅巨額賠償，令到其他醫生要分擔上漲嘅保費，好唔公平，直指「麒麟怪醫」係害群之馬，並要求唔再接受佢投保。
我零零發請教過高人，呢間「協會」係專為醫生提供「醫生專業責任保險」嘅組織，一旦發生醫療失誤，「協會」就會代醫生向病人賠償。江湖傳聞過去曾有病人因醫療失誤，而獲法庭裁定可獲賠償，但原來個醫生冇買「專業責任保險」，所以賠唔到錢，最後呢個醫生要申請破產。雖然香港醫院唔會請無買「專業責任保險」嘅醫生，但法例又冇要求醫生一定要買喎，所以如果遇到一啲「瞓捩頸」唔買「專業責任保險」嘅醫生，萬一啲病人出事，就真係傷上加傷喇！
低呢抽水王
唉，「麒麟怪醫」接受過專業訓練做醫生都搞成咁，所以中途出家從政會叻得去邊吖？我睇來睇去，佢咁多年都係靠把口抽水，一啲實質嘅嘢都冇做過。好似2008年嘅時候，一個17歲嘅乙型肝炎病者因為高血壓到醫院求診，點知兩名醫生都用錯藥，令到佢出現急性肝衰竭要換肝。呢單喺醫療事故，人人都唔想，但唔知點解「麒麟怪醫」好似執到寶咁，猛咁用嚟抽水，但佢唔係講醫院或者醫生有咩問題，而係無啦啦話成件事同當年特首CY，委任自己人入醫管局有關。吓？明明係醫療失誤，醫院同埋兩名醫生責無旁貸，點解佢會轉移視線去講醫管局，講啲唔啦更嘅嘢？點解會賴咗落個制度上？
混淆視聽做政治騷
2017年，「麒麟怪醫」高調報名參選第13屆港區全國人大代表選舉，但係就拒絕係確認書上簽名擁護中國憲法同基本法，呢個係基本要求個個都知啦，唔打算簽就咪鬼報名囉！佢話如果簽咗，驚將來會變成同意23條同「國歌法」本地立法咁話，好明顯係想借機妖魔化23條同「國歌法」去古惑大眾，用「犯民」慣常手法，做政治「騷」，提升曝光率！而同年就西九龍高鐵站實施「一地兩檢」方案，佢又話「一地兩檢」尤如「木馬屠城」，表面上係為咗提高效率，其實暗藏危機，話內地乘機在港執法，又話呢度門一開，「一國兩制」就玩完啦！喂，而家高鐵開通超過7年，日日數以十萬計人過關，無事無幹，佢嘅謬論又不攻自破！
歪曲事實
係2019年，有一場別開生面「國歌快閃」活動係社交媒體廣泛熱播，其中一幕係當國歌奏響時，一個坐係輪椅嘅東江縱隊老兵，在旁人攙扶之下起身唱國歌，場面當然令人肅然起敬。但「麒麟怪醫」其後就係立法會《國歌條例草案》委員會會議上，大做文章，污蔑個老人家，話本地立法後，長者會被強逼企起身，啞巴都要唱國歌咁話！老兵隨後接受訪問時講：「肅立、起身唱國歌係因為擁護國家，佢(麒麟怪醫)唔應該去詆毁老戰士…….如果佢係一個真正嘅中國人，以後做事要真實一點，不要歪曲事實！ 」
無賴性格 低智言行
當年黑暴發生後，喺一個財委會會議上，佢又無啦啦講：「林鄭政府同3萬幾警察不停咁打，打死人，佢哋(所謂市民)只係想撤回《逃犯條例》啫，打死咁多人……」佢講完之後，有位議員問佢打死咗邊個，佢就阿吱阿咗，話呢啲無謂嘢叫個議員自己睇！搞乜呀？係一個議事廳竟然語無倫次，究竟儍咗定黐咗？
仲有，當年黑暴立立亂，唔係靠警察維持治安，而家嘅香港都唔知會變成點！但係呢個「麒麟怪醫」唔單止喺示威現場阻住警察執法，佢仲用「一堆綠色物體」嚟形容一班為香港安全付出嘅警察，你話佢係咪屈得出就屈，嗡得出就嗡，離曬大譜呢？另外，佢當時又聯同其他「工民黨」成員呼籲美國制裁香港官員，向美西方叩頭。
