前政務司司長唐英年位於九龍塘大宅僭建地庫一案昨日審結，三名工程師、建築師被告罪名全部不成立，從裁判官判詞睇，屋宇署係唔係有濫告之嫌呢?
件事係咁，唐唐大宅有僭建，早前唐太已認了較輕的僭建罪名。而被政府分開告的工程師和建築師，告佢地的是「明知而作出失實陳述」，違反《建築物條例》，即係明係想起僭建物，入則申請時卻騙了政府。呢啲控罪唔止係僭建，仲係一早部署好騙政府，所以嚴重過唐太認了那種僭建罪名。
結果裁判官裁定全部控罪都告唔入，不接納控方專家證人及普通證人的證供。裁判官話屋宇署人員在工程期間，進行個12次調查，若早有僭建工程，應不會逃過屋宇署視察職員的眼皮。
結論係法官認為屋宇署當日驗樓咁多次無發現，如今只以一些間接證詞去告人咁嚴重的罪名，不能入罪。
先不論這件案件當日咁政治性，單睇僭建嘢告到咁嚴重罪名，事後又證明唔夠料，當事人卻捱官司擔驚受怕咗咁長時間，非常擾民，屋宇署要孭鑊。經一事長一智，以後呢啲僭建嘢政府係唔係唔應該濫告咁嚴重的罪名呢?
Ariel
** 博客文章文責自負,不代表本公司立場 **
一年一度的拉布遊戲又嚟啦，大家埋嚟睇埋嚟玩。立法會明天開始議員開始就預算案發言，但要進入逐條修正案審議的委員會審議階段，最快就到要下星期才開始，呢啲修正案即係可以亂咁提玩拉布的部份。立法會秘書處收到過1917項政預算案撥款的修正案，比去年多出超過一倍。當然絕絕絕絕大部份係改吓字眼的拉布提案，不過論數量都幾大堆頭啦。
若論危險去年的環境危險過今年，一來立法會無處理拉布的先例，怕搞唔好出大事件。二來政府新上任腳震震，怕借傷成毒搞到倒台。今年立法會已有剪布先例，加上財爺雖然無乜派錢，但施政報告派俾低下階層派咗好多，基層民怨不太強，剪布反彈有限。
所以財爺人馬都唔係好擔心，未當拉布係一場重大挑戰，反正立法會已通過臨時撥款，政府可以頂得一段時間。不過官員雖然唔怕拉布拉死預算案，但都怕聽日議員唔生性，行出行入，搞到流會就有排煩，又要下次再開會，如果未進入委員審議階段已流會，咁就連布都未開始正式拉都唔掂，唔好話係咪會剪布囉。
開始拉布，波又去到立法會主席腳下啦，當然曾主席深明，布不是可以隨便剪的，你要俾佢發生，俾佢拖延，俾佢拉上拉落，俾佢搞到議員同記者同官員都筋疲力盡時，雖然大家口講唔好，但個心都不知幾想你剪布時，才可以落剪。不過曾主席今次準備出手之前，記得關好咪，才同人傾密偈，唔好又出現去年那句「返黎就郁啦」的金句呀。
