雖然陸羽仁成日講投資，但係健康都係一種重要「投資」，見到一段好好的影片忍唔住要同大家分享。
呢段片其實係一堂課，由美國匹茲堡大學David Serven教授主講，佢31歲時患上腦癌，現年50多歲的他盡心研究癌症產生和防治。這是我看過最簡單但甚有系統的防癌介紹，Serven教授的論述簡單易明，深入淺出。30歲以上癌症發病率逐漸增加，我認為30歲以上的朋友要花1小時看看此片，於你生命大有禆益。
Serven教授說1945年後美國癌症發病率大增，主要歸結六大原因：用糖量大增、使用反式脂肪及不含平衡脂質的肉類蛋類大增、使用化學品大增(農藥、乾洗劑、止汗劑)、坐著工作不運動、缺乏社交支持、不曬太陽缺乏維他命D。
他說人體有自然防御消滅癌細胞的機制，但我們要做些事情維護這個機制，當然就是不做少做上述會致癌的六件事。還要有防癌的四大健康行為。包括：第一不吸煙，第二每天不飲多過兩份的酒，第三是每天吃5份水果蔬菜，第四是每週5次每次30分鐘的運動，有機構進行了一個對1萬人的調查，發現14年後，有齊這4樣習慣的人，比沒有這些習慣的人死亡率低一半。呢種生活方式對防治癌症和心臟病同樣有效。
千萬不要以為看了上述簡介就唔使睇片，片段中還有大量有趣的內容，具體的飲食建議，不可不看。投資健康和投資股市一樣，懶人唔會有成果。
http://open.163.com/movie/2010/5/P/0/M81E39NFB_M81LFG3P0.html
陸羽仁
** 博客文章文責自負,不代表本公司立場 **
陸羽仁成日唔停口講儲蓄，有一個最損害儲蓄的行動，一定要講講：借錢俾人。以我所知，呢家嘢女人唔係幾興，男人唔少人做，懶係有義氣咁樣，其實係極度愚蠢的行為，陸羽仁過去做唔少，40歲之後戒咗，不妨講幾個自己親身經歷的事例，俾大家聽聽。
事例一：借錢俾人包二奶。話說有個做公司中層的朋友，話自己近期唔係好掂，開口同我借4萬，我(過去)係那種為朋友乜都得的人，同佢雖然唔熟，但係無乜諗就借咗俾佢，一來佢係高收入人士，根本無想像佢會唔還，二來覺得唔係大數目，問長問短好似好衰咁(你睇我蠢成點)，只係講咗兩句:「以後唔好咁大使」，「有錢記得還俾我」，就寫咗張支票俾佢。
哈，呢個朋友叫做中層，月入當然有幾萬，但借完去如黃鶴，一去不回頭，沒有還錢，偶然見到我當無件事。我後來聽人講，就係我借錢俾佢差唔多時候，佢包咗二奶，後來連仔都生埋。到今天我估個仔都十幾歲囉。我以為佢有乜嘢事情咁手緊，原來包二奶?! 後來當然係有錢包二奶，無錢還我呢區區4萬元債啦。
我無追呢筆債，我用呢筆債來提醒自己，以後唔好咁戇居胡亂借錢俾人啦。
事例二：無情情做生意。如果上一個朋友係個樣都古古惑惑，咁呢個朋友就啱啱相反，個樣老老實實，即係擔屎唔偷食那一種(其實擔屎有無人偷食架?)佢有一排話屋企有事，四圍問同事朋友借錢，佢係老實到無人會懷疑佢講大話那種人，好多人借咗錢俾佢，我無借(因為上便那個教訓)。
後來聽人講，所謂屋企有事，原來係佢識咗一個女朋友，佢係50歲都無結婚那種人，入世未深，從未試過有一個女人對佢咁好，佢當咗人係佢屋企人一樣(咁都得?)後來呢個女人話自己生意出咗啲問題，叫朋友幫吓手，入埋股咁話，朋友不單用晒自己積蓄去幫，唔夠仲四圍同人借，結果欠落成街債。唉，真相係點，好易估啫，個女人對佢咁好，九成九係一個局啦。
事例三：有時唔係借錢，係叫你俾錢佢幫你投資，結局都一樣。我大學剛畢業，有同學去咗金融機構做外匯，四圍要搵客，我見佢搵唔到客咁慘，就俾咗5萬銀佢代我炒，其實當時都心知一個剛畢業的同學，炒匯炒得幾叻，但係亦都係那種幫人心態，亦唔估會輸咁多，就俾佢代我開戶炒。結果「你懂的」，唔使半年輸清光，真係輸到一毫子都無那一種。
仲有仲有，也是剛畢業的時候，朋友的老婆做咗保險經紀，叫我幫佢開單，我的第一張保險單就係咁開的。近30年過去，朋友老婆老早轉咗行，張保險單固然變咗孤兒單無人理啦，朋友老婆後來發咗大達，我估佢而家有10、20億身家，當然唔識得我啦，過年都無發個短訊來問候。幫人開單，你老襯啫。
助人不是望報，但上述的事件，除了那個保險經紀之外，其餘根本幫唔到借錢人，借俾人包二奶做咗幫兇，借錢俾人俾女友「做生意」，只是送錢俾佢被人騙，俾朋友炒匯我輸咗佢亦無埋份工，有乜得著呢? 呢啲錢若當然夾埋做首期，當時都買到間樓啦(當時只是一成首期)，當年10萬買間樓，今天值500、600萬啦。
所以我今天會捐錢俾慈善機構，絕不借錢俾人，希望看了此文章的人，特別是年青人，引以為戒，莫走上我相同的蠢路，搵錢唔易呀!
