今年DSE放榜，有超過16,000名考生成功考獲升讀大學資格，我零零發喺度恭喜各位同學仔，開展人生新一頁﹗大學校園將會係你哋成長嘅轉捩點，但記住大學係社會縮影，無論你住Hall、玩O Camp定上莊都好，一定要帶眼識人，如果唔係一時大意信錯人，俾人利用咗就慘啦！
點解零零發咁感嘆? 諗返2019年黑暴時，好多大學淪為煽暴基地。「沙田大學」嗰班就明目張膽搞罷課、佔據「二號橋」，將校園化為武裝基地，出入仲要俾暴徒搜查，唔講以為去咗中東戰區；「你大」更將校園變做汽油彈武器兵工廠，最後校方善後修復，埋單要2億！以為黑暴過咗去，大家會理性返啲喇，點知去到2021年，「香港大學堂」個學生會竟然仲公開動議，吹捧七一刺警案個兇手做「烈士」！
唔單止咁，近年有個別大學學生會，俾一啲別有用心嘅人操控住，搞到亂象叢生，例如「乘大」學生會無法交出16年帳目審計報告，被校方收回會址、 「沉大」學生會臨時委員挪用210萬，轉移到私人證券投資戶口及還債……出咗咁多事，大學加強對學生會嘅規範都好正常，所以「領大」今年初要求學生會簽署一份承諾書，確保學生會奉公守法、遵守校規，不作損害校譽行為等等。點知個學生會外務副會長賴X賢就死撐拒簽。奉公守法，遵守校規，只係對一個學生基本嘅要求，點解咁簡單佢都唔肯簽呢？
到今年6月，我零零發終於明白點解賴X賢唔肯簽啦!原來佢同埋學生會另外幾個人，俾警察拉咗，報道指佢哋涉嫌偷咗「領大」130萬學生會會費嚟吃喝玩樂、還卡數、私人貸款、仲開投資戶口炒股票。按政府統計數字，大學畢業生每月平均薪酬約2萬，130萬等於一個大學畢業生5年幾嘅收入喇！
網上仲有人踢爆賴X賢喺保釋期間，繼續嘆盡人生，飛完日本再飛韓國，睇波食好嘢。一般人去一次旅行基本洗費唔一萬都幾千喇，一個無咩收入嘅學生，點解可以去完又去咁豪？希望佢唔係用咗同學嘅錢啦。另外，聽講佢拍擋吳X霖都唔輸蝕，唔單止用公款還債，仲用咗過萬蚊買衫玩cosplay，好似佢俾警察拉嗰陣時，都係着緊唔知用咩錢買嘅衫。
翻查網上資料，原來賴X賢而家仲牽涉同香港專上學生聯會（學聯）嘅爭產風波，咁不如等我零零發講下學聯嘅前世今生先。 學聯喺1958年成立時，初衷係團結學界，搞學術文化交流，本意良好。當年香港各主要大專院校學生會都係成員，每年會向有關院校嘅學生收取會費。學聯早期都算係愛國學生組織，包括搞過保衛釣魚台運動，仲係70年代開始搞旅遊部，推動粵港澳同海外學生交流，呢個就係大家都可能聽過嘅「學聯旅遊」喇。1993年學聯賣咗旅遊部，套現2000幾萬港元，之後再成立「學聯及學生活動基金有限公司」(基金公司)，去管理學聯相關財政資產，包括向學聯提供會址、同埋俾經費佢哋運作。
去到80、90年代，學聯愈來愈多參與社會運動，後期甚至成為反政府組織。近年例子包括2012年反國教、2014年政改罷課等，最後觸發違法佔中。直至2015年，因各大專院校成員出現意見分歧，多間院校紛紛退出學聯，最後只剩「領大」、「沙田大學」、「Four大」、同「薯仁」留低。近來隨著各大學生會斷莊(即無人接手)或不獲校方承認，最後只剩返「領大」學生會作為學聯嘅活躍成員，學聯運作變相由「領大」學生會操盤。
而「領大」學生會「揸Fit人」賴X賢上位後，即刻搞咗間信託公司，佢想將之前提到嘅基金公司名下價值逾千萬嘅學聯物業，據為己有，點知陰謀被發現，結果就鬧到上法庭，單case到依家都未有裁決。其實賴X賢都就畢業喇，點解仲咁想「私有化」學聯財產呢？睇到「領大」班人涉挪用學生會130萬嗰單案件，都估到佢趷起條尾想做咩啦。
