香港在菲律賓人質事件問題上終於與菲方達成協議，有知情人士認為政府其實一額汗，因為唔使等到菲律賓選舉，即使拖到而家美國總統奧巴馬訪問完菲律賓之後，都好難達成協議。
雖然香港唔少人仲係好唔滿意菲律賓無正式道歉，只有「most sorrowful regret」的字眼，但知情人士話這已是最好。佢話奧巴馬如今在馬尼拉，快將和菲總統阿奎諾一齊公布「美菲安保條約」，呢條條約同「美日安保條約」都係同一類性質的東西，即係話美國會協防菲律賓，矛頭自然針對中國。仲有仲有，美國在菲律賓已有軍事基地，奧巴馬已同菲方傾好，美國會擴大在菲律賓的軍事基地。
知情人士話，阿基諾其實又不如外間講到咁衰，對事件闊佬懶理，只因兩地文化差異太大，佢地係咁求求其其，根本唔明點解香港人咁堅持要佢地道歉。但阿基諾去年在亞太經合組織會議見過特首CY之後(即係因為坐位問題搞到特首一身蟻那一次)，派咗一個親信內閣部長去處理此事，證明佢都想快啲解決件事，不過中菲都各有強硬派唔係幾想再傾。
知情人士話，雖然阿基諾唔係想企硬，但若等到今天，佢搵到美國攞明車馬同佢協防，更加唔使俾面中國，達成協議的機會就會顯著下降，實情協議係「沒有更好，只有更差」。今次CY派咗特首辦主任邱騰華全權處理對菲談判，官場中人就話Edward邱有運，度談判之門其實都幾窄，唔側側身行過，就實聽瓜得。
Ariel
** 博客文章文責自負,不代表本公司立場 **
最近內地小童在旺角便溺事件愈鬧愈大。兩地網民互攻，兩地無論官員以至名人評論此事時都小心翼翼，怕講不好成為眾夭之的。
但Ariel剛睇到《新華社》一篇文章，真係要贊一贊。佢引用美國案例指在繁華商業街道隨地大小便是一種公害。《新華社》報道引用的官司幾年前發生，加州大學一位教授在停車場撒尿，被警察拘捕。他不服一直上訴到州上訴法院，官司歷時三年(好心教授隨街痾完尿就唔好咁厚面皮去打官司啦)。
法官最終認為，隨地大小便是對嗅覺、視覺和聽覺的侮辱，妨礙享受清潔、舒適、寧靜的生活。《新華社》用美國的案例，的確有「訴諸權威」的作用。文章又說，如果說自律、不隨地大小便是如廁文明頭等大事，清理乾淨自己如廁用過的地方是如廁文明第二要務，而有些地方法律規定，隨地大小便的禁令，對無行為控制能力者和幼童網開一面，但監護人必須負責清理。
香港雜誌記者強拍便溺童照片或許未展現忍耐的美德，但說到底部份內地父母容許子女在街頭便溺，又點講也是不文明的行為，無論在內地、香港或海外地區都不應該做。但如果由香港人講這些話，很易被演譯成針對內地人，如今由《新華社》講「隨街大小便是一種公害」，的確講了公道說話，有「一鎚定音」的作用。
父母應叫子女「忍一忍，文明點」。
