雖然今年中秋要等到十月，但好多商家已經超前部署，推出月餅早鳥預訂優惠去吸生意。商家愛財可以理解，但要取之有道，尤其係做食品，更加要守住道德底線，因為關乎食客嘅健康同生命安全。我零零發舊年就向大家揭發過「餘一」呢間經常「上榜」嘅黑店，3年前佢哋就已經被「手足」喺網上圖文並茂踢爆賣「發霉月餅」，之後又試過喺無牌食品工場製造月餅，被食安中心封舖而急急停售。
如果大家認為事不過三，「餘一」會識驚、會收手，咁就錯得離譜喇！事關佢今年依然賣緊月餅，仲心雄到話要搞「國際線」，賣去英、澳、加同歐洲近廿個國家。問題係，啲劣質月餅淨係喺本地賣，都經常出問題，依家仲話想賣去全世界？真係想影衰香港，醜出國際呀！如果啲「手足」食咗呢啲黑心月餅落肚，分分鐘要入醫院「團圓」，咁就真係多得佢哋唔少喇。
咁離譜嘅「餘一」話事人叫朱X瑋，佢經常講一套、做一套，仲要專消費班「手足」。佢口口聲聲話整咗個監獄通行嘅「囚犯平安包」(可帶進入懲教署嘅物品) ，方便「手足」同家屬，但原來呢啲平安包係以市場價貴近一倍價錢出售；佢之後又試過呃班同路人，將啲強積金交俾佢所謂嘅專業團隊打理，最後竟然發現成班人都係虛報履歷嘅、無中介人牌照，仲俾警方拉咗。
2019年黑暴之後，有一班搞事「手足」坐監，有一部分黃人覺得自己當日無落場，或者企得唔夠前，好似欠咗「手足」咁，所以佢哋為咗「彌補」班手足，就去幫襯「黃店」，令自己減少愧疚感。於是朱X瑋就利用黃人買呢啲「贖罪券」嘅心理，一招走天涯--用煽情技倆氹黃人乖乖咁課金。「餘一」過往賣過「記怯」嘅掛飾、政治漫畫家「磚子」設計嘅年曆，聲稱收益係用嚟支持「記怯」同「閘智社」，不過最吊詭嘅係，既然「餘一」一直都幫緊佢哋，點解佢哋仲一直對外講需要「江湖救急」? 究竟係因為鬼打鬼，分贓唔匀，定係朱X瑋根本冇科過水出嚟幫人呢？
以扮演囚犯代言人身份起家嘅朱X瑋，過去兩個月，分別接受「大幾元」同「路邊社」兩間黃媒訪問，公然抹黑港府修定《監獄規則》，係為咗打壓獄中嘅「政治犯」。我零零發早幾次都講咗，修定《監獄規則》係要堵塞灰色地帶，以免有人借探監、寄物資，去傳遞政治訊息，同埋係入面收兵買馬，影響監獄秩序。朱X瑋高調發聲，目的只係繼續塑造佢個「囚權人設」，為自己盤黃圈生意打底，等多啲黃人去幫襯！
係暑假檔期，朱X瑋就搞咗個為期27日嘅所謂「餘一舊書盛夏祭」。喺活動開始前，佢已經自爆，話只係出個post，一毫子都唔洗，就收咗超過4,000本書返嚟賣，佢話呢啲舊書平均每本賣50蚊。佢咁就可以穩袋20萬，加上部份舊書聲稱有所謂知名黃人嘅親筆簽名，或者標榜係牆內流出 (即係「手足」坐監時睇過) ，炒作「時代見證」嘅噱頭，就賣到600、700蚊一本，食水非常深！賺得咁多，唔怪得朱X瑋早前接受「毒立媒體」訪問，都話賣二手書會係「餘一」未來重點發展方向喇。朱X瑋次次搞啲活動，都話收益會捐俾邊個邊個，不知不覺間催眠咗大家，覺得佢一出招就係幫緊「手足」，其實係咪真係有幫過先? 佢之前開聲話幫「手足」嘅嘢，都冇聲冇氣，更何況今次都無話過會益邊啲「手足」喎。
