高鐵如今宣布延誤至少９個月，Ariel有少少擔心佢延遲一年都未掂，恐怕港鐵亦一早知道出咗問題，過去唔肯認，等到上月連場大雨加落雹後，咁就借黑雨過橋，搵啱時候先至認延期。
延期最大問題係超支，政府當日撥咗669億元起高鐵，當中鐵路工程佔550億，非鐵路工程佔118億，如今就係呢550億鐵路工程出咗問題，唔使問會唔會超支， 係一定會超支。而家人工咁貴，做多一日貴一日啦。由於港鐵將工程判咗出街，舊年承建商已放晒料出街，又話港鐵設計有問題，又話港鐵多嘢改搞到遲晒，呢啲都係承建商打定底想索償的前奏。
記者問張炳良局長高鐵會唔會超支，超支邊個俾，局長答唔到，話等緊詳細報告，未有具體嘢可以講。
高鐵超支呢條數唔易孭，最可能孭數的是政府或港鐵，當日政府攞到撥款後判咗俾港鐵做鐵路工程，超支邊個俾第一睇合約，第二睇現實上邊個俾得到，因為無論合約點寫，都要現實上攞到錢去找數先至得。
理論上政府最有錢，最易俾。但照目前走勢，高鐵項目超40、50億閒閒地，超過百億都唔奇，當日立法會批港鐵撥款時己搞到差不多過唔到，如今再去立法會攞過百億，咪等如送死? 建制派都唔肯硬撐。 現實上無理由俾工程爛尾，但趣趣地要搵番一兩個人頭落地，先過到立法會呢關。雖然成件事由上任運輸局局長鄭汝樺開始，但燒起上來，現任張局長又有無監管不力之責呢?
諗起去立法會咁頭痛，不如叫港鐵啃咗佢算啦，但港鐵又唔易啃得落，港鐵去年盈利130億，去年底時資產淨值1526億，假設要賠100億，差不多唔見咗成年盈利，唔見6%資產淨值。嘩，港鐵若然會輸咁多錢，首先要發盈警，然後主要管理層難免要下台向股東交待喎，咁賠法可行性一樣咁低。而且政府佔港鐵75%股權，叫港鐵賠納稅人仍然要輸75%，港鐵小股東陪輸25%，勝在不用過立法會，但納稅人要找數的本質仍然無變。
結論高鐵延期加超支，係一個大炸彈喎。
Ariel
** 博客文章文責自負,不代表本公司立場 **
花旗集團舉辦的傑出財經新聞獎今日舉行頒獎禮，評審包括前商務經濟局局長馬時亨和行政會議成員陳智思，席間陳智思被追問會否參選下屆特首，頗有「顧左右而言他」之勢，倒是Fit馬馬時亨比較多嘢講，但似乎主要為佢兄弟梁錦松參選吹淡風。
馬時亨與陳智思
Fit馬話佢想做阿松的競選辦主任，但好可能失業，因為阿松從沒有表態想去馬參選。佢又話2017年特首選舉方式未定，好似個馬場都未起好，而家話去參賽為時尚早。雖然Fit馬講得輕描淡寫，但佢為阿松參選吹淡風、想冷卻外間期望的態勢，十分明顯。
在座者話既然阿松唔選，不如Fit馬唔好做「馬拉松」，自己出來參選仲好？Fit馬即時擰頭，仲話邊個亂寫就要「殺咗佢」咁話。
另外花旗今屆的傑出財經新聞獎冠軍由《東周刊》財經組記者歐陽慧恩奪得，她獲得一個到美國哥倫比亞大學作十天交流訪問的機會。
左一為獲得冠軍的東周刊記者歐陽慧恩
