大家知唔知午餐肉同狗餅有乜關係，就係我地尊貴議員硏究的課題。
話說社民連長毛和人民力量就《預算案》發動拉布，工聯會王國興出招，話計一計數，拉一日布浪費二百五十五萬公帑，足夠買十六萬罐午餐肉。
長毛不甘示弱，昨日內會討論高鐵工程延誤可能超支，佢反擊話假設高鐵超支二百億元，以一罐狗餅十元計，足足夠買二十億罐狗餅，仲話要買來請王國興食，王國興聽完無乜反應，反而同屬工聯會的黃國健忍唔住，同主席抗議長毛咁講是侮辱人，要他收番句說話。
長毛竟然反駁，話狗餅人都食得，他自己都食過。內會主席梁君彥問他會否收回言論，長毛就企硬拒絕，正當大家以為梁君彥會警告長毛時，他竟然只拋下一句：「咁你繼續啦！」在場的泛民即時爆笑，不過黃國健和王國興就笑唔出啦。
立法會辯論質素咁高，我地做納稅人都笑唔出啦。
Ariel
** 博客文章文責自負,不代表本公司立場 **
高鐵延期完工團火愈燒愈烈，本來搵咗工程總監周大滄提早退休，兼認晒錯誤判斷及未有敲響「警鐘」，未有向董事局匯報，由佢哽咗搏過關。
政府又搞過獨立小組調查，立法會內會又避過用特權法調查，本來周末前可以消吓毒，等下周一立法會鐵路事宜小組會議的大龍鳳。
點知一出閘就爆出蝦碌事件，公布李焯芬任主席唔夠兩小時就要請辭，知情人士話無計，今次真係蝦碌，唯一可以做的係即時斬纜止血，再找人加入獨立專家小組，仲有未公布的一名海外專家同本地專家，真係要再查清查楚有冇任何有衝突的利益關係。
政壇高人就分析，搞到咁樣，無得糾纏，除咗即時斬纜都無其他可行之路架喇。之但係要高鐵單嘢要收科，難度真係好高，以呢個獨立小組為例，要再搵人做小組主席已經幾難，第一，呢個人一定要係專家，第二又要同高鐵工程無任何關係，人選已不多，再加上呢單嘢已變成風眼上的大龍鳳，要有心有力的人肯挨義氣出來揹呢個位，真係好艱難。
仲有呀，就要望唔好因為呢件事嚇親兩位應承咗出任小組成員的專家喎，睇嚟安東尼張局長，今年真係黑仔，除咗高鐵之外，南丫島海難調查報告又係射中，啲家屬唔收貨；連沙中線都挖挖吓，發現古蹟，又唔知要延期幾耐啦。
