佔中商討日投票令一眾溫和方案出場，事後陳四萬的「香港二○二○」和湯家驊都發言批評，陳四萬話佔中商討日選出三個性質相似的特首普選方案，將令「六二二」日的全港投票中缺乏真正選擇。而湯家驊更形容為「預演了一次有篩選的普選」。
唔止提出溫和方案的「老人家」不滿，發起佔中運動的學者陳健民亦不滿，佢對當日有人違規投票表遺憾，因為大會規定投票人士必須先參加過之前的商討日，才有權投票，參加者必需向票站場地總監，講出參加過那一場商討日資料，才可投票。陳健民話人民力量成員動員從未參與商討日的人士去投票，發動那些人欺騙場地總監，但佢認為這做法難以阻止。
不過陳健民死頂話，估計問題票涉及最多約50人，對結果影響不大，故不會重選。(會唔會批評人哋講大話時自己都講緊大話？因為有泛民人士估計有幾百票係咁去投票，呢啲「種票」完全影響了結果)
民主黨亦有投訴，佢昨日去信真普聯，要求同屬真普聯的人民力量和社民連解釋投票日突然轉軚，拒絕支持真普聯三軌方案，改投人民力量方案的原因。而人力和社民連在真普聯會上竟然又再度轉軚，聲稱而家收回支持人力方案立場，又再重新支持真普聯方案。人力成員在真普聯會上以「策略性投票」來解釋，話要踢走不含公民提名的「假普選」方案。
民主黨單仲偕在會後表示，人力和社民連「無遵守承諾」，表明稍後民主黨將開會討論是否繼續留在真普聯，「因為我諗互信基礎已經係跌到無」。真普聯召集人鄭宇碩就認為，泛民「團結先有希望」。
人民力量根本食住佔中運動和真普聯的遊戲規則，去到盡玩到盡，食硬一班學者和溫和泛民。 Ariel覺得啲學者和溫和泛民唔係意見有問題，係能力有問題，連激進派都玩唔掂，靠佢哋同共產黨玩，真係滴汗喎。
Ariel
** 博客文章文責自負,不代表本公司立場 **
許仕仁世紀涉貪案開審，傳媒爭位旁聽真係可以用打崩頭嚟形容。司法機構只留15個位给傳媒入場旁聽，反而有24個位留给公眾，你諗吓香港加國際傳媒有幾多家，真係50個位都未夠，自然要搶。
最早的傳媒零晨12點一過就到高院簽名攞位，有記者6:30過後到，點知已經滿額。今次審訊的法庭位於高院大樓5樓7號科技法庭，內設有55個座位，另加設5個流動位，記者就抱怨今次預留15個記者席，少過陳振聰案當時的30個位，呢單案比陳振聰案影響更大，更多傳媒想入場採訪，結果就爭成咁。
而司法機構預留24個位俾公眾，但現場所見有一班「揸遮黨」，懷疑係一啲相關公司職員，而唔係真正的公眾人士。而嚟得遲的國際傳媒自然無得入庭，雖然法庭安排咗入唔到場的記者在另一間房睇轉播，但大家都知轉播睇唔到好多現場人士的反應，記者好怕走雞報漏料俾老細炳，而且睇轉播的地方好嘈吓，記者都怕聽唔真。
不過雖然單案開審，但先嚟好多技術嘢要打內庭聆訊，即係未來數天都唔可以報導聆訊內容，記者只係齋聽。
