胡官疑似「挑戰者B隊」

胡國興出選特首，多多少少都令人有點意外，泛民中人第一個反應， 就問佢係唔係中央安排胡官出來陪跑的「鎅票隊」，唔好等只有CY 一個人參選咁難睇，兼且將反對票鎅走，例如財爺曾俊華呢啲候選 人唔夠票當選。

政壇高人話，睇睇胡官宣布參選後的言論，就知道話佢係「鎅票隊」 的講法太有想像力，因為如果係阿爺派佢出來陪跑，點會咁大力批評 CY？

例如胡官宣布參選時就話：「 我認為梁振英先生不能照顧到香港整體利益以及消除港人的怨憤和社會的分化。」

胡官後來接受訪問時連番對CY發炮，話有不少對梁振英有誠信問題的質疑，很多都好像不了了之， 認為這些事一定不可能讓它走雞。他希望立法會能齊心調查，包括UGL事件和「廉政風暴」，又指有足夠證據的，一定要去調查。 他又提到僭建問題，質疑為何只有一方要面對法律訴訟，指自己做法官，不是盲的。

胡官接受電台訪問時又講到：「如果唔係梁振英做特首， 我唔會出來參選。」佢更加直接講到鎅票問題，被問及會否擔心因為他參選鎅走其他參選人的票， 以至不能達到最終目的，他表示「會考慮、會好嚴謹考慮，可能要採取一啲行動，我唔知，但呢樣野千祈唔好俾佢發生。」電台主持人追問是否必要時會否成就他人，他回應：「我唔知， 可能叫其他人成就我都得。」

高人話，胡官差唔多係擺明居馬車去隊CY，已顯露出一個「挑戰者 B隊」的格局，政界傳聞未來到重量級挑戰者出場時，他會擺出一個「純潔look」，唔玩醜聞唔隊人，插CY呢啲粗重 工夫，就由胡官出手。特首選戰，睇落都幾兇險呀。

Ariel

** 博客文章文責自負,不代表本公司立場 **

特首選戰逼近，三個疑似候選人打大交。

整件事先由新民黨主席葉劉淑儀開始，她昨日在電台訪問中直指曾俊華擔任多年財政司長，「無乜真係做嘢，我覺得佢有啲hea做（懶散）」，並舉例指身為土地督導委員會主席，未有表現。

批評到咁直接，曾俊華當然會反擊。他今日到中大出席中大60周年院慶講座，回應葉劉批評他「hea做」，表示自己擔任海關關長時，葉劉淑儀正是他的「老闆」，當時對方給自己的評價「幾好」。話鋒一轉佢就話：「葉太在政府工作咁多年，都應該知道司長呢個位都重要既，如果真係可以hea到10年，都幾有天才。」

呢個hea做爭拗未完，特首CY晚上加入戰團，以美國總統杜魯門名言「The buck stops here」（責無旁貸）為題撰寫網誌，疑似暗批有人雖然有權有責，但為求做好人，就不斷「推莊」卸責，不肯拍板。

CY好似驚死人唔知佢講邊個，接著舉例說：「The buck stops here這句名言，在香港同樣適用。雖然有爭議，雖然得罪人，但作為政府首長不能迴避。四年來的事例甚多：大大小小土地開發項目是其一，近日的港獨和立法會宣誓是其二。做好人容易，做醜人要有擔當和勇氣。」

講到土地是財爺曾俊華管轄的範疇，講宣誓就燒到立法會主席梁君彥。CY出一箭就射兩人。

睇嚟葉劉點起呢把「hea做」之火，都可以燒吓喎。