民建聯終於出招，提出普選方案。簡單來說，方案同阿爺的保守版本好接近。建議提委會人數可增加至1600人，準候選人要獲逾半成員支持，才可以出閘。民建聯的方案可說是大路兼保守版本。
早前泛民已經提出了兩個方案，由陳四萬打頭陣，十八位學者跟住上。泛民方案重點在有少部份提名委員提名就可出賽。陳四萬嘅「2020方案」，建議擴大提委會選民基礎，加入「分區提名委員」317個席位。參選人獲得十分之一的提委員會委員提名，就可以入閘。18學者方案則提議以「公民推薦」方式提名的特首候選人，候選者只需取得2至3%選民、即約7至10萬人推薦，再獲提委會八份之一委員提名，就可以參選特首。
至於本地商界，五大商會年初已經表態，認同普選行政長官必須符合《基本法》與全國人大常委會的相關解釋及決定。暗示要提委會過半數。
現時的局面係泛民派先出方案，商會同民建聯從後趕上。兩派的方案如同兩極，四萬方案在一極，民建聯方案在另一極，大纜都扯唔埋。結論就係水晶咁清晰，若然兩派互不相讓，政改無可能在立法會獲得三份之二的議員通過，香港政制只能原地踏步。
往後會否出現變局，關鍵係泛民肯唔肯同阿爺埋枱傾！中聯辦曉明哥，早陣子時話會約見冇去上海嘅泛民議員傾政改。佢此前已出招話阿爺「從來無講過所有泛民團體都不愛國愛港」，下一步係睇泛民會唔會出招回應，拉近距離啦。
Ariel
** 博客文章文責自負,不代表本公司立場 **
審計署一把火點著盛事基金，尤其一條條醒獅，唔單止身為基金評審委員會主席、經民聯的林健鋒有排煩，龍獅節的負責人、民建聯的陳鑑林都喺風眼上，睇怕呢次件事有排燒。
政壇高人估計，政府可以做的事情唔多，能否過關，就要睇鑑林手上係唔係有單有據，向公眾解唔到畫喇。至於林主席都可能有責任，因為成件事俾外界感覺，監管真係馬虎同粗疏。
其實去年已傳出審計署可能查盛事基金，政壇高人都話好奇怪，照計盛事基金應該都知俾人查，亦應該聞到審計署公布報告的日子架，但就好似冇乜準備咁，林主席當天唔即時回應，難怪公眾感覺唔好。
政壇高人話，相信呢次事件建制派都會幾傷，立法會到時玩權力及特權法查盛事基金，民建聯同經民聯實俾人嘈，有利益衝突，應該要避席不能投票，咁就好難夠票反對用特權法囉。自由黨對林主席都唔會太客氣，亦睇唔到會賣民建聯的帳，到時就真係大龍鳳啦。
至於最後拆唔拆得掂，就要睇負責的人自己解決，如果計劃書做大咗，咁攞的撥款點樣使，係咪有受薪員工收多咗錢，如果全部有單有據，就可能過到關，如果當中有中飽私囊，就神仙難救啦。