「餘一」不嬲都鍾意用最少嘅力，賺最多嘅錢。大家可能會有疑惑，咁點解「餘一」唔同黃書店「獵人書齋」聯手，搞場大型「書祭」呢? 我零零發估朱X瑋一早就睇通咗「獵人」被人睇得好緊，為免受牽連，佢點會同「獵人」齊上齊落吖，一條友「單飛」，賺錢落自己袋最實際。
雖然朱X瑋同其他黃書店割席，不過「餘一舊書盛夏祭」都有賣美化生果佬違法行為嘅「生果佬傳」，同埋「閘智社」嗰本收錄咗「磚子」同攬炒歌手「河粉詩」偏頗言論嘅新書，會場仲有賣印有港獨暗號明信片，表面文創，實際「軟對抗」。而呢個所謂嘅「餘一舊書盛夏祭」，亦疑似因為無申請《公眾娛樂場所牌照》，而驚動咗食環署巡查……「手足」俾佢呃錢之餘，如果因為咁而惹到一身蟻，就唔抵啦！
朱X瑋靠賣發霉月餅、sell囚犯平安包發跡，到依家賣舊書，一路呃感情、一邊謀暴利，用情感勒索去做生意、靠消費「手足」名氣謀財嘅伎倆，都通晒天啦，唔知「手足」們幾時先會醒呢？
鍾情局‧零零發
鍾情局
** 博客文章文責自負,不代表本公司立場 **
我零零發睇返以前，喺立《國安法》之前，個個「犯民」都扮到高高在上、巴巴閉閉，唔係七情上面鬧政府，就係議事廳玩碌地沙，又或者週遊列國唱衰香港。
自從《國安法》生效後，「犯民」就樹倒猢猻散；呢班人有人身陷囹圄，有人選擇潛伏，有人懸崖勒馬，有人享兒孫福，好似大狀余X薇就弄孫為樂，得閒整返一兩件衫仔俾佢哋；有人享受人生，表表者就係梁X傑，成日吃喝玩樂上小紅書，(無錯，係內地嘅小紅書)；有人遠走台灣省，繼續搵老襯錢，包括黃X民喺網媒開咪，陳X莊煮私家飯。至於幾個老鬼就聲稱金盆洗手等終老，好似「大主教」就靜雞雞祈禱，等人打救；而「白頭李」同「陳四萬」，就冇咗影，唔知仲以為佢地已經投「英」奔「美」㖭……
當大家都各自各精彩，過緊佢哋餘生嘅時侯，似乎剩返一個「劉大姐」，孤身一人，靠圍爐過日子，佢似乎仲念念不忘昔日嘅光環喎！
「劉大姐」係香港土生土長，全家有18個同父異母兄弟姊妹，雖然佢係孻女，但當時屋企條件差，所以細細個就要喺唔同親戚度寄居。可能係咁，令到佢性格咁倔強，同埋唔輸得！ 讀到中七之後，親阿哥出錢送佢去外國留學。之後返香港做過記者，跟著從政。經歷過兩段婚姻，冇仔冇女，可能因為百無了賴，所以佢踏入古稀之年，都繼續玩擦邊球，高調論政刷存在感。
其實「劉大姐」個CV 都幾吸睛㗎，佢係美國同英國讀新聞學同國際關係，除咗係記者，喺1985到1991年做埋「香港記怯」嘅正、副主席，又喺大學教過書，1991年仲係第一位女性透過選舉，而成為立法局議員，回歸後佢又再當選。係2012年到2016年更做埋「白鴿黨」嘅主席。
「劉大姐」係2016年無做立法會議員同「白鴿黨」主席，大家以為佢會裸退政壇，點知無耐佢喺「白鴿黨」開咗個「國際事務委員會」，俾自己做主席，當時佢話到明要打「國際線」，向（中國）政權施壓。2019年初，當反對派大肆炒作《逃犯條例》嘅時候，「劉大姐」就聯同「白鴿黨」嘅「林X廷」、「尹X堅」等人，去見當時美國駐港澳總領事，抹黑《逃犯條例》，話會損害「一國兩制」同香港「高度自治」喎。
