高鐵延期完工團火愈燒愈烈，本來搵咗工程總監周大滄提早退休，兼認晒錯誤判斷及未有敲響「警鐘」，未有向董事局匯報，由佢哽咗搏過關。
政府又搞過獨立小組調查，立法會內會又避過用特權法調查，本來周末前可以消吓毒，等下周一立法會鐵路事宜小組會議的大龍鳳。
點知一出閘就爆出蝦碌事件，公布李焯芬任主席唔夠兩小時就要請辭，知情人士話無計，今次真係蝦碌，唯一可以做的係即時斬纜止血，再找人加入獨立專家小組，仲有未公布的一名海外專家同本地專家，真係要再查清查楚有冇任何有衝突的利益關係。
政壇高人就分析，搞到咁樣，無得糾纏，除咗即時斬纜都無其他可行之路架喇。之但係要高鐵單嘢要收科，難度真係好高，以呢個獨立小組為例，要再搵人做小組主席已經幾難，第一，呢個人一定要係專家，第二又要同高鐵工程無任何關係，人選已不多，再加上呢單嘢已變成風眼上的大龍鳳，要有心有力的人肯挨義氣出來揹呢個位，真係好艱難。
仲有呀，就要望唔好因為呢件事嚇親兩位應承咗出任小組成員的專家喎，睇嚟安東尼張局長，今年真係黑仔，除咗高鐵之外，南丫島海難調查報告又係射中，啲家屬唔收貨；連沙中線都挖挖吓，發現古蹟，又唔知要延期幾耐啦。
Ariel
** 博客文章文責自負,不代表本公司立場 **
本周六政改諮詢結束，政府高官睇得幾淡，口氣係覺得阿爺同泛民好難傾得掂，但一個建制派大佬級人馬卻比較樂觀，佢話阿爺態度都係咁架啦，可退空間較少，但佢認為泛民最後會食有篩選的方案，因為唔食就乜都無。Ariel本來就唔信，不過睇陳四萬昨日的態度，又覺得建制派大佬講嘢又唔係咁離題喎。
港台昨日邀請八個提出政改方案的人一齊辯論，「香港2020」召集人陳四萬同學民思潮召集人黃之鋒激烈辯論，吸引了眼球(詳情可聽港台節目重溫)。陳太雖然話黃之鋒等提出的方案是最公平、直接和公正，但亦指出如今政改討論已非一張白紙，北京已表明不接受公民提名，應考慮其他中間落墨方案，希望可以找到一個能讓市民有真正選擇、不會對候選人設不合理限制、不設政治篩選的普選方案。
陳四萬的「香港2020」在3月底提出方案，建議擴大了提名委員會的選民基礎，又降低提名門檻至提委會成員十分之一，雖可令泛民入閘，但方案卻不接受公民提名。
黃之鋒昨日力插陳四萬的睇法，堅持公民提名，話現時區議會和立法會選舉，都以公民提名方法提名候選人，點解偏偏特首選舉唔得？你唔好話黃之鋒唔講策略，佢話上次政改一役，北京也曾在最後關頭突然轉軚，支持曾經公開否定過的民主黨「超級區議會方案」，故唔應該在目前即放棄爭取公民提名。
政界高人就話，好多泛民大粒佬見到黃之鋒都採取「怕咗佢」的態度，因為年青人一腔熱誠爭取最純粹的民主，你好難同佢拗，所以大多採取「出少句聲」的策略，但陳太偏偏無有怕，係咁同黃之鋒互砌，到底係陳四萬過做CS威慣唔受得不同意見，定係佢其實好想有deal呢？