睇返呢啲大學學生會同學聯等等嘅學生組織，呢十幾年變晒質，究竟係學生質素唔同咗？教職員出咗問題？定係背後有啲人係度煽風點火呢？其實一直都有輿論話外部勢力滲透本港校園，好似近期有報道揭穿一個叫做「港美中心」嘅組織，早喺1994年就已經喺「沙田大學」插旗，長年以學術交流名義，喺校園安然存在，仲拎住「沙田大學」嘅域名電郵、用大學嘅場地，所以唔少人都誤以為佢係「沙田大學」附屬機構，結果俾佢哋不動聲色滲透咗咁多年。
有關報道仲講到，「港美中心」每年攞美國幾百萬港元資金，背後金主包括美國中情局「白手套」福特基金會、被中國制裁嘅NDI等反華組織，全部都係外部勢力搞政治滲透嘅老手。佢哋唔止搞好多所謂嘅青年領袖訓練班、獎學金，仲聯繫本地不同NGO搞活動，有意無意灌輸歐美價值觀、培植反對派，再將帶有「港獨」色彩嘅「黃教材」滲透校園，荼毒學生去示威、去反政府……
所以黑暴期間，不同大學嘅學生會都群起抗爭，絕對唔係無跡可尋，根本就係按照西方推動顏色革命嘅劇本進行。大學生個個都有理想、有熱情、有抱負，而且無包袱，好多時都誤以為要對抗政府權威，先至係為社會做緊嘢，實際上年青人呢啲特質，係好易被別有用心之徙利用。
大學學生會理應代表學生，爭取合理權益，支援新生盡快適應大學生活。其實咁多年來，各大學校方都好支持學生會，包括以前會代學生會收會費，亦都會無償為學生會提供辦公室及活動場地等，只不過近年一啲學生會越走越歪，更喺黑暴時期作出好多極端違法嘅行為，最終大學管理層只好忍痛出手同佢哋撇清關係，避免助紂為虐，俾一小撮別有用心嘅人煽惑有理想、有前途嘅學生。
我零零發希望各大學管理層繼續保持果斷立場，正本清源，確保校內學生組織妥善運作，堅決防範外部勢力滲透校園搞搞震，守住教育清淨地，保護社會未來棟樑！
鍾情局‧零零發
鍾情局
** 博客文章文責自負,不代表本公司立場 **
大家仲記唔記得2020年有條DSE歷史試題：「日本於1900年至1945年對中國帶來利多於弊，你是否同意此說法？」
日本係1931至1945年侵略中國，造成數千萬人民傷亡，單係「南京大屠殺」，死亡人數就超過30萬。呢段係日軍殘害無數平民百姓最慘痛嘅時候，點解條試題要咁問？日本侵華對誰有利？ 我零零發估計出呢條題目嘅人，係別有用心，而且擺明心中有鬼，所以喺度玩陰濕，特登將條試題寫得間接一啲。無論如何，點解呢條題目又可以過到考評局嘅？
翻查資料，出呢條題目嘅人叫楊X宇，1992年取得香港大學堂歷史系學士學位，1999年再取得歷史系博士學位，佢曾經係中學同浸大教過書，到2005入咗考評局做歷史科發展部經理。呢條試題當時係社會引起極大迴響，但佢一路死撐，話條問題只係想激發考生開放思考喎！ 黃人成日講民主、公義、尊重人權，點解會咁「冷血」出啲咁嘅試題？雖然楊X宇最後受唔住抨擊而辭職，但係佢又唔衰得，於是週圍唱係俾人逼走喎！ 唉，原來當年嘅教育界，係充斥著咁樣嘅人，唔怪得知搞到成千上萬嘅學生是非不分，喺黑暴嘅時候俾「黃人」慫恿咗出嚟犯法，斷送前程喇！
楊X宇之後就係《蘋果日報》、《眾新聞》及《立場新聞》做寫手，以為有靠山可以肆無忌旦高調反政府，但呢段「唱雙簧日子」好快就玩完，眼見金主「生果佬」俾警察拉咗、「生果報」又摺埋，楊X宇慌曬，係2021年7月就雞咁腳著草走去英國。
楊X宇與「肥彭」合作愉快？！
楊X宇嬲爆爆敗走之後，就同成班國安通緝犯，包括鍾建華、袁弓夷、鄭敬基同鄭文傑等，聯署乞求美國制裁特區官員同檢察官，又親身或者透過視像，參與各地反特區政府同支持黑暴嘅論壇。喺2023年尾，更加成立網媒「教育X針」，佢話希望好似「新聞刺針」揭露時弊嘅精神，為教育界吐穢除氛喎。不過，睇番佢爆嘅所謂教育料，講嚟講去都係嗰幾樣嘢，只要任何人、任何事，同「中國」兩個字扯上關係，佢就會好似上咗身咁，胡言亂語狂鬧一番。