到黑暴爆發，佢更加以「國際事務委員會」主席身份，去英國、美國、加拿大等西方國家，呼籲當地議員、政客去干預香港事務；喺英國期間，更要求英國要履行《中英聯合聲明》中嘅責任。 到2020年《國安法》訂立之前，佢又寫信比英國內政部，促請英國擴大BNO護照持有人嘅權利，俾多啲香港人有居英權咁話。啍！原來佢係有份推波助瀾，曲線咁搞到班傻仔傻女，掉低年老父母，出走去英國嘅！
喺訂立《國安法》後，「劉大姐」又不停抹黑條法例，話啲人會擔心被以言入罪，話人人自危係香港「新常態」，又話唔知自己幾時會被人拉喎。真係唯恐天下不亂，居心叵測！
不過，隨著「生果佬」同好多「犯民」觸犯《國安法》被收監之後，「劉大姐」的確係收斂咗一排，我零零發以為佢終於「醒覺」，唔再踩鋼線，不過原來係自己唸多咗！係「35+顛覆案」開審嘅時候，佢不但天天高調現身撐場，仲日日上載自己去法院嘅相片係社交平台，呃like搏流量。有線人爆料，話「劉大姐」扮被告家屬去攞法庭籌聽審，而且仲懷疑佢俾呢啲家屬籌外國領事添！佢咁高度關注呢單案件，又穿梭領事群，去配合外力不斷炒作、抹黑單case，究竟佢有咩企圖？
佢除咗忙著聽審，又開始主持「白鴿黨」網台訪談節目「ChatDP with 劉大姐」，以訪問啲「黃人」去制造反政府聲音。第一集「白鴿黨」主席羅x熙就講話政府係2023年完善區議會方案之後，一定會少咗民選(犯民)議員，咁到時冇人會幫到啲市民喎！ 羅x熙真係太睇得起「犯民」嘅議員啦，我零零發仲記得呢班「犯民」議員，喺黑暴期間點樣癱瘓區議會運作，當條街被暴徒放火破壞嘅時侯，佢哋有理過民生嘅需要咩?！
另外一集訪問「阿牛曾x成」，又話民間電台運作咗18年，終於因為《國安法》要執笠，講到好似冇曬言論自由咁。其實佢哋一開始就立心不良，又歪理連篇，成日講埋曬啲煽動嘢，係佢哋自己驚死，摺埋就真啦！後來訪問劉x熊，佢又copy cat學人講香港將變成「國際金融中心遺址」！ 講咩都假，數字最實際，睇返今年香港股票交投量之大，巳經破曬紀錄，而首次公開募股額(IPO) 更加排世界第一，信佢賣哂啲股票真係要用刀插大脾。佢係咪發緊「夢」呀？佢應該改姓「流」啱啲囉！ 而前「記怯」主席楊x興係訪問話，香港冇曬遊行示威，冇人夠膽再講野，香港冇曬言論同新聞自由喎……「劉大姐」訪問呢班人，俾佢哋喺度不停宣揚唔真實嘅訊息，釋放負能量，對香港有好處咩？
最近「劉大姐」仲出咗本書《樓下》，講到自己要為香港留低，自己係「和理非」（和平、理性、非暴力），好重視年輕人，又話點解冇人拉佢，皆因佢咁多年都冇講獨立、分裂、搞革命同用暴力咁話……我零零發最㷫就係佢呢一樣(成日講反對暴力、珍惜年輕人) ，可能「劉大姐」年紀大、機器壞，佢好似唔記得係2019，雖然佢冇參與暴力活動，但係以佢一個咁有江湖地位嘅「犯民」大姐大，係2019年11月11日有暴徒放火燒李伯時，點解唔出下聲反對暴力？而佢最欣賞嘅其中一隻後起之獸「林X廷」，就係一個極力鼓吹暴力嘅人，如果「劉大姐」有出聲，可能就冇咁多年青人犯法，斷送前程！
我零零發想奉勸「劉大姐」，趁「白鴿黨」散Band好落台，就拿拿聲摺埋個「ChatDP」網台，唔好成日同班領事埋堆，好好享受吓「銀髮」嘅日子。你知喇，都一把年紀，如果一唔留神，隨時會由「樂齡」變成「落零」，孤零零一條友，過埋剩番個幾十年就淒涼喇！
鍾情局‧零零發
