鍾醫師ECmama~ 周公，不要離我太遠(I)

近日多咗好多絲打嚟搵我睇「失眠」，搵ECmama前，慘慘豬「失眠」絲打可睇下以下建議：

失眠原因是來自於工作壓力大? 或是其他內在原因影響?

如果係來自於工作壓力的話，ECmama強烈建議係唔洗黎睇我架！因為食藥針灸都唔會解決到工作上既壓力，絲打們可以選擇做一些令自己非常高興既事情，例如：買下靚衫、食餐好既、或者解決工作壓力源頭。若然被上司話完之後認真諗下係咪自己既錯誤定係上司無理地想發洩一下，前者咪反省下，下次做好D；後者咪左耳入右耳出唔好放係心裡面。有時做下運動，做下家務都可以放鬆心情架！

好啦！做哂以上都係瞓唔到，咁身體真係出現氣血陰陽唔平衡既狀態，首先中醫對於失眠，有D得意既睇法，中醫會分虛同實，虛證通常係漸進式；實證通常係會突然之間就出現。漸進式既虛證常見有血陰虛、氣虛，這類患者通常會日間心不在焉，有時頭重重、頭暈暈，嚴重者會成日都覺得心驚驚、心跳跳咁，好似D老人家成日都話，年紀大瞓得少，就係因為老人家D氣血少左，令到身體出現氣血虛既情況導致失眠；至於另一類患者，通常都會係被人激得太耐，條氣唔順或者食滯左，食得油膩左，個排食得熱氣野多，生日、buffet、飯局多而導致，中醫學有句說話「胃不和，即卧不安。」個胃唔多好，你都唔洗諗瞓得好呀！

所以絲打有失眠情況，不妨先留意一下自己身體有無以上症狀，或者係咪吸收一下正能量，睇下星爺D戲係咪已經有改善？

下一回ECmama 會同大家分享失眠茶療或食療之選。

EC.mama

** 博客文章文責自負,不代表本公司立場 **

(網上圖片)

我好多時都會被問︰「ECmama，我有咩要戒口呀？點解你無張戒口紙俾我地？」講真，我真係覺得你有需要戒口就一定講，例如我的皮膚病人，一般食完或接觸完之後你會痕多左，皮膚紅多左，咪要戒囉！一d絲打經期痛到要CALL SICK，又要啪止痛藥，咪要戒凍野生冷野囉！

不過好多絲打都好鍾意挑戰我既底線，明明知道遊戲規則，係都要同我耍花槍，「EC，今日星期日哦，係咪應該可以飲『一杯』兼『少冰』既凍奶茶呢，話哂今次經期又黎得準，又黎得舒服，好應該獎勵自己ga！」你講到咁樣，我仲話你好似好殘忍咁，更重要既係ECmama都未必次次做得咁足戒口E回事，又點會強求大家呢！

由於我份人好鍾意有獎勵活動（可能生左小朋友關係），所以一d皮膚病人，皮膚症狀有改善兼穩定，我通常都唔洗再戒口，甚至叫佢地食下一d『禁品』。

 

(網上圖片)

「海兒，你係咪好耐無食過朱古力啦，見你今次d痘痘無再出，d印又開始退啦！不如今個星期食下少量朱古力獎勵下啦！心理平衡都好更要ga！」

(網上圖片)

「ECmama ，邊個醫師會叫病人食違禁品架，不過我會接受你既意見！」

戒口e家野，其實大家都心理有數，戒得太盡，人生無意思；唔戒亂食，辛苦自己呀！下次ECmama叫你唔食得既，就真係一定要忍口呀！