高鐵工程爆鑊，政府官員同港鐵高層星期一上立法會解畫，搞咗個大龍鳳。運輸及房屋局局長張炳良同港鐵行政總裁韋達誠理所當然俾議員圍插。議員插法各有不同，Ariel聽聞官場中人對新民黨主席葉劉淑儀的說法最有意見。
如果論插得勁，當然係泛民啦，但講到啜核同出位，就非葉劉莫屬，佢質問張炳良點解咁信韋達誠，又冇向政府更高層匯報，仲話「大件事嚟喎，點解一個人孭呢？無可能嘛，人講你就信？咁大個仔！」幾十歲人仲俾人閙「咁大個仔！」真係頂心頂肺！
泛民派出力勁插，已經預咗；建制派抽水減壓，亦屬無可厚非。但葉劉身為行政會議成員，居然玩得咁盡，官場中人就「慶過火屎」啦。行會成員雖然唔係局長，但亦係政府問責團隊中的一員，同坐一條船也，你唔幫唔出聲都得，使唔使踩到咁盡呢?
或者今次高鐵延誤事件，無涉及行政會議的集體決策，所以葉劉覺得唔關佢事。
但有官員話，做得行會成員，即係已經認同了政府的理念，同坐一條船，榮譽你享咗，有鑊要齊孭。唔係你隨意換頂帽，就可以變身為「時事評論員」，狂隊政府。
官場中人除咗問責高官唔高興之外，公僕亦都唔多Like，怕呢啲政治風波燒埋公僕員。佢地話葉劉都係官場出身，點解為選票要咁「反轉豬肚」呢？
Ariel
** 博客文章文責自負,不代表本公司立場 **
政改諮詢上周六落幕，尾段好多方案衝閘最後提交，其中一個是全國政協常委胡定旭提出的方案，惹起一點點議論。
肥胡方案在特首候選人首輪「入閘」和次輪「出閘」開跑之間，提出多一個程序，參選人「入閘」後，若有三成提委會委員動議反對某個參選人參選，又獲得六成委員通過，該人必須退選，可確保對抗中央的人不能「出閘」。
肥胡方案先建議改革提委會組成，由千二增至千六人，維持四大界別。佢建議最終出閘候選人數為三名，其中一個揀參選人的方法是若有某人「入閘」成參選人後，有三成提委會委員提出反對佢參選，此動議又獲得六成委員通過，該人則必須退選。餘下參選人人數，如不超過三名，則由提名委員會以單一議案通過，全部成為候選人，若餘下參選人超過三人，則進行一提委一票方式投票，得票最高三人成為正式候選人。
支持泛民的人睇完可能唓一聲，話都係篩選啫。的確係，但比簡單地由提委會過半數選出候選人，篩人走的難度高一點，第一要有三成提委會提出，不是求求其其有人話就去篩，要有實質證據話候選人唔夠格或對抗中央才可提出。第二是要六成提委會成員通過才可以叫人退選，已比建制派原來說的過半數即五成高。
有政壇高人話，肥佬呢個方案值得留意吓，唔係話佢個方案好得，但佢提出一個方向，若然阿爺和泛民咁啱有得傾(大家都預機會唔太大)，雙方現時南轅北轍好難傾，但肥胡呢個六成提委才可以叫人退選的機制，提出咗一個制度化的方向，增加篩選的難度，可唔可以係討論的起點？
