Fact Check「猜、情、尋」

 最近三色台有個真相「猜、情、尋」節目，方丈主持摷番啲陳年懸案出嚟，整合新線索去「重組案情」，用新角度去尋找真相，果然有另一番體會!

好似2019年黑暴，有人話係民間自發嘅反政府運動，又有人話係有外國勢力嘅「顏色革命」，究竟邊樣先真？於是我零零發就學吓方丈主持咁，做個黑暴「猜、情、尋」去尋找真相。

為咗發掘真相，我零零發綜合當年嘅媒體報導、國安案件嘅法庭審訊證供，同埋睇咗兩位「顏色革命」元祖嘅天書:美國人Gene Sharp嘅The Method of Nonviolent Action，(講述推動大型「非暴力抗爭」嘅策略) ，以及Robert Helvey嘅 On Strategic Nonviolent Conflict : Thinking About the Fundamentals(成功推翻政權就必定要利用社會支柱，例如：媒體、警察、青少年、宗教同社區/專業組織)。

圖片來源:點新聞

自2000年起，世界各地一共發生過約10次「顏色革命」，而呢啲衝突事件，基本上都用咗兩位「顏色革命」元祖嘅策略，先借社會議題做切入點，以非暴力抗爭嘅手段，令到事件發酵，並且使用特定顏色或物件，作為抗議運動嘅象徵 (例如2004年烏克蘭嘅橙色革命，2010年突尼西亞嘅茉莉花革命)， 去表達不滿。跟著以假新聞、假消息等，再去利用社會支柱，煽動民眾進行暴力「革命」，推倒政權。不如大家玩吓配對，睇下當年發生嘅事，係咪有跡可尋、有路可套呢？

社會議題

2018年台灣發生一宗命案，命案受害人與疑犯同為香港居民，為咗維護法治同公義，香港政府打算將着草返香港嘅通緝犯陳同佳，交番俾台灣審訊，但基於兩地並無司法互助同移交疑犯機制，於是香港政府係2019年2月提出修訂「逃犯條例」，以方便合法移交陳同佳俾台灣。但反政府人士就借機抹黑呢條法例，話政府以後就可以任意將罪犯移交內地，為所欲為咁話，隨後就發生咗大半年嘅黑暴事件。

圖片來源:大公報

運動的象徵

由2019年6月12日開始嘅第一場示威衝突，好多示威者都係着黑衫黑褲，帶黑帽、黑口罩、黃頭盔，黑黃雨傘隨處可見。而最初示威者係針對《逃犯條例》，所以用「反送中」為主要口號。其後，示威者提出五大訴求，於是「五大訴求、缺一不可」，以及後來「光復香港」、「時代革命」、「香港自決」嘅口號，同埋黑/黃色嘅打扮，就成為呢場黑暴嘅象徵標記。

媒體助攻 發放假消息

當年嘅假消息真係荒謬到極，但大部份媒體竟然係冇查證之下，爭相報道，而最出格嘅，就非「生果報」莫屬！當時最離譜嘅假新聞包括「爆眼女」事件、警員新屋嶺性暴力女示威者、831太子站打死人、陳彥霖浮屍以及周梓樂墮樓事件。經死因庭同監警會客觀調查之後，所有事件都冇發現警察有非法嘅行為！

另外，當時嘅三色台就被人刻意標籤為親政府喉舌，於是就被有組織地針對，不但鼓動商戶抽起廣告，叫人罷睇，連採訪新聞嘅記者同車輛，都受到暴徒滋擾，攪到人心惶惶。無他嘅，都係想整個社會變成「單聲道」，操控市民接收資訊，咁就可以為整場暴亂保持熱度！

講返「生果報」班底，「生果佬」有前美角海軍情報局特工肥仔Mark做佢私人助理，又有前本地西報總編Mark Clifford做獨立非執董，外媒「華x街日報」編輯William McGurn更加係佢教父。佢哋全部都係幫「生果佬」串連美西方，利用「生果報」作為反政府嘅宣傳機器。喺黑暴期間，「生果佬」鼓吹「和勇不分」，想全面控制各派反對勢力，實行攬炒香港。睇番當時「生果報」搧風點火嘅標題:「西環亂放催淚彈居民開飯遭煙攻」、「旺角清場濫傷濫捕無辜」、「揭警涉輪姦女示威者醫生遭恐嚇滅口」……就知啦!

