由幾名學者發起嘅「佔中行動」，成單嘢開始變得騎呢。特別係昨日「佔中商討日」，以人民力量主席袁彌明為首的激進派，成功入侵整個投票，最終將所有溫和方案踢晒出局，令人覺得呢班學者搞手真係天真爛漫，Kawaii呢！
佔中三子的原意係希望在「佔中商討日」，二千幾個簽咗佔中生死狀的仁人志士可以坐低傾傾，大家溫溫和和，理理性性，有商有量(係唔係好有希臘城邦民主廣場大會的烏托邦feel呢)，傾完之後先至在多個方案之中，投票選出三個出來，俾市民選擇。
激進派唔想溫和派方案跑出，就唔同你客氣啦，紛紛「吹雞拖馬」。彌明BB話，擔心陳方安生的香港2020方案、18學者方案等「不民主方案」會跑出，所以動員咁多人來投票。人民力量班400人，社民連拉200人，學界、佔中後援會和「調理農務蘭花系」等組織，亦拖馬過百人到場，即時報名加入然後去投票。原來的安排係先商討，後投票。激進派睬你都儍，仲講明係採取「只投票不商討」的策略，只係填表同投票。
有近百名「蘭花系」和佔中後援會支持者在中大票站圍住義工，要求馬上投票，「蘭花系」成員多番用粗口鬧義工，令佔中義工無所適從，場面十分混亂。佔中發起人之一陳健民話，若參加者「為投票而投票」，就違佔中商討日精神。
唉，學者有學者講，激進派啋你有味啦。佢哋的人海戰術相當成功，陳四萬嘅「香港2020方案」與「18學者方案」等溫和方案，全軍覆殁。勝出嘅三個方案，清一色包含公民提名元素。
學者坐喺象牙塔內，慢吞吞，講理想，定出烏托邦式的遊戲規則，點知被人食住上。但激進派都只係跟主辦者的遊戲規則玩，你玩輸咗無得賴，要怪，只能怪自己定出嘅規則太天真。結論係學者發起佔中未佔到，自己個場已經俾激進派佔晒。
Ariel
** 博客文章文責自負,不代表本公司立場 **
高鐵工程爆鑊，政府官員同港鐵高層星期一上立法會解畫，搞咗個大龍鳳。運輸及房屋局局長張炳良同港鐵行政總裁韋達誠理所當然俾議員圍插。議員插法各有不同，Ariel聽聞官場中人對新民黨主席葉劉淑儀的說法最有意見。
如果論插得勁，當然係泛民啦，但講到啜核同出位，就非葉劉莫屬，佢質問張炳良點解咁信韋達誠，又冇向政府更高層匯報，仲話「大件事嚟喎，點解一個人孭呢？無可能嘛，人講你就信？咁大個仔！」幾十歲人仲俾人閙「咁大個仔！」真係頂心頂肺！
泛民派出力勁插，已經預咗；建制派抽水減壓，亦屬無可厚非。但葉劉身為行政會議成員，居然玩得咁盡，官場中人就「慶過火屎」啦。行會成員雖然唔係局長，但亦係政府問責團隊中的一員，同坐一條船也，你唔幫唔出聲都得，使唔使踩到咁盡呢?
或者今次高鐵延誤事件，無涉及行政會議的集體決策，所以葉劉覺得唔關佢事。
但有官員話，做得行會成員，即係已經認同了政府的理念，同坐一條船，榮譽你享咗，有鑊要齊孭。唔係你隨意換頂帽，就可以變身為「時事評論員」，狂隊政府。
官場中人除咗問責高官唔高興之外，公僕亦都唔多Like，怕呢啲政治風波燒埋公僕員。佢地話葉劉都係官場出身，點解為選票要咁「反轉豬肚」呢？
