民主黨立法會議員單仲偕與黃碧雲原定周三與中聯辦主任曉明哥見面，今日(周一)突然宣在押後，話要優先處理與真普聯關係。雖然有建制派懷疑佢地無膽見中聯辦，甚至想玩嘢，但Ariel又覺得佢哋今次幾認真。
所謂真普聯問題，係由人民力量和社民連在佔中投票時轉軚不支持真普聯方案引發，民主黨單仲階話，民主黨正考慮多個可能性，包括退出真普聯、對人民力量及社民連提出不信任動議，甚至提出解散真普聯。
問心嗰句，民主黨覺得俾人力同社民連玩咗，認為對家只係借真普聯過橋，關鍵時刻推自己方案唔係真普聯方案，玩謝其他18學者和陳四萬的溫和方案。咁民主黨除非可以踼對家出局，否則留在真普聯亦無乜意思。
既然民主黨準備開波，咁就唔去見曉明哥住啦，否則開會時實俾對家話佢地係投降派，轉變晒話題，甚至變到唔係民主黨唔玩，係民主黨太契弟俾人踼出局。
Ariel覺得真普聯真係用處不大，因為主事者太斯文，根本唔夠人力同社民連玩。不如另起爐灶，叫做清普聯也好，純普聯也好，改個名搵班志同道合的人一齊玩，好過團結在一架自己控制唔到的爛車上面啦。
Ariel
** 博客文章文責自負,不代表本公司立場 **
Ariel上周六講到《香港晨報》凍結請咗但未返工的人手，叫已簽約但未上班的新員工不要上班，消息逐漸通天。辭咗舊職但未返《晨報》的採主、記者源自不同報館，他們重回已遞信的報館查詢，由於多數已在成個月前辭職，職位多已被填補，所以未聽到有人返到舊公司，搞到這些已離職人士有少少怨言。
《晨報》向這些未返工的員工話佢地有股東變動，所以叫人暫時不用返工，《蘋果日報》指據了解，有《晨報》股東決定退股，公司《晨報》正與超過一名潛在股東洽商，惟轉變股權需要審核賬目資料，故暫時凍結人手，難以估算延遲多久，遂通知受影響的未上班同事。晨報已聘請了逾200人，當中約120人已上班，另有約10多個多屬主任級人員原擬於5、6月上班，他們最受影響。
就Ariel所知，《晨報》幕後搞手蒯轍元去年找到一個內地商人出第一筆錢，約六千萬元，作為辦報的開拔資金，但這筆錢至今已用得七七八八。而蒯轍元近日被捕後，恐怕亦難再找那個初始投資的內地商人再出錢支持，所以要另找投資者。不過報紙尚未創刊，成績未知，要另找新投資者並非易事。
故此《晨報》叫停未上班的新人不用返工，係一個止血行為，始終用現有資源去支持120人，比支持200人容易，辦新報紙的確不易為。