圖片來源:文匯報

打擊警察公信力

喺黑暴期間，媒體除咗有偏頗報道之外，係網絡更加無底線咁發放假資訊、抹黑警察濫用暴力、性侵示威者、濫捕，以圖激起仇警情緒。

另一方面，暴徒仲向警察家人埋手，去佢哋住嘅宿舍投擲汽油彈，係網上將家人起底，去學校騷擾啲仔女，製造恐慌。加上當年兩度包圍警察總部、多次攻擊不同警署，目的都係想動搖警方執法嘅推動力同信念，打跨呢條保護社會嘅支柱！

圖片來源:文匯報

摧毀青少年

黑暴期間嘅青少年，甚至係佢哋嘅老師，好多由細到大都係受到「犯民」同「生果報」嘅影響，潛藏著反政府嘅思維。當時每間大學都有反政府示威，但其中以理工大學、中文大學同浸會大學嘅暴力情況，簡直超乎想像! 喺這些大學檢獲汽油彈數以萬計，成個軍火庫咁!高人點醒零零發，話呢啲係有心人嘅策略性部署，因為呢3間大學所處嘅地理位置，全部都係交通要道，可以直接癱瘓整個香港，理工大學嘅暴亂就攪到紅隧火光紅紅，去九龍同香港各區交通即時停頓；中文大學二號橋嘅堵塞，就令到去新界北嘅吐露港公路交通停滯；浸會大學就位近獅子山隧道，係另一條新界去九龍、港島嘅主要幹道。部署到好似打仗咁，我零零發唔信係咁啱囉! 不過吊詭嘅事係，大部份喺大學被捕嘅人，根本就唔係大學生！

另外，唔少中學生都被鼓動以所謂和平抗爭去參與呢場動亂，例如9月開學之後，去「築人鏈」、靜坐、罷課，其中更有11間名校號召黎明行動，塞爆全港，企圖堵路癱瘓交通!

線人話比零零發知，黑暴期間拉咗3600幾個學生，有超過一半係大學生；另外亦有過百名老師同社工被補；加上當時有「在位」教育界議員，不斷包庇失德教師、對問題教材，黑暴問題又視而不見，令到好多青年人犯法，斷送前程，長遠亦都動搖咗香港幾代社會棟樑，令社會人材斷層，你話呢啲人幾惡毒呢!

圖片來源:維基百科

利用宗教 蠱惑信徒

無論媒體同法庭審訊，都揭露咗陳x君當上主教後，高調同「犯民」、「生果佬」埋堆，參加所有大大小小嘅遊行示威，又收「生果佬」成2000幾萬，要知道天主教係香港主流宗教，信徒眾多，咁樣嘅所謂宗教領袖，究竟蠱惑咗幾多人心？

黑暴期間，好多宗教團體，除咗以唱聖詩為名舉行集會，阻撓警方執法，又曾發起過「和你拖＋和你唱詩歌祈禱」人鏈活動，包圍聖約翰座堂，大聲唱黑暴歌，向座堂內教徒施壓。而係灣仔遊行熱點嘅「循道會」教堂，就俾暴徒係度換衫同儲存物資；天水圍「宣道會」幼兒學校同黃大仙天主教小學內教堂，就公然開放作為暴徒休息站…… 宗教唔係應該導人向善㗎咩? 點解佢哋不單止唔譴責、制止暴力，仲參與其中去延續暴亂？究竟班教徒收咗咩訊息會咁樣做？

圖片來源:星島日報

運用社區/專業組織 煽動民眾

社區組織本來係提供服務比基層市民，但黑暴期間，好多社區組織，好似「香港社會服務聯會」、「香港社區組織協會」、「香港失明人協進會」等等，除咗借出服務處比暴徒休息，更係面書同新聞稿，無理指摘政府同警方。

而其他嘅專業組織，好似「教協」，就組織教育界集會及煽動學生參與暴動，而「香港社會工作者總工會」，就組織業界到現場支援暴徒，「國泰航空公司空中服務員工會」及「職工盟」，就動員大罷工，總之就營造到社會各階層及不同行業，都參與反政府嘅現象，為暴亂做勢！

黑暴初期嘅主旋律，都聲稱係「非暴力抗爭」，但之後嘅暴力破壞，完全係跟住「顏色革命」嘅劇本走，而且真係「五大支柱、缺一不可」!大家真係相信2019黑暴係因為修訂「逃犯條例」而自發嘅所謂「社會運動」？冇大台？冇幕後黑手？大家不妨自己去 「猜、情、尋」，去尋找下真相喇！

鍾情局•零零發

鍾情局

** 博客文章文責自負,不代表本公司立場 **

零零發留意到近期黃圈煲緊嘅話題，就係喺香港劇壇大喊委屈、自封受害者嘅編劇「莊X岩」。無論係本地黃媒、黃KOL，定係移居海外嘅黃人，甚至潛逃海外嗰啲國安通緝犯好似「衣冠聰」、「任建瘋」等等，都爭相發文、開咪力撐「莊X岩」。海內外嘅黃圈都咁關心咁支持佢，究竟係咩因由呢? 佢究竟係何許人？

「莊X岩」1976年喺福建出生，爸爸係福建傳統戲曲「梨園戲」嘅導演，媽咪就喺當地做小學老師，佢3歲跟住父母嚟香港，父母紆尊降貴做保安、工廠工人捱世界。「莊X岩」遺傳到爸爸嘅藝術基因，自小發掘到自己嘅興趣同天份，頻頻參加短劇導演兼編劇活動同比賽。喺香港中學同大學畢業之後，去咗演藝學院進修編劇深造文憑。佢曾經喺「亞洲電視」做暑期工，任職撰稿員，後來又曾經喺政府資助嘅「中英劇團」擔正做全職編劇。佢之後去咗英國讀戲劇碩士，返嚟之後一直活躍於本地舞台劇界，曾經攞嗰吓啲編劇、藝術家之類嘅獎，喺行內都叫做有啲名氣。

