《綻放》作為劉浩龍加入新公司後的首支作品，在演唱會演唱時師兄早向在場Fans揭曉歌曲是與樂迷有密切關係：「我希望嚟緊呢首新歌將會成為以後我哋開 Show 都會唱嘅大合唱歌，係代表我同你哋嘅一首歌。」《綻放》歌詞給人圍繞愛情主題的感覺，師兄表示雖然如此，但當自己在演唱會綵排望向觀眾席時，不期然便將歌中「伴侶」的情感投射於一路以來對自己不捨不棄的Fans們身上：「一班Fans就好似我嘅伴侶咁，一直陪我行落去！」因而師兄才決定將《綻放》視作與樂迷們間的連結。
《UNITED IN HEARTS 劉浩龍2026演唱會》昨晚（8月1日）在麥花臣場館圓滿完成，全場爆滿，師兄的一眾好友包括陳奕迅、梁漢文、林家棟、彭健新、林盛斌、郭偉亮、葉佩雯、方力申、鄧健明、吳國敬、鄭希怡、黃伊汶、陳國坤、徐智勇（小肥）、王秀琳、陳國峰、陳慧敏、蔡宛珊、許惠菁、王鎮泉、庄嘉慧、王海榛、193郭嘉駿、Delta T等均有現身捧場。
師兄續言：「多謝今晚嚟嘅朋友，其實呢個Show嚟得好急，只係用咗兩個幾月嘅時間就做咗呢個Show，真係好多謝你哋真金白銀買飛支持我，先可以咁急開到呢個Show，再一次多謝你哋。個Show個名叫《UNITED IN HEARTS》，中文名就可以叫做《心連心》，又或者係《心心雙印》，我希望可以同我嘅Fans永遠都係Connect住，有啲Fans十幾歲跟我到而家跟咗廿幾年，到而家都咁支持我，好多謝你哋。近期有小朋友同我講開始聽我嘅歌，可能呢班小朋友當我係一個新人同我去Connect，所以今晚 《UNITED IN HEARTS》就係希望大家個心再一次同師兄劉浩龍一齊Connect。」
《緋聞男友》、《舊人》、《我信的故事》後便是快歌Medley環節，多位小朋友聯同今次演唱會吉祥物現身台上唱出《Feel so right》，師兄接力獻唱《越夜越有機》、《重口味》、《廣橋道fans殺人事件》和《餓狼傳說》，舞台大屏幕更播放師兄當年參加第一屆《全球華人新秀歌唱大賽》香港區選拔賽時的精彩經典畫面，讓大家重溫師兄的青春歲月。
師兄又透露將會與Sony Music合作，「頭先講過我嚟緊都會同新嘅唱片公司合作，呢間公司就係Sony Music ，本來係未開呢個Show之前就應該派咗以下呢首歌，但有好多嘢唔可以預算得咁好，昨日終於收到呢首歌嘅Master，佢哋問我今日有冇信心唱比大家聽，我都覺得乜都唔好理，唱咗呢首新鮮滾熱辣嘅歌比你哋聽先，頭先果首《戰友》就好似咁多年你哋Fans同我溝通嘅橋樑，但我希望嚟緊呢首新歌將會成為以後我哋開Show都會唱嘅大合唱歌，係代表我同你哋嘅一首歌。希望你哋可以開晒你哋嘅電話燈，因為會預埋你哋一齊拍呢首歌嘅MV，所以唔好淨係拎住個電話拍片，大家著埋盞燈好冇？如果我見到邊個掛住拍片唔著燈，我就會黑佢面㗎啦，準備好晒未？呢首新歌就係叫做《綻放》。」
