港鐵工程總監的周大滄曾經在英國及新加坡的鐵路公司任職，經驗超過30年，來港出任年薪990萬的高職，仍有兩年先至約滿，近日忽然劈炮唔撈。據聞負責西九總站工程的總經理馬佑盛（Alan Myers）亦已經請辭。你話港鐵呢個廚房有幾熱啦。
港鐵負責嘅高鐵工程爆出個大大鑊，延期完工。賴天賴地都唔會甩到身，往後肯定會俾立法會狙擊，風頭火勢，這些來自外地的港鐵高層與其留任受靶，真正是出「洋」相，梗係走為上著，閃得就閃啦！
數吓手指，計埋做唔到幾耐就劈炮嘅西九管理局總裁謝卓飛，同剛上任做港大校長的馬斐森，香港真係有唔少老外高層。特別係上手政府「煲軚曾」年代，政治溫度日高，就喜歡搵老外嚟香港做高層，諗法亦好簡單，唔係因為鍾意老外，又或者覺得老外叻啲，而係因為老外唔識中文，無咁容易遭到外界甚至記者直接狙擊，唔知係咪咁所以教育界都成日話香港英語水平下降。
不過幾年過來，這些老外應付政治危機的能力，就受到各界的質疑。無他，他們的祖國雖然油水無香港咁足，但勝在環境悠閑，可以養尊處優，唔係咁容易頂得住香港這種萬箭齊發的政治壓力。
政府因為高鐵延誤事件，俾各界炳到暈。問責又好，卸責又好，政府捉港鐵行政總裁韋達誠開刀機會唔細。睇嚟韋達誠前途都係凍過水，佢明年八月任期就會屆滿。就算佢唔自動走人，政府都唔係咁易同佢續約。睇嚟港鐵高層往後嘅日子都會好難挨喇！
Ariel
** 博客文章文責自負,不代表本公司立場 **
中聯辦前宣傳文體部部長郝鐵川突然離職，兼且走得好低調，政界都關注佢的去向，之前雖然頗多傳聞，Ariel收到風，休息咗一輪，郝部長最後落戶上海，去文史研究館做館長，五月一號就返工。郝部長學者出身，唔做宣傳，去搞文史，毫無難度。
呢個上海市文史研究局大有來頭，喺1953年6月成立，由已故領導人毛澤東提名，當年上海市長陳毅敦聘耆宿張元濟做首任館長架。
咁「文史館館長」即係做咩呢？Ariel去文史館網頁睇睇，原來呢個館係專門安排一啲有文史專長、有名望的老年知識分子做館員，文史館就負責照顧呢班館員生活，令佢哋老有所養、老有所為，量力而行、各展所長。
咁即係話，郝館長份工就係要令呢班老友記安享晚年囉，好有意義喎！
今次郝館長份新工，照睇維持正局級，而且係一份疏乎好工。不過呢項任命未正式公佈，所以文史館網頁仲未見到郝鐵川個大名。
