今日袋鼠去了一個商業午餐聚會，同枱有一位八十二歲叫Ray嘅老人家，老當益壯。袋鼠同佢傾開有癮，聽佢講吓和朋友打網球、賭兩蚊雞打舖士碌架，與及他自己家庭成員，尤其是提到佢過身嘅老婆，稱之為一生最好。
此外，袋鼠問及他，是否仍然主事自己的生意，；原來他剛把行政交給細仔 (最年長的女兒已經退休)，但也間唔中參與一些小計劃 - 佢講得好簡單，召集齊伙計及相關供應商，俾兩個星期時間佢哋度掂佢，自己呢，就利用這兩星期時間出外旅行嘆世界。
大慨這是上咗軌道的生意先至可能咁樣做吧！但係上軌道之前，也許有不少付出和經營，但由於開餐時間到而分開坐，就在下次再見面之前，暫時唯有腦內補完。只不過佢幾次提到不同英語『運氣』和『誠信』的形容詞 - lucky、fortunate、trust、trustworthy… 想起當年甚少顧用律師睇文件嘅年代 (雖然佢亦補充一句，也許正確程序妥當好多)，牙齒當金使，都可以做成好多生意。
袋鼠還沒有聽到佢講個別生意交易嘅故仔，但聽佢所講嘅運氣，一方面係五十年前，遇上帶佢入行嘅另一個老前輩 - 俾雙倍佢當年嘅人工拉佢入行；另一方面搵到可靠、可信的伙計及供應商。講真，尤其是創業初期，俾供應商甩底、或買家走數，都即刻死得。
大慨袋鼠都係好相信命運嘅人，亦相信商業上嘅信譽係可以當錢使，而且袋鼠老竇都有呢啲故仔講，因此同佢咁好傾… 也許唔止袋鼠好傾，如果佢同袋鼠老竇見面，佢哋應該都會幾好傾。
大笨袋鼠
** 博客文章文責自負,不代表本公司立場 **
今晨寫了一篇有關全民保障的網文之後，袋鼠覺得可以順便一提，對香港強積金的意見，與及一些袋鼠國強積金的改革。
由於供款由顧主選擇，香港強積金變相競爭少，收費唔平，而半自由行就真係到喉唔到肺… 袋鼠國所有專營強積金的基金，已經是完全開放公開競爭，顧主必需向個別員工所選擇的基金過數供款。
此外，袋鼠國容許個人自行管理退休金，當然由於有會計核數、遵守法則(compliance) 等等的固定使費，自己都要有咁上下儲蓄才值得考慮，以確定支出百份比低於基金經理收費，才是化算。
另外，前一屆袋鼠政府根據Cooper Review，推行強積金改革，包括禁止財務顧問收取回俑 (trailing commission - 不過現屆保守派政府，以反政府干預為由，來提推反這一條例)，及推行一個低收費的default退休金MySuper，等啲懶理退休金嘅人，自動選擇，唔會被金融機構掠水過深。
袋鼠看過一篇報導，與其以歷史數據追求過去五年回報最好嘅基金，不如簡單去選擇收費最低的基金。以供款為期三、四十年，絕大多數基金的好表現，只是三數年的過渡性質 (transient)，但收費就是永恆的 (permanent)！ 與其大部份人都無乜時間或本事去揀投資，不如簡單啲，選擇收費便宜的基金，比較兩個收費相差1%的基金，假設投資回報相約，最終儲得的錢可以相差20%！
另外，唔知香港轉工多次嘅人，會唔會出現擁有多個強積金的問題？袋鼠感覺上是社會上絕大多數人，對退休金的態度都係闊佬懶理，三、四十年後的事看似遙不可及，卻絕對是和自身財務自由作對！只不過這裡的讀者，絕大多數也是陸羽仁的讀者，對理財重視，物以類聚，比較例外吧。
