國際貨幣基金組織(IMF)代表日前話，港府可因應市場正常化撤銷印花稅，若市況出現急速調整，可以加快撤銷步伐。財爺就話咗，當市場正常化時，政府會跟隨市場作出決定，目前並非時機，相關的草案亦未通過。
雖然財爺係咁講，但國基會咁講引起唔少人想走去問吓，政府係咪可以考慮部署撤辣招呢？！據聞政府的評估都認為，目前不太可能撤招，雖然一籃子呢個詞俾人用多咗，但考慮時都真係需要有若干因素，包括失業率急升番、負資產大幅增加等，先至有條件考慮。
至於係咪會撤DSD(雙倍印花稅)先，口痕友就話財爺私下被問到時都話過，將來有條件撤招時，正路都會係從最影響港人的DSD考慮，至於BSD（買家印花稅）係針對非港人買家，其實講白一啲，多數都係內地人買香港樓，依家中港矛盾的現實下，睇怕呢招都最後先考慮撤，都屬合理。
不過，知情人士就話呢啲都係理論上的考慮，依家基本都唔具備要考慮撤壓抑樓市辣招的條件。
Ariel
** 博客文章文責自負,不代表本公司立場 **
在立法會議員北訪前夕，李克強總理突然宣布兩地股市「互聯互通」，睇嚟阿爺都要為會晤造吓氣氛喎。
唔熟財經的朋友可能無留意，港交所隻股票今日上午本來有交易，到10幾仲跌咗1.1%，然後在李總理在海南博鰲論壇講到兩地股市「互聯互通」時，港交所才急急停牌。由呢個中途停牌的行徑，就知港交所事前唔知阿爺會在今天講「互聯互通」，否則一早就停咗牌啦。
「互聯互通」係雙向直通車，大陸人可以買港股，香港人可以買大陸股，對香港當然係大好事，應可以引北水來港，大大加大本地股市的深度，同時又令香港變成外資買內地股票的橋樑，兩頭都有水食。
心水清人士問，點解呢單嘢咁急急腳公布，Ariel答係唔係因為開博鰲論壇搵啲嘢講？熟悉政情人士話至多中一半，另一半原因似乎係趕在周末議員訪問上海前公布。
兩地股市「互聯互通」，你中有我，我中有你，阿爺以政策支持香港的味道亦極濃。立法會議員去上海訪問，阿爺好難制止佢地做大龍鳯，但若然市民好like阿爺對港政策，又會唔會唔多老黎議員玩阿爺呢？
