馬航MH370失蹤近一個月，黑盒只有30天的電力，呢幾日成為搵番黑盒的關鍵時間，傳來聽到與黑盒相同頻率的脈衝信號的消息，多少令人有番啲希望。之但係呢單馬航失蹤案，真係曲折離奇，大馬政府講啲又唔講啲，歐美傳媒又大爆情報材料，令成件事神神秘秘，難怪有唔少傳聞，質疑事件係咪同大國諜戰有關。
講到諜報戰與客機墜毀，深喉就諗起歷史上一單同香港好有關的客機爆炸案，就係所謂「克什米爾公主號」事件。故仔要講番到國共內戰，1949年大陸政權易手，退守台灣的國民政府同剛成立的中共政府仍處於鬥爭狀態，香港成為雙方諜戰前哨。
1955年第三世界國家，在印尼搞萬隆會議，中共派出明星級總理周恩來赴會，呢次會議喺歷史上有啲名，都算係大陸政府突破外交上被孤立的一擊，中共極為重視。由於當時北京並沒有條件有航機可前往印尼，於是租用印度航空公司「克什米爾公主號」作為包機。
架機4月11日上午抵達香港，下午改為中國代表團的包機，載佢哋去萬隆參加亞非會議。但架機起飛後，喺去到印尼附近上空就爆炸，機上中國代表團成員同隨行記者共11人全部死亡，機組人員就5死3傷，呢宗墜機案轟動一時。
克什米爾公主號被炸毀
隨著各類密件解密，基本認定「克什米爾公主號」在香港啟德機場停留期間，國民黨特工買通咗一名機場清潔工，將炸藥放喺飛機上，將飛機炸毀。但故事未完，當時外界的消息都認為周恩來喺機上，相信佢係國民黨特工刺殺目標，結果北京臨時改變計劃，周恩來冇喺機上。到底係周恩來收到料唔嚟香港，定係一直都有plan B，周恩來嚟香港坐包機只係一記虛招呢？！
近年中共檔案亦開始解密，佢哋講法就係周恩來收到當時緬甸的邀請，先去傾傾萬隆會議上的立場，所以周恩來就走咗昆明線經緬甸去印尼，但呢份解密文件亦間接印證咗一個消息，北京確係事前已收到情報，知道國民黨特工計劃喺香港落手，而且情報非常準，中方更曾向英國駐華代辦通報咗情況，要求英國提請香港當局關注代表團人員的安全。
雖然事前已經有情報，但好明顯到最後唔係個個環節都有落實到啦，總之都係阻止唔到架機被放炸彈，事件可見當時各方間諜喺香港較量得幾激烈。
深喉聽聞一個講法，事件案中還有案，呢宗爆炸案中，中共唔止機上的人犧牲晒，仲牽連到其後發生的「香港第一諜案」：曾昭科，被港英政府遞解出境。
曾昭科(圖片來源：百度百科)
曾昭科1947年加入香港警察，備受重用，1961年升至助理警司，當時華人警察中前途無量，1961年港府宣布曾昭科為北京進行間諜活動，潛伏喺警察內部及駐港英軍，蒐集高度秘密的情報，透過喺澳門的幕後指揮人，把情報交到中國政府手上。
1962年曾昭科現身北京北京天安門城樓
原來英國發現曾昭科係中國間諜，同上述航機爆炸案有關。話說英國政府收到北京交來情報，要求關注代表團安全後，引起港英情報人員注意，奇怪北京掌握到呢啲料，同佢哋的情報好相近，開始檢討係咪自己內部人員將港英的情報洩漏咗俾中共，於是展開捉鬼行動。選定一批可能出賣情報的港府高層人員，將不同的虛構「機密」資料有意識地分別放俾不同人員，最後觀察北京反應，探測到乜料去到中共高層，於是「揪出」咗曾昭科，呢支被認為係中共喺港英最堅的「針」。
雖然呢個講法，同外界普遍講法有出入，一直以來都話係一個聯絡人意外落網後，供出咗曾昭科的身份。不過港英放料捉鬼的講法應較可信。中共自己有關航機爆炸案的解密文件都承認，事前收到情報，精確到知道係收買咗啟德機場的地勤人員，喺加油檢修期間將炸彈放入油箱，與現實的發生的情節幾乎一模一樣，如此堅料，都幾難單靠當時喺外圍的北京情報人員可以收集到囉。
聽完呢個歷史故事，係唔係更令人想像馬航失踪另有內情？
深喉
** 博客文章文責自負,不代表本公司立場 **
國家主席習近平與美國總統奧巴馬日前在荷蘭海牙會晤。習主席十分關注「爆料王」斯諾登（Edward Snowden）此前爆出美國國家安全局涉嫌竊取中國華為公司資訊，及監控前國家主席胡總的通話的事情，在會議期間，當面要求奧巴馬解釋。
奧巴馬的回答直接了當：情報活動，各國都有。而美國會將涉及國家安全與商業的情報分開，唔會向美國的公司提供相關資訊。即係間接承認確有其事。
講起斯諾登，佢爆出美國監聽全球的「稜鏡計劃」，全球嘩然。當時好多人覺得斯諾登係睇唔過眼美國的所作從為，所以冒死爆料，係正義英雄化身。不過佢投身俄羅斯後仲不斷有有料到，外交界人士開始耳語，懷疑斯諾登的真正身份，因為他爆的料不但非常堅，而且非常隱秘，連美國竊聽歐盟領袖，例如德國總理默克爾嘅電話。咁重大的機密，唔大可能係一名普通的中情局外判程式人員可以攞得到。
Germany US Allies Spying
外交界有個傳聞，其實斯諾登係俄國派去美國嘅間諜。佢爆嘅料有部份係俄國提供，目的就係爆美國陰毒。斯諾出走後唔直接去俄羅斯，先跑到香港，搞咗一陣曝埋光，其實係虛幌一招。至於去到俄羅斯後滯留在機場，更係一場大龍鳯，做俾大家睇睇而已。
事實上，斯諾登「返」咗俄國之後，間中就爆下反美嘅料，與俄國外交行動，非常配合。例如在烏克蘭事件，佢爆料美國利用資訊戰，煽動烏克蘭群眾上街，利用網絡將前總理亞努科維奇的污點放大，更提供資源俾上街示威者，目的係將亞努科維奇搞垮。
斯諾登跟手又爆美國入侵中國華為公司電腦系統的堅料。
今個星期一，美國眾議院情報委員會主席羅傑斯表示，美國反情報機構官員相信，斯諾登「一直與俄羅斯情報單位合作。以奇怪的方式支援俄羅斯擴張主義活動」。
話時話，美國在中國從事間諜活動，其實唔係秘密，斯諾登爆響口美國竊聽胡總，阿爺梗係發火。籍此美國同俄國在烏克蘭劍拔弩張的時間，斯諾登又放美國入侵中國公司電腦的堅料，搞到習主席舊事重提，質問奧巴馬，大有發動中國夾埋砌美國的味道。
斯諾登近期仿如一隻俄羅斯的棋子，用以打擊美國，效用奇佳。好難唔叫人懷疑，以至相信斯諾登根本就係俄國間諜，俾人策反，然後出逃爆大鑊。
是耶非耶，值得研究。