「麒麟怪醫」犯過《國安法》被判監，加埋以前反中亂港嘅極端行為，醫務委員會係咪要慎重考慮佢嘅專業資格呢？！
另外，如果有醫生唔買或者買唔到保險，但又靜雞雞喺街頭巷尾開間診所，就有機會瞞天過海，到時病人有咩冬瓜豆腐，就真係無陰公喇! 所以，如果「麒麟怪醫」繼續做番老本行，你會幫襯佢嗎？我就唔會囉！
鍾情局•零零發
鍾情局
** 博客文章文責自負,不代表本公司立場 **
最近有隻尖牙大眼嘅潮流公仔「Labubu」風靡全球，連足球巨星碧咸同韓國天團BLACKPINK都爭住收藏。「Labubu」全球熱潮嘅威力實在太勁，好多報道都形容「Labubu」嘅崛起，係中國文化產業喺全球「軟實力」競爭中嘅新突破。
當零零發想了解更多中國「軟實力」，上網打個「軟」字嘅時候，估唔到搜索引擎第一個彈出嚟嘅熱搜詞係「軟對抗」。但到底咩係「軟對抗」？佢同我哋普通市民有咩關係？
簡單講，「軟對抗」就係班搞屎棍唔敢再明刀明槍搞事，而係轉用更具「潛伏性」同「隱蔽性」方法，去令人積聚憎恨政府同國家嘅情緒。唔似以前班反對派咁明目張膽，喺議會掟蕉、謾罵、拉布，甚至喺街頭掟磚放火嘅「硬對抗」；「軟對抗」就係將政治包裝喺網絡、藝術、書本、電影等日常生活嘅嘢入面，潛移默化，慢慢洗你個腦，當要利用你嘅時候，就好似施魔咒一樣咁迷惑咗你去犯法。
而「軟對抗」嘅手法，真係同騙徒一樣，層出不窮，無孔不入。佢哋唔單止滲透到社會唔同階層、年齡層、甚至連你每日接觸嘅衣、食、住、行都可能已經成為佢哋洗腦嘅工具。接落嚟，等零零發舉幾個實例，話你知「軟對抗」點樣滲入你嘅日常生活，等大家可以提高警覺，唔好中招！
「羊村繪本」案係「軟對抗」嘅典型例子。係2020年，幾個言語治療師打住其專業資格公會名義，出咗套「羊村故事」繪本。表面係一套兒童圖書，講吓普世價值，但實際內容充滿虛假訊息，專門煽動仇恨。佢哋將內地比喻成「狼」，港人比喻成「羊」，仲話啲狼會捉走羊群，所以叫啲羊要用羊角對抗反擊，企圖向心智未成熟嘅小朋友，灌輸仇恨國家情緒，鼓吹暴力。
連官老爺喺判刑時都話，「繪本針對嘅係4歲以上嘅小朋友，佢哋嘅思想好似白紙，極易受影響。但繪本內容明顯煽動恐懼、仇恨同不滿，仲要暗示唔反抗就會死，徹頭徹尾係荼毒小朋友嘅思想。」
而其中一本繪本仲印咗成3000本，派落社區唔同嘅鋪頭同反政府嘅區議員辦事處，俾街坊免費攞，而電子版仲有21萬人次睇過。講真，呢個年代好多家長為口奔馳，有陣時真係無時間去理小朋友睇緊咩圖書。到發現嗰時，可能都已經太遲…
其實呢啲都係慣常技倆，唔少反政府組織時不時印刷啲潛藏住藐視政府訊息嘅單張及刊物，靜雞雞咁周圍派發，街坊一唔留神就好易中招。例如，就好似你去salon等緊整頭髮嗰陣，自然會順手拎起店舖擺放嘅刊物嚟睇。一睇就中伏，無聲無息間接受咗「洗腦」信息。零零發提醒各位店舖老闆，千祈唔好貪小便宜，就隨便俾人擺啲刊物喺你嘅店舖入面，一定要自己把好關，唔好俾人利用咗仲渾然不知，害人害己。
「軟對抗」嘅魔爪同樣伸延到每年暑假好多普羅大眾都會去嘅書展！上年書展，兩間黃出版社「介限書店」同「爛爛的天」，居然喺書展公然售賣「步大」新聞系顧問歐X輪撰寫嘅敏感書籍，最終俾貿發局要求下架。
