長毛掟財爺陰司紙無品

昨日立法會都幾熱鬧，幾劑嘢都有議員熱議，好似審計報告射中盛事基金評審委員會主席林健鋒、財政預算審議延後、以及財爺曾俊華俾長毛掟陰司紙時口頭還拖。

當時大家睇往成件事發生，長毛做例行出位表演，今次玩陰司紙，主題係如果財爺攞出500億元給老人家，佢就不會拉布。口號係「我有1000億(陰司紙)你要唔要呀！」佢一路叫一路衝向財爺，跟住兜口兜面向財爺掟陰司紙，曾俊華就回應咗一句：「行開啦！」最終長毛被逐離會議廳 。

議員們議論的是鬍鬚曾以「好老脾」見稱，之前落區俾人掟蛋掟中都笑笑口，今次點解咁大反應?

結論係「人善俾人欺」，財爺好人，長毛蝦得就蝦，對財爺的示威行動都相當過份，好似今次兜口兜面掟財爺陰司紙，完全無理人地的感受。

唉，Ariel就覺得長毛次次都離座示威，慢慢變咗例行公事，佢都要搞創意，所以示威物品次次唔同，爭取曝光。長毛今次口講爭取的是政府向老人派錢，但唔該佢問吓老人家贊唔贊成佢搵陰司紙掟人，老人家喺電視見到陰司紙係咁飄都唔開胃啦，呢啲嘢好棹忌。記得舊年11月TVB台慶，長毛去TVB門口撒溪錢，無幾耐邵老六就過埋身，呢單嘢無記中人講到而家。長毛示威唔該有品啲啦。

Ariel

** 博客文章文責自負,不代表本公司立場 **

政改首階段諮詢進入倒數階段，仲有唔夠一個月結束，宣傳廣告內容的側重點有所不同，最新的廣告搞新思，重點係想講的訊息今次講得好白喇。

 

最初政改三官員粉墨登場，宣傳的重點強調係有商有量，後來轉為強調要依基本法框架。

 

新一輪廣告由行政會議成員陳智思擔正，宣傳的Tone用反面去講，舉例兩隊人踢球，其中有球員帶波上前時，出咗界，又將個波帶番入球場內射入對方龍門，俾人入波果隊的球員就質疑個波出咗界都繼續踢，唔跟球例咁點踢啫。

之後就由陳智思出場話，落實普選就好似踢波咁，要根據基本法，如果偏離基本法的規定的普選方案，好可能受到法律挑戰，難得到社會認同，到時就冇辦法2017年一人一票選特首。

 

係咪講到好白呢，而且踢波比喻好似熟口熟面喎，去年全國人大常委會副秘書長李飛兼香港基本法委員會主任李飛來港時，就曾經用過呢類比喻，話踢足球要在足球場上踢，不可在場外踢。

 

唔知政改小組，係咪果時已諗到用呢條轎嚟拍宣傳片呢？