Ariel最近出席公開場合，見到政府高官，佢哋都搖搖頭，話而家捱緊打，而中棍的主要是運輸及房屋局局長張炳良。
近期政府真係無乜好消息，夾硬去講好少少的是和菲律賓達成協議，但係出嚟都俾好多人話菲律賓政府無用道歉的字眼，所以評價都係好壞參半，政府未必攞到分。
得分唔多失分多。先嚟高鐵延期，再嚟海難報告被將軍，兩單都射中炳良局長。港鐵的問題持續性發作，反對派發起用特權法查高鐵延期，都要炒作一排。而港鐵故障的情況更無日無之，咁搞法好易激起民憤，數罪俱發收唔到科。
海難報告家屬唔收貨，已開到口叫炳良局長下台。呢的死人事件，家屬怨氣難消，好難收科。你睇韓國海難叫個總理辭職都未夠，網民發起叫總統朴槿惠辭職，今日去攻總統府青瓦台個網站，搞到網站癱瘓。香港海難呢把火，都唔好當佢已經熄咗。
有口痕友搭句咀，嚟緊6月有64的25週年，對下一個月又有71遊行，政府都好被動。
Ariel
** 博客文章文責自負,不代表本公司立場 **
香港在菲律賓人質事件問題上終於與菲方達成協議，有知情人士認為政府其實一額汗，因為唔使等到菲律賓選舉，即使拖到而家美國總統奧巴馬訪問完菲律賓之後，都好難達成協議。
雖然香港唔少人仲係好唔滿意菲律賓無正式道歉，只有「most sorrowful regret」的字眼，但知情人士話這已是最好。佢話奧巴馬如今在馬尼拉，快將和菲總統阿奎諾一齊公布「美菲安保條約」，呢條條約同「美日安保條約」都係同一類性質的東西，即係話美國會協防菲律賓，矛頭自然針對中國。仲有仲有，美國在菲律賓已有軍事基地，奧巴馬已同菲方傾好，美國會擴大在菲律賓的軍事基地。
知情人士話，阿基諾其實又不如外間講到咁衰，對事件闊佬懶理，只因兩地文化差異太大，佢地係咁求求其其，根本唔明點解香港人咁堅持要佢地道歉。但阿基諾去年在亞太經合組織會議見過特首CY之後(即係因為坐位問題搞到特首一身蟻那一次)，派咗一個親信內閣部長去處理此事，證明佢都想快啲解決件事，不過中菲都各有強硬派唔係幾想再傾。
知情人士話，雖然阿基諾唔係想企硬，但若等到今天，佢搵到美國攞明車馬同佢協防，更加唔使俾面中國，達成協議的機會就會顯著下降，實情協議係「沒有更好，只有更差」。今次CY派咗特首辦主任邱騰華全權處理對菲談判，官場中人就話Edward邱有運，度談判之門其實都幾窄，唔側側身行過，就實聽瓜得。