零零發上年9月就有篇文，爆過歐X輪啲衰野。佢喺黑暴期間同國安法實施後，就一直寫煽動性文章，抹黑法官之餘，仲煽動市民仇恨政府。而歐X輪喺《臘腸新聞》發表嘅4篇文章，全部都俾法庭裁定係有煽動顛覆國家嘅意圖。書展每年吸引近百萬人入場，影響力有幾大可想而知。
除咗文化界，「軟對抗」就連飲食界都滲透埋，而家隨時食餐飯都可能俾反政府訊息洗腦。以下就有幾個例子。
之前網上流傳有一間叫「蒸爐」嘅食肆，係啲單據上面仲印住「香港人 缺一不可」等黑暴口號。黑暴已經過咗咁耐，仲講呢啲。食餐飯啫，唔使「缺一不可」咁激呀。其實，明眼人見到呢啲字句，都估到呢間嘢背後動機係咩啦。
另一個例子，最近有間叫「膳X小館」嘅餐廳，因為鋪位租約期滿，房署唔同佢續約，就發哂爛渣，搵「獨X媒體」和「閘智社」呢啲黃媒炒大件事向房署施壓。係訪問入面，「膳X」以「受害者」人設賣慘，甚至誣蔑政府「打壓」佢哋。
但係，零零發翻查資料，發現呢間「膳X」真係黃到發黑。黑暴期間，佢舖頭貼滿連儂牆煽動文宣，仲賣咗唔少印有反政府字句的食品。零零發作為一個普通市民，真係忍唔住想問：咁黃嘅舖頭，點解政府仲要租間鋪俾你？難道租俾你繼續播毒？房署唔續租俾你，合情合理。
再講，合約精神係雙方自願，邊有話一定要租俾你？人家對你有懷疑唔想租，唔通你想租就逼人一定要續租？而且，仲有一個好搞笑嘅情況，就係成件事最落力幫手炒作嘅，都係啲黃媒。明眼人一睇就知，佢哋玩緊咩把戲啦。
其實以潛移默化挑動反政府情緒的手段，已經存在喺我哋社會好多年。例如以前嘅《生果報》，成日打住「新聞自由」同「監察政府」嘅旗號，實際上卻不斷以偏頗及抹黑的報道手法，煽動反中亂港氛圍；黑暴期間，更加美化暴力行為，煽動攬炒思想，多年來荼毒咗唔少市民。有報道都話《生果報》多年來不停搞煽動，如果用五年一代去計，「生果報」已經荼毒超過五代青年。
唔知大家仲記唔記得2021年7月1號嗰晚？有個叫梁X輝嘅男人，喺銅鑼灣某大型百貨公司外用刀襲擊警員，然後自殺。警方之後係佢屋企，發現大堆《生果報》舊報紙，以及其他黃媒同埋大量修例風波嘅剪報同煽暴文宣。死因庭調查仲揭露咗更多細節，心理專家嘅分析梁X輝日記同遺書指出，佢之所以走上「孤狼之路」，全部都係因為長期俾《生果報》餵咗啲「心靈毒湯」。佢深受《生果報》極端攬炒思想影響，最終策劃「孤狼式襲擊」，結果成為《生果報》洗腦工程下嘅犧牲品。
警方國安處星期三（7月9日拉咗4個15至47歲男子，佢哋涉嫌搞顛覆組織「香港民主建國聯盟」，警方又在他們的處所搜出好多煽動獨立旗幟，仲有大量《生果報》，可見這個媒體的流毒有多深。
睇到呢度，你可能會問：「咁係咪所有反對政府嘅聲音都係『軟對抗』？」事實係批評政府政策同「軟對抗」完全係兩回事，唔可以混為一談。
舉例講，好似之前垃圾徵費政策、皇后山邨食水出現不明「黑點」事件咁，都引嚟社會同傳媒對政府嘅批評。但重點係，呢啲聲音明顯係具建設性嘅，佢哋嘅目的係想政府改善施政，令市民生活得更好，而唔係為咗挑動負面情緒想去顛覆政府。
上述例子已經好清楚咁話俾我哋知，「軟對抗」絕對唔係講笑，真係會害死人。千祈唔好聽到「軟對抗」有個「軟」字，就覺得佢無乜殺傷力。事實上，佢就好似病毒咁，無聲無色侵入你嘅身體，削弱你嘅免疫力，隨時令你大病一場。所以，零零發希望大家認清「軟對抗」有幾危險，保持清醒，唔好俾佢有機可乘。
零零發．鍾情局
