北訪前夕 搞直通車

在立法會議員北訪前夕，李克強總理突然宣布兩地股市「互聯互通」，睇嚟阿爺都要為會晤造吓氣氛喎。

唔熟財經的朋友可能無留意，港交所隻股票今日上午本來有交易，到10幾仲跌咗1.1%，然後在李總理在海南博鰲論壇講到兩地股市「互聯互通」時，港交所才急急停牌。由呢個中途停牌的行徑，就知港交所事前唔知阿爺會在今天講「互聯互通」，否則一早就停咗牌啦。

「互聯互通」係雙向直通車，大陸人可以買港股，香港人可以買大陸股，對香港當然係大好事，應可以引北水來港，大大加大本地股市的深度，同時又令香港變成外資買內地股票的橋樑，兩頭都有水食。

心水清人士問，點解呢單嘢咁急急腳公布，Ariel答係唔係因為開博鰲論壇搵啲嘢講？熟悉政情人士話至多中一半，另一半原因似乎係趕在周末議員訪問上海前公布。

兩地股市「互聯互通」，你中有我，我中有你，阿爺以政策支持香港的味道亦極濃。立法會議員去上海訪問，阿爺好難制止佢地做大龍鳯，但若然市民好like阿爺對港政策，又會唔會唔多老黎議員玩阿爺呢？

Ariel

** 博客文章文責自負,不代表本公司立場 **

前政務司司長唐英年位於九龍塘大宅僭建地庫一案昨日審結，三名工程師、建築師被告罪名全部不成立，從裁判官判詞睇，屋宇署係唔係有濫告之嫌呢?

件事係咁，唐唐大宅有僭建，早前唐太已認了較輕的僭建罪名。而被政府分開告的工程師和建築師，告佢地的是「明知而作出失實陳述」，違反《建築物條例》，即係明係想起僭建物，入則申請時卻騙了政府。呢啲控罪唔止係僭建，仲係一早部署好騙政府，所以嚴重過唐太認了那種僭建罪名。

結果裁判官裁定全部控罪都告唔入，不接納控方專家證人及普通證人的證供。裁判官話屋宇署人員在工程期間，進行個12次調查，若早有僭建工程，應不會逃過屋宇署視察職員的眼皮。

結論係法官認為屋宇署當日驗樓咁多次無發現，如今只以一些間接證詞去告人咁嚴重的罪名，不能入罪。

先不論這件案件當日咁政治性，單睇僭建嘢告到咁嚴重罪名，事後又證明唔夠料，當事人卻捱官司擔驚受怕咗咁長時間，非常擾民，屋宇署要孭鑊。經一事長一智，以後呢啲僭建嘢政府係唔係唔應該濫告咁嚴重的罪名呢?