今年3月初，有一名中學生係參與內地交流團期間過身，楊X宇見「機不可失」，就喺「教育X針」同其他社交媒體，不停將事件發酵，首先話所有中學生被逼參加內地交流「洗腦團」，又話教育界呃啲學生，話唔參加內地交流團，就唔可以報考DSE；之後又轉載嗰間出事中學的舊生、學生發起嘅聯署，要求學校同教育局交代調查結果。後來聯署發起人基於「私隱及家屬意願」，結束咗個聯署，但佢仍然死心不息，轉移視線話發起人受壓，所以被逼放棄聯署，矛頭直指學校同教育局隱瞞事實。其實係今時今日，有咁多投訴渠道，加上資訊發達，紙又點包得住火吖，如果死者家屬對學校或者教育局有任何不滿嘅地方，一早就通曬天啦！但楊X宇仍然毫無道德底線咁將件事無限放大，向死者家屬傷口灑鹽; 又無理質疑學校、教育局，更不斷去妖魔化交流團。講真，其實似係楊X宇洗人腦多啲囉！
六十年代香港制水的日子
今年係「東江水供港60週年」，楊X宇又借題發揮，指香港水費因為東江水輸港而增加咗一倍，又煽惑大眾話當年六七暴動，都係因為樣樣嘢加價而引發，跟住就混淆視聽話暴動同東江水有關係。仲話佢係讀歷史嘅？ 佢冇翻查資料㗎？ 60年代「香港水荒」最嚴重嘅時候，4日只供水一次，大家要用膠水桶去街喉攞水，於是港英政府就向廣東省求救，當時國家義無反顧，即時批示一項3千多萬嘅工程，當年內地無論係人力、物力同財力都好缺乏，但都動用大量資源，係一年之內，成功由高山引領河水倒流落水庫，再供水俾香港，其後仲有4次擴建工程添，但咁耐一個仙工程建設費都無問香港政府攞過，只收水費。如果冇東江水供應，香港都唔知要捱幾多年「樓下閂水喉」嘅日子！
六十年代香港制水的日子
六十年代香港制水的日子
係6月12日，楊X宇見奧運劍擊金牌得主江旻憓出席國安法論壇，就出post詆毀「微笑劍后」有親中背景，話佢靠「透過『佔中事件』反思香港特區選舉制度完善路徑」嘅論文，係「第二黨校」之稱嘅中國人民大學取得碩士學位……乜楊X宇唔係話教育應該鼓勵多角度、批判性思考嘅咩？做乜佢一睇到「佔中」、「黑暴」呢啲字，就好似上咗腦咁，亂嗡一通，唔俾人多角度思考呢？ 佢連港產奧運金牌選手都要抹黑，係咪因為收唔到「微笑劍后」入黃營，個心實曬，所以無恥到妖言惑眾呢？！
我零零發不嬲都相信「物以類聚」、「臭味相投」。楊X宇之前唔單止係「黃媒」寫手，仲係另一黃媒《追新聞》嘅董事，而家就成日孖住國安通緝犯鍾建華喺個網台COOTL，講埋晒啲唔等使嘅嘢！而係今年農曆新年，佢出席一個活動見到「肥彭」，就即刻飛撲過去打卡，然後即刻upload上Facebook，慌死冇人知佢追星咁！ 所以都唔使我零零發講落去，你都知佢係咩人啦！
教育界前輩話，做教育應該要「立德樹人」，但楊X宇成日將教育議題政治化、將國民教育妖魔化、將校園變做鬥獸場……借「教育X針」之名，去爆所謂「香港教育界秘密」，其實佢除咗成日喺度危言聳聽，無中生有，不斷抹黑中國、特區政府之外，咁耐以嚟，佢喺教育方面有乜嘢真知灼見？ 佢聲稱用「刺針」去揭露「黑暗嘅教育界」，其實佢先至係「教育界最黑暗的一面」，一個心術不正嘅偽學者、真黃人！ 當年潛伏在體制內搞壞學生思想。如今佢所謂嘅「勁料」，其實係啲未經證實、斷章取義嘅煲水流料；至於佢嘅所謂「評論」，基本上都係左抄右抄人哋嘅嘢，然後鬼鬼鼠鼠偷番薯，加一句半句不負責任嘅言論，完全冇道德、冇專業操守可言！
楊X宇個枝所謂「刺針」其實係「次貨嘅針」就真，所以應該改個網站做「教育次針」啱啲囉！呢啲美化日本血腥侵華歷史嘅人出嚟講公義，慳啲啦baby！
鍾情局•零零發
