本周六政改諮詢結束，政府高官睇得幾淡，口氣係覺得阿爺同泛民好難傾得掂，但一個建制派大佬級人馬卻比較樂觀，佢話阿爺態度都係咁架啦，可退空間較少，但佢認為泛民最後會食有篩選的方案，因為唔食就乜都無。Ariel本來就唔信，不過睇陳四萬昨日的態度，又覺得建制派大佬講嘢又唔係咁離題喎。
港台昨日邀請八個提出政改方案的人一齊辯論，「香港2020」召集人陳四萬同學民思潮召集人黃之鋒激烈辯論，吸引了眼球(詳情可聽港台節目重溫)。陳太雖然話黃之鋒等提出的方案是最公平、直接和公正，但亦指出如今政改討論已非一張白紙，北京已表明不接受公民提名，應考慮其他中間落墨方案，希望可以找到一個能讓市民有真正選擇、不會對候選人設不合理限制、不設政治篩選的普選方案。
陳四萬的「香港2020」在3月底提出方案，建議擴大了提名委員會的選民基礎，又降低提名門檻至提委會成員十分之一，雖可令泛民入閘，但方案卻不接受公民提名。
黃之鋒昨日力插陳四萬的睇法，堅持公民提名，話現時區議會和立法會選舉，都以公民提名方法提名候選人，點解偏偏特首選舉唔得？你唔好話黃之鋒唔講策略，佢話上次政改一役，北京也曾在最後關頭突然轉軚，支持曾經公開否定過的民主黨「超級區議會方案」，故唔應該在目前即放棄爭取公民提名。
政界高人就話，好多泛民大粒佬見到黃之鋒都採取「怕咗佢」的態度，因為年青人一腔熱誠爭取最純粹的民主，你好難同佢拗，所以大多採取「出少句聲」的策略，但陳太偏偏無有怕，係咁同黃之鋒互砌，到底係陳四萬過做CS威慣唔受得不同意見，定係佢其實好想有deal呢？
Ariel
** 博客文章文責自負,不代表本公司立場 **
港鐵工程總監的周大滄曾經在英國及新加坡的鐵路公司任職，經驗超過30年，來港出任年薪990萬的高職，仍有兩年先至約滿，近日忽然劈炮唔撈。據聞負責西九總站工程的總經理馬佑盛（Alan Myers）亦已經請辭。你話港鐵呢個廚房有幾熱啦。
港鐵負責嘅高鐵工程爆出個大大鑊，延期完工。賴天賴地都唔會甩到身，往後肯定會俾立法會狙擊，風頭火勢，這些來自外地的港鐵高層與其留任受靶，真正是出「洋」相，梗係走為上著，閃得就閃啦！
數吓手指，計埋做唔到幾耐就劈炮嘅西九管理局總裁謝卓飛，同剛上任做港大校長的馬斐森，香港真係有唔少老外高層。特別係上手政府「煲軚曾」年代，政治溫度日高，就喜歡搵老外嚟香港做高層，諗法亦好簡單，唔係因為鍾意老外，又或者覺得老外叻啲，而係因為老外唔識中文，無咁容易遭到外界甚至記者直接狙擊，唔知係咪咁所以教育界都成日話香港英語水平下降。
不過幾年過來，這些老外應付政治危機的能力，就受到各界的質疑。無他，他們的祖國雖然油水無香港咁足，但勝在環境悠閑，可以養尊處優，唔係咁容易頂得住香港這種萬箭齊發的政治壓力。
政府因為高鐵延誤事件，俾各界炳到暈。問責又好，卸責又好，政府捉港鐵行政總裁韋達誠開刀機會唔細。睇嚟韋達誠前途都係凍過水，佢明年八月任期就會屆滿。就算佢唔自動走人，政府都唔係咁易同佢續約。睇嚟港鐵高層往後嘅日子都會好難挨喇！