但可惜「莊X岩」利用佢嘅藝術光環，去不斷宣揚反政府訊息。自2014年非法佔中事件開始，佢就先後加入不同反政府組織，首先係加入咗由歌女「河粉詩」同「黃妖明」牽頭召集、專門抹黑警察濫用武力嘅所謂「文化界監察暴力行動組」，之後再擔任「藝界起動」主席，借自己嘅名氣凝聚演藝界嘅反政府聲音，呼籲藝術工作者要邊寫劇本、邊反政府。睇到呢度，大家覺得，「莊X岩」究竟係搞藝術，定係搞政治呢？

去到2019年，「莊X岩」夥拍「六四舞台」推出舞台劇《5月35日》，以偏頗嘅角度去詮釋「八九風波」，以煽情嘅手法令觀眾對內地產生反感及質疑。呢套劇食住當時黑暴嘅氛圍，大獲黃人支持。事實上，「六四舞台」同已解散嘅反中亂港組織「支聯會」關係密切，兩者均長期以「八九風波」煽動群眾仇恨內地。「六四舞台」自2009年創立以嚟，不斷炮制抹黑「八九風波」嘅舞台劇，當時佢哋每年平均去40間本地學校巡迴演出，都唔知已經洗咗幾多學生哥嘅腦。直到2021年《國安法》實施後，「六四舞台」隨即解散收場。所以教育界真係要打醒十二分精神，唔好再比啲掛羊頭賣狗肉嘅人，以藝術之名，入校園播毒。

講開又講，呢套舞台劇當年係靠康文署提供場地同資助先有得演出，而攞嘅獎，又係靠香港電台同香港戲劇協會頒嘅；可以講「莊X岩」當時係用公帑去反政府，離譜到咁都過到版，咁而家都應該撥亂反正喇啩?!

2019年黑暴期間，「莊X岩」曾經接受黃媒訪問，除咗承認自己有份站喺最前線之外，仲喺度大肆抹黑修例係「施政大倒退」，當時特首係「罪魁禍首」，誣衊內地係「獨裁政權明目張膽干預」，佢嘅反政府言論大膽到令人側目。

《羊村繪本》案唔知大家仲記唔記得？喺2020年，幾個言語治療師出咗套以虛假訊息煽動仇恨嘅兒童繪本，將內地比喻成「狼」，港人比喻成「羊」，話啲狼會捉走羊群，叫羊群要對抗反擊，企圖向心智未成熟嘅小朋友灌輸仇恨國家情緒、鼓吹暴力。最終，發佈繪本嘅5個香港言語治療師總工會理事，就因為「串謀發佈煽動刊物」被定罪同判囚19個月，「莊X岩」當時立即轉載被告喺法庭上面發表毫無悔意嘅陳情全文，仲寫話「優秀的人若不是移居了就是在牢房裡」，又叫入獄嘅被告加油。「莊X岩」不愧係編劇老手，佢竟然可以將著草、坐監嘅「韭菜」，包裝成「優秀」嘅「英雄」，咁都作得出，服咗你啦﹗

「莊X岩」除咗撐《羊村繪本》之外，佢仲同黃書店「一權書館」好鬼friend。過去幾年佢都出咗幾黃本書，好似《野豬》呢本嘢，就係暗串政權官商勾結、知情人士被失蹤等等。而每逢佢出新書，「一權」就會即刻幫佢喺社交媒體宣傳，又大搞分享會、簽名會，大家圍爐取暖。

「莊X岩」一直未停過反政府同「軟對抗」，但今時今日嘅社會，已經唔接受佢呢啲「偽術」行為，於是佢就「受害者」上身，話自己被封殺，連post三篇千字文大喊委屈。佢第一篇千字文，話自己幫母校演藝學院拍嘅舊生訪問被抽起，被無故打壓。第二篇就話母校要佢將音樂劇黃黑色(黑暴嘅corporate colour)嘅海報改色，批評母校干預佢嘅創作。第三篇就話佢原定年底喺西九文化區上演嘅舞台劇被取消，加上有師弟妹用佢舊劇本申請政府資助失敗，話自己被封殺好委屈……「莊X岩」呢啲「喊冤行為偽術」，堪稱教科書級示範，演技真係「由外到內，再由內到返外」，戲味十足。不過睇番佢豐厚同未停過嘅「往績」，我零零發覺得，佢絶對唔係無辜，甚至可以話係咎由自取。

香港作為國際級城市，一直都積極推動藝術創作，為大大小小本地藝術家提供資金、場地，俾機會佢地踏上國際舞台，但唔可以借藝術之名，搞亂香港、荼毒下一代囉! 講句公道話，香港演藝學院喺世界大學表演藝術類名列全亞洲第2位、全球第20位，作為國際頂尖學府，點會戇居居陪你「打擦邊球」呀？

鍾情局‧零零發