大班傳媒老總上北京，第一大騷係見國家副主席李源潮，佢係主管港澳事務的港澳工作協調小組副組長，一班老總當然唔放過問過夠本。
早前中央宣布，原定九月喺香港召開的APEC財長會議延期轉到北京舉行，唔少政界人士都估可能同佔中有關。
李源潮今日被問到時就解畫話，移師唔係國內因素，主要係其他國家領導強烈要求改時間，由於香港酒店等安排，需要一年前預備，所以阿爺就決定移師北京。
有其他國家領導要求改時間，一啲唔出奇，凡係舉辦呢類國際會議，要遷就咁多國家官員，少啲協調能力都難應付，但中央政府應該好有呢方面經驗，照計唔會搞到改地方。會唔會順手推舟，既可滿足呢啲外國政要的要求，又可以避開喺香港開會，萬一面對佔中的不可測的局面，可以無後顧之憂出手呢？
Ariel
** 博客文章文責自負,不代表本公司立場 **
前財政司長梁錦松昨日去教育學院與學生對話，有學生問阿松會否參與2017年特首選舉，佢笑稱「無這個計劃」。之前係阿松老友馬時亨改口代阿松放風話佢不會選，呢次係阿松親口講無計劃去選。
林鄭和阿松過去都對參選特首不置可否，但近期突然都話無打算參選，咁橋差唔多時候講，真係異象。仲有仲有，稍早之前放出中央屬意特首CY連任的消息，幾個異象係唔係有關連?
曾經搞過特首選舉的資深政界人士睇咗阿松昨日的講話，話唔信阿松真唔選，因為唔選的人唔會咁講嘢。
阿松而家係南豐集團行政總裁，但近期頻頻曝光，唔係講地產，而係玩曝光。先是在上月以國際金融專家身分出席特區政府舉辦的《基本法》研討會，昨日又到教育學院同學生對話，講全球化同教育。若然唔係想選特首，又有無咁神心週之無日出來講同自己工作無關係的事情?
為拗而拗，阿松會唔會近日才決定唔選，但演講一早定咗? 資深政界人士睇吓阿松講乜，有幾句好有暗示。第一句係話「年輕人要學習反敗為勝」。阿松在2003年被指「偷步買車」而黯然下台，如今講「反敗為勝」似係講緊自己。佢離開政府後做番高級打工仔，在事業上無問題，他之敗只敗在政治上。要反敗，自然要在政壇上行番起身啦。
資深政界人士留意到阿松第二句話是「有才無德」。前政務司長唐英年早前講過期望有才德兼備的人參選特首，阿松昨日再講，指歷史上有很多書都說過「有才無德的人是最危險的」，又話自己請人時寧要一個有德無才的人，「最少他不會做壞事」。會後記者追問他梁振英是否有才無德，他沒有回應。
呢吓「沒有回應」可圈可點，普通一個商界CEO，如果有人話你講話影射到特首喎，我估佢會發聲明澄清囉。阿松就選擇不回應，背後含義又屬於「你懂的」範疇。所以資深政界人士認為，就算阿松的講座一早約好，若他真正無意參選，可以風花雲月，唔使咁樣「頂到行」。
如此看來，故仔大概係咁。早前各方人馬大力吹自己會選下屆特首，當CY無到，客觀上亦損害現屆政府的威信。所以無論阿爺也好，支持這些有意參選人的幕後人也好，叫大家暫時唔好玩得太過份，所以這些出賽人馬就突然改口。不過佢地口講唔選，大家最好信往一成先啦。
