前財政司長梁錦松昨日去教育學院與學生對話，有學生問阿松會否參與2017年特首選舉，佢笑稱「無這個計劃」。之前係阿松老友馬時亨改口代阿松放風話佢不會選，呢次係阿松親口講無計劃去選。
林鄭和阿松過去都對參選特首不置可否，但近期突然都話無打算參選，咁橋差唔多時候講，真係異象。仲有仲有，稍早之前放出中央屬意特首CY連任的消息，幾個異象係唔係有關連?
曾經搞過特首選舉的資深政界人士睇咗阿松昨日的講話，話唔信阿松真唔選，因為唔選的人唔會咁講嘢。
阿松而家係南豐集團行政總裁，但近期頻頻曝光，唔係講地產，而係玩曝光。先是在上月以國際金融專家身分出席特區政府舉辦的《基本法》研討會，昨日又到教育學院同學生對話，講全球化同教育。若然唔係想選特首，又有無咁神心週之無日出來講同自己工作無關係的事情?
為拗而拗，阿松會唔會近日才決定唔選，但演講一早定咗? 資深政界人士睇吓阿松講乜，有幾句好有暗示。第一句係話「年輕人要學習反敗為勝」。阿松在2003年被指「偷步買車」而黯然下台，如今講「反敗為勝」似係講緊自己。佢離開政府後做番高級打工仔，在事業上無問題，他之敗只敗在政治上。要反敗，自然要在政壇上行番起身啦。
資深政界人士留意到阿松第二句話是「有才無德」。前政務司長唐英年早前講過期望有才德兼備的人參選特首，阿松昨日再講，指歷史上有很多書都說過「有才無德的人是最危險的」，又話自己請人時寧要一個有德無才的人，「最少他不會做壞事」。會後記者追問他梁振英是否有才無德，他沒有回應。
呢吓「沒有回應」可圈可點，普通一個商界CEO，如果有人話你講話影射到特首喎，我估佢會發聲明澄清囉。阿松就選擇不回應，背後含義又屬於「你懂的」範疇。所以資深政界人士認為，就算阿松的講座一早約好，若他真正無意參選，可以風花雲月，唔使咁樣「頂到行」。
如此看來，故仔大概係咁。早前各方人馬大力吹自己會選下屆特首，當CY無到，客觀上亦損害現屆政府的威信。所以無論阿爺也好，支持這些有意參選人的幕後人也好，叫大家暫時唔好玩得太過份，所以這些出賽人馬就突然改口。不過佢地口講唔選，大家最好信往一成先啦。
Ariel
** 博客文章文責自負,不代表本公司立場 **
3年零8個月，菲律賓人質事件叫做有咗個結果，死難者家屬同傷者形容，非最圓滿，但都接受。 Ariel向知情人士索料，得悉談判到最後一刻，其中一個關鍵，係雙方終於接受協議上菲方用「most sorrowful regret」字眼，而唔係家屬同傷者最初要求的「sorry」及「apologize」的字眼，而殉職領隊謝廷駿的哥哥謝志堅話，佢地同菲方官員會面時，菲方官員口頭上有「sorry」及「apologize」的道歉字眼。最後佢地接受菲方的道歉，希望事件告一段落。
呢個結果都可謂爭取到最後一刻，昨日特首辦主任邱騰華同保安局局黎棟國，同家屬以及傷者一直傾到凌晨點幾兩點鐘，終於達至共識，據聞特區政府主要係向家屬力陳，依家爭取的方案是最後方案，好難會攞到更多嘢，加上菲律賓選舉在即，如果呢次唔要菲方呢個方案，選舉後可能有好多變數。當然特區政府官員亦向家屬表示，如果佢哋唔接呢個方案，政府係會尊重佢哋的意見。
知情人士拆局，最後大家願意中間落墨，接受一個唔圓滿的結果，主要係依形勢來看，選擇唔接受呢個方案，個局好難行落去。港府一早話過，解決人質事件，一定要係家屬同傷者接受的方案，如果佢哋唔接受，港府就只能展開第二波的制裁，但港府手上的牌並唔多，要再制裁只能從輸入菲傭入手，呢個方法唔係好傷到菲政府，但就大大傷到無辜的菲傭，更傷到有需要的香港家庭，到時本地民意會唔會有變呢? 政府同家屬、傷者都要考慮呢個可能。
更坦白啲講，雙方拉倒的話，以菲方的行事方法，呢個解決方案必定俾佢爆出街，以示佢地已經盡咗力。到時香港市民會唔會覺得呢個方案都勉強可以接受呀，但家屬唔接受，先至要強行制裁菲傭，咁樣民意可能會反彈，家屬同政府都要面對好大壓力。就差一個強烈啲的道歉宇眼，成件事解決唔到，將來要再談判，都真係好難。喺最後關頭，家屬同傷者都係以大局為重，接受方案，令各方都舒了一口氣。
喺談判過程中，有知情者慨嘆，菲律賓真係一個好難纏的國家，國內亦分咗三派，軍隊、外交同內閣三個勢力，今次最唔想同香港傾的係外交勢力，反而軍隊同內閣都想快啲解決，呢舖香港若果唔係有阿爺支持，都真係好難同佢哋交手。
